Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 7

7-тӥ ЛЮКЕТ

1«Судить эн каре, тӥледыз но судить уз каре,2уго кыӵе судэн судить кариськоды, сыӵеен ик тӥ но судить каремын луоды; кыӵе мертэтэн мертаськоды, сыӵеен ик тӥледлы но мерталозы.3Малы тон мукет муртлэн синмысьтыз жагез шоры учкиськод, нош аслад синмысьтыд корзэ уд шӧдӥськы?4Кызьы тон мукет муртлы шуод: ”Вай, синмысьтыд жагзэ потто”, куке аслад синмад кор?5Чеберъяськись! Нырысь аслад синмысьтыд корзэ потты, соку адӟод, кызьы мукет муртлэн синмысьтыз жагзэ поттоно.

6Святой макеез пуныослы эн сётэ; марӟандэс но парсьёс азе эн куялэ – пыдынызы медаз лёгалэ, берыктӥськыса асьтэдыз медаз кесялэ.

7Курелэ – тӥледлы сётэмын луоз; утчалэ – шедьтоды; йыгаське – тӥледлы усьтозы.8Уго котькудӥз курись мурт басьтэ, утчась мурт шедьтэ, йыгаськисьлы – усьтозы.9Вань-а тӥляд пӧлады сыӵе адями, кудӥзлэсь пиез нянь куриз ке, солы из мед сётысал?10Чорыг куриз ке, кый мед сётысал?11Озьыен, тӥ, уродэсь-лекесь луыса но, асьтэлэн нылпиостылы ӟечесь кузьымъёс сётъяны быгатӥськоды ке, уката но Инмысь Атайды Солэсь курисьёслы ӟечлык сётоз.

12Котькытын но адямиослы озьы лэсьтэ, кызьы асьтэлы соослэсь лэсьтэмзэс кулэ кариськоды; уго закон но, пророкъёслэн веранзы но та бордын возисько.

13Ӟоскыт капкатӥ пырелэ, уго паськыт капка, эркын сюрес быронэ нуо, – отӥ тросэз мыно.14Ӟоскыт капка, сюбег сюрес улонэ нуо, но ӧжытэз соосты шедьто.

15Ӧрекчи пророкъёслэсь утиське. Соос тӥ доры ыжку дӥсен лыкто, нош пушсы сьӧсь кионъёслэн кадесь.16Емышсыя тӥ соосты тодмалоды. Тёрнпуысь виноград бичало-а, яке люгыпудысь смоква окто-а?17Озьы, котькудӥз ӟеч писпу ӟеч емыш сётэ, нош урод писпу урод емыш сётэ.18Ӟеч писпу урод емыш сётыны уг быгаты, урод писпу ӟеч емыш сётыны уг быгаты.19Котькудзэ ӟеч емыш сётӥсьтэм писпуэз корало но тыл пӧлы кушто.20Озьыен, емышсыя тӥ соосты тодмалоды.21Котькудӥз ик Мыным ”Кузё-Инмаре! Кузё-Инмаре!” шуись мурт Ин Эксэйлыке уз пыры, Инмысь Атаелэсь эриксэ быдэсъясь мурт гинэ отчы пыроз.22Тросэз со нуналэ Мыным шуозы: ”Кузё-Инмар! Кузё-Инмар! Тынад нимыныд азьпалзэ тодытыса ӧм-а ветлэ? Тынад нимыныд периосты улляса ӧм-а потталэ? Трос паймымон ужъёсты Тынад нимыныд ӧм-а лэсьтэ?”23Соку Мон соослы яло: ”Мон тӥледыз ноку но ӧй тоды, кошкелэ Мон дорысь, законлы пумит улӥсьёс”.

24Озьы, котькудӥз Мынэсьтым та кылъёсме кылзӥсь но быдэсъясь мурт аслэсьтыз корказэ из вылэ пуктӥсь визьмо пиосмуртлы укша.25Зорыны кутскем но, шуръёс тудӟыса, тӧлъёс пельтыса, со корка вылэ урдскиллям, нош со куашкамтэ, малы ке шуоно со из вылэ пуктэмын вылэм.26Нош кин Мынэсьтым та кылъёсме кылэ но соосты уг ке быдэсъя, со луо вылэ корказэ пуктэм визьмыз вакчи муртлы укшалоз;27зорыны кутскем но, шуръёс тудӟыса, тӧлъёс пельтыса, со корка вылэ урдскиллям; корка куашкам, куашканэз солэн шимес вылэм».

28Иисус та кылъёссэ вераса дугдэм бере калык паймиз Солэн дышетонэзлы.29Книга тодӥсьёс, фарисейёс кадь ӧвӧл, кузё мурт кадь соосты Со дышетӥз уго.


предыдущая глава Глава 7 следующая глава