Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 6

6-тӥ ЛЮКЕТ

1«Учкелэ, ёрмисьёслы сётондэс калык азьын, соос мед адӟозы шуыса, эн лэсьтэ: соку уго Инмысь Атайдылэсь медзэ-кузьымзэ уд басьтэ.2Озьыен, ёрмисьёслы сётыкуд, калык азьын чеберъяськисьёс кадь эн куашеты. Соос сӥнагогаосын но, ульчаосын но, калык мед данъялоз шуыса, озьы каро. Зэм ик тӥледлы верасько: асьсэлэсь медзэс-кузьымзэс соос басьто ини.3Тынад нош, ёрмисьлы сётыкуд, паллян киыд медаз тоды, мар лэсьтэ бур киыд.4Ёрмисьлы сётонэд лушкем мед луоз; лушкемез адӟись Атаед тыныд пунэмзэ шара берыктоз.

5Вӧсяськыкуд чеберъяськисьёс кадь эн лу, калык азьын возьматскон понна соос ярато сӥнагогаосын но ульча сэрегъёсын дугдылыса вӧсяськыны. Зэм ик тӥледлы верасько: асьсэлэсь медзэс-кузьымзэс соос басьто ини.6Тон нош вӧсяськыкуд бӧльмы сьӧрад пыр, ӧстэ ворса но адскисьтэм Атаедлы вӧсяськы, лушкемез адӟись Атаед тыныд шара берыктоз.7Вӧсяськыкуды язычникъёс кадь мултэссэ эн вералэ: трос кылъёс верамы ке, милемыз кылозы шуыса, соос малпало уго.8Соос кадь эн кариське; Атайды уго Солэсь куриськемдылэсь азьвыл ик тодэ, мар тӥледлы кулэ.9Тӥ тазьы вӧсяськелэ:

Инмысь Атаймы! Тынад нимыд дано мед луоз;
10Тынад Эксэйлыкед мед лыктоз;
Тынад эрикедъя мед луоз музъем вылын но инмын кадь ик.
11Милемлы туннэ улымон няньмес сёты;
12пунэмъёсмес но кушты,
милемлы пунэмо луисьёслэсь пунэмъёссэс ми куштэм кадь ик;
13милемыз визь сынаськонлэсь но утьы,
уродлэсь но мозмыты милемыз.
Тынад Эксэйлыкед, кужымед но данэд пумтэм вапуме. Аминь.

14Адямиослы сьӧлыкамъёссэс куштӥды ке, Инмысь Атайды тӥлесьтыд но куштоз.15Нош адямиослы сьӧлыкамъёссэс ӧд ке куштэ, Инмысь Атайды но тӥлесьтыд сьӧлыкамъёстэс уз кушты.

16Озьы ик, визякуды чеберъяськисьёс кадь мӧзмыт тусъем эн кариське; адямиос азьын визямзэс возьматон понна соос уго ымныръёссэс ӝож тусъем каро. Зэм ик тӥледлы верасько: асьсэлэсь медзэс-кузьымзэс соос басьто ини.17Нош тон визякуд йырдэ вӧйын зыра, ымнырдэ миськы,18визямед калык азьын медаз адӟиськы, Атаед азьын мед адӟиськоз, Кудӥз лушкемын; лушкемез адӟись Атаед тыныд пунэмзэ шара берыктоз.

19Музъем вылэ асьтэлы ваньбур эн люкалэ, отын сое кей сие, сыномыса быре, лушкаськисьёс гудӟиськыса пыро но нуыса кошко.20Асьтэлы ваньбур Инме люкалэ, отын кей но уг сиы, сыномыса но уг быры, лушкаськисьёс но гудӟиськыса уг пыро, уг лушкало.21Уго кытын тӥляд ваньбурды, отын ик луоз сюлэмды но.

22Мугорлэн югдытӥсез син луэ. Озьыен, синмыд чылкыт ке луиз, быдэс мугорыд югыт луоз.23Синмыд тынад урод ке, быдэс мугорыд пеймыт луоз. Нош тынад пушкысьтыд югытэз пеймыт ке, кыӵе бен соку со пеймытлык?

24Нокинлэн но кык кузёлы служить каремез уг луы: уго одӥгзэ адӟемпотостэм кароз, нош мукетсэ яратоз; яке огезлы сюлмысьтыз тыршоз, нош мукетыз сярысь уз сюлмаськы. Уд быгатӥське Инмарлы но, маммоналы но огдыре служить карыны.25Соин ик тӥледлы шуисько: эн сюлмаське лулды понна, – мар сиём, мар юом, мугорды понна – мар дӥсялом шуыса. Лул бадӟымгес ӧвӧл-а сиёнлэсь, мугор бадӟымгес ӧвӧл-а дӥськутлэсь?26Учкелэ инмысь тылобурдоос шоры: соос уг кизё, уг арало, кеносазы но уг люкало; но Инмысь Атайды сюдэ соосты. Тӥ соослэсь трослы умоесь ӧвӧл-а?27Тӥ пӧлысь кин бен, сюлмаськиз ке но, быгатоз одӥг гырпум кузьда ке но мугорзэ ӝужыт карыны?28Дӥськут сярысь но малы сюлмаськиськоды? Учкелэ бусы сяськаос шоры, кызьы соос будо: уг ужало, уг черсо.29Но тӥледлы верасько: Соломон туж дано дыръяз но таос пӧлысь одӥгзы кадь но ӧз дӥсяськылы.30Бусы турынэз, кудӥз туннэ вань, нош ӵуказе гуре куштэмын луоз, Инмар озьы дӥся ке, эшшо но умойгес уз-а дӥся тӥледыз, ӧжыт оскисьёс?31Озьыен, эн сюлмаське, эн но шуэлэ: ”Мар милемлы сиёно?” яке: ”Мар юоно?”, яке: ”Мар дӥсяно?”32Малы ке шуоно ваньзэ тае язычникъёс утчало, тӥляд Инмысь Атайды тодэ уго, ваньмыз таос тӥледлы кулэ шуыса.33Нырысь ик Инмарлэсь Эксэйлыксэ но Солэсь шонерлыксэ утчалэ, соку ваньмыз таос но тӥледлы сётэмын луоз.

34Озьыен, эн сюлмаське ӵуказе нунал сярысь, уго ӵуказеез нунал ачиз сюлмаськоз ачиз сярысь: котькуд нуналлэн аслаз сюлмаськонэз тырмыт».


*а 6:24 маммона – узырлык-байлык


предыдущая глава Глава 6 следующая глава