Выбрать язык
Книги Ветхого Завета
Книги Нового Завета
с русским текстом2-тӥ книга
1Эксэе пуксьыкуз, Езекиялы кызь вить арес вал, кызь укмыс ар ӵоже со Иерусалимын эксэйын пукиз; анаезлэн нимыз Авия, Захариялэн нылыз.2Кузё-Инмар азьын Давид атаез кадь ик со ярамон ужъёс лэсьтыса улӥз.
3Эксэйын нырысь арзэ, нырысь толэзьзэ пукыкуз ик, Кузё-Инмар коркалэсь ӧсъёссэ со усьтӥз, тупатъяз.4Священникъёсты, левитъёсты лыктыны косӥз, шундыӝужанпал падвоже (площаде) соосты люказ но5шуиз: «Левитъёс, монэ кылзэ! Туннэ тӥ дун-чылкыт кариське но атайёстылэн Инмарзылэсь Кузё-Инмарлэсь корказэ вӧсялэ, вань кырсь макеосты вӧсяськон коркась поттыса куштэ.6Уго атайёсты законлы пумит ужъёс лэсьтылӥзы, Инмармылэн Кузё-Инмарлэн азяз ярантэм ужъёс лэсьтылӥзы, Солэсь палэнскылӥзы, Кузё-Инмарлэн юртэз палась ымнырзэс берыктӥзы, мышкынызы султӥзы,7храме пырон бӧльмылэсь ӧссэ ворсазы, лампадаосты кысӥзы, ческыт зыно ӵындытъянъёс ӧз ортчытъялэ, Израильлэн Инмарезлэн храмаз тылын сутӥськись курбонъёс ӧз сётылэ.8Иудеяен Иерусалим вылэ Кузё-Инмарлэн вожез потӥз, соосты сантэман, ултӥян улэ, турканы-тарканы сётӥз, кызьы тӥ али тае ас синмыныды адӟиськоды.9Тани, атайёсмы меч улэ погразы, нош пиосмы, нылъёсмы, кышноосмы мурт музъемын та дырозь но пленын уло.10Али мынам сюлмам малпан улэ – Израильлэн Инмареныз Кузё-Инмарен кусып кылдытоно, вожпотонэзлэсь гомась тылзэ мед палэнтоз.11Нылпиосы! Аляк эн улэ, уго тӥледыз Кузё-Инмар Ас азяз сылыны, Аслыз ужаны-тыршыны бырйиз, Солэн Аслаз ужась-тыршисьёсыз, ческыт зыно ӵындытонъёс ортчытылӥсьёс мед луоды шуыса».
12Соку левитъёс султӥзы: Амасайлэн пиез, Махаф, Кааф пиос пӧлысь Азариялэн Иоель пиез; Мерарилэн пиосыз пӧлысь: Авдийлэн Кис пиез, Иегаллелеллэн Азария пиез; Гирсон выжыысь: Зӥммалэн Иоах пиез, Иоахлэн Еден пиез;13Елицафан пиос пӧлысь: Шимри но Иеиел; Асаф пиос пӧлысь: Захария но Матфания;14Еман пиос пӧлысь: Иехиил но Шимей; Идифун пиос пӧлысь: Шемаия но Уззиел.15Соос агай-вынъёссэс люказы но дун-чылкыт кариськизы, эксэйлэн косэмезъя, Кузё-Инмарлэн верам кылызъя, Кузё-Инмарлэсь корказэ сузяны мынӥзы.16Священникъёс Кузё-Инмарлэн коркаяз сузяны пыризы но Кузё-Инмарлэн храмысьтыз вань кырсь арбериосты, мае шедьтӥзы, Кузё-Инмарлэн коркаезлэн азбараз поттӥзы, нош левитъёс таосты кутӥзы Кедрон ӧр доры нуон вылысь.17Нырысетӥ толэзьлэн нырысетӥ нуналаз вӧсяны кутскизы, та толэзьлэн ик тямысэтӥ нуналаз Кузё-Инмар коркалэн бӧльмыяз пыризы; Кузё-Инмарлэсь корказэ тямыс нунал ӵоже вӧсязы, нырысетӥ толэзьлэн дас куатетӥ нуналаз йылпумъязы.18Езекия эксэй доры корказ лыктыса шуизы: «Ми сузямы Кузё-Инмарлэсь корказэ, тылын сутӥськись курбон сётон ӝӧкез, солэсь вань сосудъёссэ, курбон нянь тырон ӝӧкез, солэсь вань сосудъёссэ;19Ахаз эксэйлэсь законлы пумит улыса, эксэйын пукон аръёсаз куштэм сосудъёсты бичаса вӧсямы, тани табере соос Кузё-Инмарлы курбон сётон ӝӧклэн азьпалаз сыло».
