Выбрать язык
Книги Ветхого Завета
Книги Нового Завета
с русским текстом2-тӥ книга
1Израильлэн но Иудея музъемлэн вань люкетъёсаз Езекия адямиоссэ ыстӥз, Ефремлы но Манассиялы Иерусалиме, Кузё-Инмар корка Израильлэн Инмарезлэсь Кузё-Инмарлэсь Пасхазэ ортчытыны мед лыктозы шуыса, гожтэтъёс ыстӥз.2Кенешын эксэй, солэн кивалтӥсьёсыз, Иерусалиме люкаськем вань калык огкылэ вуизы: Пасхаез кыкетӥ толэзе ортчытоно,3малы ке шуоно сое ас дыраз ортчытыны ӧз быгатэ, – священникъёс, лыдызъя кӧня кулэ вал, дун-чылкыт луыса ӧз вуэ, калык Иерусалиме ӧз люкаськы.4Эксэйлы но, вань люкаськемлы но та яраз.5Огкылэ вуизы: быдэс Израиль музъеме, Вирсавияысен кутскыса Дан музъемозь, ялоно, калык Иерусалиме мед лыктоз Израильлэн Инмарезлы Кузё-Инмарлы Пасхаез ортчытыны, уго кемалась дырысен ини сое ӧз ортчытъялэ, кызьы косонын верамын.6Эксэйлэсь, солэн кивалтӥсьёсызлэсь гожтэтъёссэс кутыса ыстэм муртъёс быдэс Израиль но Иудея музъемъёсы мынӥзы, эксэйлэсь косонзэ быдэстыса, шуизы: «Израильлэн нылпиосыз! Авраамлэн, Исааклэн, Израильлэн Инмарез Кузё-Инмар пала берытске, соку Со учкоз Ассириялэн эксэйёсызлэн киулысьтызы тӥ доры быдэс кылем люкетэз шоры.7Атайёссылэн Инмарзы Кузё-Инмар азьын законлы пумит улэм атайёсты, агай-вынъёсты кадесь эн луэ; кызьы тӥ али адӟиськоды, Со соосты туркан-таркан улэ сётӥз.8Табере атайёсты кадь чурыт сюлэмоесь эн луэ, Кузё-Инмарлы тэрытске, пумтэм вапумъёслы вӧсям храмаз лыктэ, Инмардылы Кузё-Инмарлы ужаса-тыршыса улэ, соку Со вожпотонэзлэсь гомась тылзэ тӥ вылысь палэнтоз.9Кузё-Инмар пала берытскиды ке, соку тӥлесьтыд агай-вынъёстэс, нылпиостэс пленэ нуэмъёс гажаны-жаляны кутскозы, соос та музъеме берытскозы, уго Инмарды Кузё-Инмар ӟечлыко, гажась-жалясь, Со пала берытскиды ке, Со но тӥ палась ымнырзэ уз палэнты».
10Ыстэм муртъёс Ефрем, Манассия музъемъёстӥ, Завулон выжылэн улон интыозяз, городъёсысь городъёсы ветлылӥзы, нош соосты серем карылӥзы, сантэмазы.11Озьы ке но Асир, Манассия, Завулон выжыосысь куд-огъёсыз зӥбыт-востэм кариськизы но Иерусалиме лыктӥзы.12Иудея вылын Инмарлэн соослы одӥг сюлэм сётӥсь киыз улӥз Кузё-Инмарлэн верам кылызъя эксэйлэсь, кивалтӥсьёслэсь косонзэс быдэстон понна.
13Юмал Нянь Сиён празднике Иерусалиме туж трос калык люкаськиз, кыкетӥ толэзе трос гинэ калык люкаськиз.14Султӥзы но Иерусалимысь курбон сётон интыосты сэрпалтӥзы; сульдэръёслы-идолъёслы ӵындытъян ортчытылон интыосты куашкатӥзы но Кедрон ӧре куязы.15Кыкетӥ толэзьлэн дас ньылетӥ нуналаз Пасхалы сӥзем ыжпиез вандӥзы. Священникъёс, левитъёс возьытэ усизы но чылкытатӥськон сямез ортчытэм беразы Кузё-Инмар коркан тылын сутӥськись курбонъёс сётӥзы,16Инмар адямилэн, Моисейлэн законэзъя, асьсэлэн пуктон-косонзыя соос асьсэ интые султӥзы. Священникъёс, левитъёслэн киысьтызы басьтыса, вирен пазязы.17Люкаськонын трос вал чылкытатӥськон сямез быдэстӥсьтэмъёс, со дун-чылкыт луымтэос интые Кузё-Инмарлы сӥзем Пасха ыжпиез левитъёс вандылӥзы.18Калык пӧлысь тросэз, уката ик Ефрем, Манассия, Иссахар, Завулон выжыысь адямиос, ӧз чылкытатӥське; озьы ке но соос, пуктон-косонэз сӧрыса, Пасха ыжпиез сиизы.19Нош Езекия соос понна вӧсяськыса шуиз: «Ӟечлыко Кузё-Инмар ваньзэ, кин сюлэмзэ атайёссылэсь Инмарзэс Кузё-Инмарез утчан пала берыктӥз, простить мед кароз, святыня борды чылкытатӥськытэк йӧтӥськизы ке но».20Кузё-Инмар Езекиялэсь куриськемзэ кылӥз но калыклы простить кариз.
21Иерусалиме люкаськем Израиль пиос Юмал Нянь Сиён праздникез сизьым нунал ӵоже туж шулдыръяськыса ортчытӥзы; котькуд нуналэ священникъёс но левитъёс Кузё-Инмарез данъяны лэсьтэм шудон арбериосын Кузё-Инмарез данъязы.22Езекия ӟеч валаса Кузё-Инмарлы ужась-тыршись левитъёслэн сюлэмзылы кельшымон лякыт кылъёс вераз. Праздник сиёнэз сизьым нунал сиизы, тупаса улон понна курбонъёс сётылӥзы, атайёссылэсь Инмарзэс Кузё-Инмарез данъяллязы.23Вань люкаськем калык эшшо сизьым нунал ӵоже праздник ортчытыны басьтӥськиз, та сизьым нуналъёсты шулдырен ортчытӥзы,24уго Иудеялэн Езекия эксэез люкаськем калык понна сюрс ошпи, сизьым сюрс сюро векчи пудо поттӥз; кузёйыръёс люкаськем калык понна сюрс ошпи, дас сюрс сюро векчи пудо поттӥзы; таре трос священникъёс чылкытатӥськон сямез ортчизы.25Иудеяысь вань люкаськемъёс, священникъёс но, левитъёс но шулдыръяськизы, Израильысь вань лыктэм калык, Израиль музъемысь лыктэмъёс но, Иудеяын улӥсьёс но.26Иерусалимын туж шулдыръяськизы, уго Израильлэн эксэезлэн, Давидлэн пиезлэн Соломонлэн, улон нуналъёсыз дырысен талы укшасез Иерусалимын номыр но сыӵе-таӵеез ӧй вал.27Священникъёс, левитъёс султӥзы но калыкез бакель каризы; Со соослэсь куаразэс кылӥз, соослэн вӧсяськем, куриськем кылъёссы Инме Солэн святой улон интыяз вуизы.
Глава 30