Выбрать язык
Книги Ветхого Завета
Книги Нового Завета
с русским текстом2-тӥ книга
1Ваньмыз таос ортчем бере вань Израиль калык татысь иудей городъёсы мынӥз но сульдэръёсты-статуяосты пыргытъяз, вӧсяськон писпуосты погыръяз, гурезь йылъёсысь вӧсяськонъёсты куашкатъяз, быдэс Иудеяысь, Вениамин, Ефрем, Манассия музъемъёсысь но курбон сётон интыосты быдэсак тарказ. Собере вань Израиль пиос ас доразы, городъёсазы берытскизы.2Езекия священникъёслы, левитъёслы ужан-тыршон черодзэс тупатӥз, котькудӥзлы уж люкиз: священниклы яке левитлы тупасьсэ, тылын сутӥськись курбон сётон доры, тупаса улон понна сётӥськись курбон доры, служба нуыны, ушъян, данъян понна, Кузё-Инмар коркалэн капка дораз сылыны черод тупатӥз.3Ваньбур пӧлысьтыз оглюкетсэ эксэй тылын сутӥськись курбонлы сётӥз: ӵукна но ӝыт тылын сутыса курбон сётыны, суббота нуналэ, выль толэзь потыку, праздник нуналъёсы тылын сутӥськись курбонлы, кызьы гожтэмын Кузё-Инмарлэн законаз.4Иерусалимын улӥсь калыкез священникъёслы, левитъёслы улыны кулэ луись люкет сётыны косӥз, Кузё-Инмарлэсь законзэ тыршыса быдэсъясь мед луозы шуыса.
5Та косонэз ялэмзы бере израиль пиос трос выль нянь, вина, вӧй, чечы, бусыязы будэтэм трос емышъёс вайизы; ваньмыз понна дас люкет сётонэз мултэсэн быдэстӥзы.6Иудеялэн городъёсаз улӥсь израиль калык но, иудейёс но Инмарзылы Кузё-Инмарлы сӥзем сюро таза, векчи пудолэсь дасэтӥ люкетсэ, курбонлы ваем пӧлысь дасэтӥ люкетсэ вайизы; люкъёсын, люкъёсын люказы.7Куинетӥ толэзе люкъёсы тырыны кутскизы, сизьыметӥ толэзе тыремысь дугдӥзы.8Езекия, кузёйыръёс лыктэмзы бере люкъёсты адӟыса, Кузё-Инмарлы но Солэн израиль калыкезлы но тау каризы.9Та люкъёс сярысь Езекия священникъёслэсь, левитъёслэсь юаз.10Азария, Садок выжыысь архиерей, солы ответ сётыса шуиз: «Кузё-Инмар корка саламъёс вайылыны кутскем бере ми кӧтмы тырытозь сиськиськомы ни, трос кыле но, уго Кузё-Инмар Ас калыксэ бакель каре. Кылем люкетысь эшшо такем трос люкаськиз на».
11Кузё-Инмар корка борды Езекия бӧльмыос лэсьтыны косӥз, лэсьтыса вуттӥзы.12Отчы ваем саламъёсты, дасэтӥ люкетъёсты, кузьымъёсты, туж шонер лыдъяса, тырыны кутскизы. Отчы кивалтӥсе Хонания левитэз пуктӥзы, солэн Сӥмей братэз юрттӥсь луиз.13Нош Иехиил, Азазия, Нахаф, Асаил, Иеримоф, Иозавад, Елиел, Исмахия, Махаф, Бенания Хонаниялэн но солэн Сӥмей братэзлэн кивалтэмзы улын, чакласа-эскерыса улӥсьёс луизы, таӵе косон сётӥз Езекия эксэй но Инмар коркан кивалтӥсь Азария.14Имналэн Коре пиез, левит, шундыӝужанпал капка возьмась, Инмарлы ас мылкыдзыя ваем сиён-юон дорын сылӥз но Кузё-Инмарлы ваемез, тужгес кулэ луись сӥзем арбериосты сётъясь вал.15Солэн кивалтэм улсаз Еден, Миниамин, Иешуа, Шемаия, Амария, Шехания священникъёслэн городъёсазы ас агай-вынъёссылы шонер люкет люкылӥсьёс вал, – бадӟымъёсызлы но, покчиосызлы но,16списоке пыртэмъёс сяна, вань пиосмуртъёслы – куинь аресысен кутскыса, бадӟымъёсызлы, Кузё-Инмарлэн корказ нуналлы быдэ лэсьтоно ужъёсты быдэсъяны ветлӥсьёслы – ужам-тыршемзыя, кытын но кыӵе интыын ужам-тыршемзэс лыдэ басьтыса,17списоке пыртэм священникъёслы выжыен-выжыен, кызь аресэ вуэм но солэсь бадӟымгес арлыдо левитъёслы кытын но кыӵе интыын ужам-тыршемзэс лыдэ басьтыса,18списоке пыртэмъёслы пичи нылпиосынызы, кышноосынызы, пиосынызы, нылъёсынызы ӵош, – вань калыклы люкетъёс сётъязы, уго соос сюлэмзэс поныса ужазы-тыршизы та святой ужын.19Аарон пиослы но, городъёссы котырысь гуртъёсысь священникъёслы, котькудаз городэ нимын-нимын священникъёслэн вань пиоссылы, левитъёс пӧлысь списоке пыртэм вань адямиослы люкет сётъяны пиосмуртъёс пуктылэмын вал.
20Тӥни, мар лэсьтӥз Езекия быдэс Иудеяын, – аслаз Инмарез Кузё-Инмар азьын со ӟеч, шонер, зэм уж лэсьтӥз.21Инмар коркан ужан-тыршонлы мар гинэ со ӧз лэсьты, законэз, курон-косонъёсты быдэсъян понна, Инмарез сярысь малпаса лэсьтылӥз, вань сюлэмзэ со уже понылӥз но солэн азинлыкез-берекетэз вал.
Глава 31