20Езекия эксэй ӵукна вазь ик султӥз но городлэсь кивалтӥсьёссэ люказ, собере Кузё-Инмар корка мынӥз.21Сизьым ошпиосты, сизьым ыжпиосты, сизьым такаосты, сизьым кечъёсты сьӧлыкъёссы понна, эксэйлык понна, вӧсяськон корка понна, Иудея понна курбон сётыны вайизы; Аарон пиослы, священникъёслы, Кузё-Инмарлы курбон сётон ӝӧк вылын тылын сутӥськись курбон сётыны со косӥз.22Ошпиосты вандӥзы но священникъёс вирзэс басьтӥзы, соин курбон инты вылэ пазьгизы, такаосты вандӥзы но соин курбон сётон ӝӧк вылэ пазьгизы, ыжпиосты вандӥзы но соин курбон сётон ӝӧк вылэ вирен пазьгизы.23Эксэй азе, люкаськем калык азе сьӧлыкъёс понна курбон сётыны кечъёсты вайизы, соослэн вылазы соос кизэс понӥзы.24Священникъёс соосты вандӥзы но соослэн вирынызы быдэс Израильлэсь сьӧлыкъёссэ быдтон понна курбон сётон ӝӧкез миськизы, уго быдэс Израиль понна эксэй тылын сутӥськись курбон сётыны, сьӧлыкъёс понна курбон сётыны косӥз.
25Кузё-Инмарлэн корказ левитъёсты кимвалъёсын, псалтирьёсын, цитраосын со султытӥз Давидлэн, эксэй юртысь азьпалзэ адӟись Гадлэн, Нафан пророклэн пуктон-косонзыя, уго та пуктон-косон Кузё-Инмар дорысь Солэн пророкъёсыз пыр сётэмын вал.26Левитъёс, Давидлэсь шудон арбериоссэ киязы кутыса, священникъёс, пеллян гумыосты кутыса, отчы султӥзы.27Езекия курбон сётон ӝӧк вылын тылын сутӥськись курбон сётыны косӥз. Курбон сётыны кутскыкузы, пеллян гумыосын, Израильлэн Давид эксэезлэн шудон арбериосыныз шудыса, Кузё-Инмарез данъяса кырӟаны кутскизы.28Тылын курбон сётонэз йылпумъятозь, вань люкаськем калык вӧсяськиз, кырӟасьёс кырӟазы, гумыосын пеллязы.29Тылын сутӥськись курбон сётонэз йылпумъямзы бере эксэй но со котырысь вань калык мыкырскиз но йыбырттӥз.30Езекия эксэй но кивалтӥсьёс левитъёслы веразы, соос Давидлэн но азьпалэз адӟись Асафлэн кылъёсынызы Кузё-Инмарез мед данъялозы шуыса, нош соос шумпотыса данъязы, мыкырскыса йыбырттылӥзы.
31Веранзэ азинтыса, Езекия шуиз: «Табере тӥ асьтэдыз Кузё-Инмарлы сӥзиды, курбонъёс, тау карон салам-кузьымъёс Кузё-Инмар корка вае». Вань люкаськем калык курбонъёс, тау карон саламъёс вайиз, кинлэн сюлмаз ӟеч мылкыдыз вал – тылын сутӥськись курбонъёс вайиз.32Люкаськем калык тамында тылын сутӥськись курбонъёс вайиз: сизьымдон ошъёс, сю ыжъёс, кык сю ыжпи – ваньмыз та Кузё-Инмар азьын тылын сутӥськись курбон сётон понна.33Вӧсяны ваем мукет курбонъёс таӵеесь вал: куать сю йыр сюро таза пудо, куинь сюрс йыр сюро векчи пудо.34Священникъёс ӧжыт вал, тылын сутоно пудолэсь кузэ ниыса ӧз вуэлэ, соослы левит агай-вынъёссы юрттӥзы, ужез йылпумъятозь но мукет священникъёс дун-чылкытатозь, уго левитъёс, священникъёсын ӵошатыса, асьсэды дун-чылкыт каронын тыршисесьгес вал.35Тылын сутӥськись курбонъёс сётыку, тупаса улонлы сӥзем курбонъёслэн кӧйзы но, курбон-салам кисьтонъёс но трос вал. Тазьы улӟытэмын вал Кузё-Инмарлэн корказ вӧсяськон.36Езекия но вань калык та понна шумпотӥзы: Инмар сокем калыклэсь мылкыдзэ ӝутӥз, уго та уж малпамтэ шорысь быдэсмиз.
Глава 29