Выбрать язык
Книги Ветхого Завета
Книги Нового Завета
с русским текстом2-тӥ книга
1Эксэе пуксьыкуз, Иоаслы сизьым арес вал, ньыльдон ар ӵоже со Иерусалимын эксэй вал; анаезлэн нимыз Цивья, со Вирсавияысь вал.2Иодай священник улон аръёсы Иоас Кузё-Инмар азьын ярамон ужъёс лэсьтыса улӥз.3Иодай солы кык кышно басьтӥз, солэн пиосыз, нылъёсыз вордскизы.
4Та бере Иоаслэн сюлмаз малпан кылдӥз: Кузё-Инмарлэсь корказэ выльдоно.5Священникъёсты, левитъёсты люкаса со шуиз: «Иудеяысь городъёсы мынэ но вань израиль калыклэсь азвесь люкалэ Инмардылэсь корказэ тупатъян понна арысь аре, та ужен дыртэ». Нош левитъёс ӧз дыртэ.6Иодай эксэй соослэсь кузёйырзэс ӧтьыса шуиз: «Малы тон Кузё-Инмарлэн Моисей ляльчиезлэсь, израиль калыклэн кенешезлэсь пуктон-косонзэс – вӧсяськон скиниялы Иудеяысь но Иерусалимысь выт люканэз – левитъёсты быдэстыны уд куриськы?7Уго сьӧлыклэсь кышкасьтэм Гофолия но солэн пиосыз Инмарлэсь корказэ тарказы; Кузё-Инмарлэн корказ возиськись вань арбериосты, сульдэръёслы-идолъёслы йыбыртъякузы, уже кутыны кутскизы».8Эксэй косӥз но одӥг ящик лэсьтӥзы, сое Кузё-Инмарлэн корказ пыронлэн педпалаз пуктӥзы.9Быдэс Иудеяе но Иерусалиме ялӥзы, Инмар ляльчилэн Моисейлэн пуктонэзъя, солэн израиль калык вылэ кыр дуннеысен выт тырон понэмзэ санэ поныса, Кузё-Инмарлы сӥзем выт мед ваёзы шуыса.10Вань кивалтӥсьёс, вань калык шумпотӥзы но сомында вайылӥзы – ящике пачыл луытозяз тырылӥзы.11Левитъёс пыр эксэй кузёйыръёслы ящикез вайылыкузы, азвесьлэсь трос луэмзэ адӟылыкузы, эксэйлэн подъясез но архиерейлэн ыстэм муртэз лыктыса ящикысь маиз вань, бушатылӥзы, собере ящикез берен интыяз ик пуктылӥзы. Тазьы соос нуналлы быдэ карылӥзы, туж трос азвесь люказы.12Эксэен Иодай люкаськем азвесез Кузё-Инмар коркан ужен кивалтӥсьёслы сётылӥзы, соос из вӧлӥсьёсты, лэсьтӥськисьёсты Кузё-Инмарлэсь корказэ выльдылыны, озьы ик дуриськисьёсты, ыргон ужен вырисьёсты Кузё-Инмарлэсь корказэ юнматылыны медъяллязы.13Уж быдэсъясьёс ужазы, соослэн киынызы тупатъян ужъёс нуиськизы, Инмар коркаез чебер каризы, юнматӥзы сое.14Вань ужзэс быдэстэм бере кылемзэ азвесез эксэен Иодайлы вайизы. Солэсь Кузё-Инмар коркалы сосудъёс лэсьтӥзы, службаез ортчытыны, тылын сутӥськись курбонъёс ортчытъяны кулэ луись сосудъёс лэсьтӥзы, чашаос, зарнилэсь, азвесьлэсь мукет сосудъёс лэсьтылӥзы. Иодайлэн вань улон нуналъёсаз Кузё-Инмарлэн корказ ялан тылын сутӥськись курбонъёс сётъязы.
15Иодай пересьмиз, кӧтыз тырымон улэм бераз со кулӥз: кулыкуз сю куамын арес вал солы.16Сое Давидлэн городаз эксэйёсын огазе ватӥзы, малы ке шуоно со Израильын ӟеч ужъёс лэсьтӥз Инмар понна но, Солэн коркаезлы но.
17Иодай кулэм бере Иудеяысь кивалтӥсьёс лыктыса эксэйлы йыбырттӥзы, соку эксэй соослэсь кылзӥськиз.18Атайёссылэн Инмарзылэсь Кузё-Инмарлэсь корказэ кулэ ӧз ни каре, писпуослы йыбыртъяны, сульдэръёслы-идолъёслы йыбыртъяны кутскизы, – со понна, та янгышъёссы понна Кузё-Инмар Иудеялы, Иерусалимлы вожзэ поттӥз.19Соосты Кузё-Инмар пала берыктон понна Кузё-Инмар соос доры пророкъёсты ыстылӥз, пророкъёс соосты визьмаллязы-нодъяллязы, нош соос кабыл ӧз басьтэ.20Иодай священниклэсь Захария пизэ Инмарлэн Духез шобыртӥз, калыклэн азяз, ӝужыт интые султыса, со соослы шуиз: «Тазьы шуэ Кузё-Инмар: Малы тӥ Кузё-Инмарлэн косонъёсызлэн сьӧраз потӥськоды? Тӥляд азинлыкты уз луы, кызьы тӥ Инмарлэсь палэнскиды, озьы ик Инмар но тӥлесьтыд палэнскоз».21Огкылысь солы пумит вераськыса, Иоас эксэйлэн косэмезъя сое, изэн зӥръяса, Кузё-Инмар коркалэн азбараз жугизы.22Иоас эксэй тодаз ӧз вайы Иодай атаезлэсь солы ӟеч лэсьтэмъёссэ, – солэсь пизэ вииз. Кулыкуз со шуиз: «Кузё-Инмар мед адӟоз, кылзэ мед юалоз!»
23Арлэн пумаз солы пумит Сириялэн армиез урдскиз, соос Иудеяе, Иерусалиме пыризы, калык пушкысь вань калыклэсь кивалтӥсьёссэ быдтӥзы, соослэсь басьтэм вань ваньбурзэс Дамаске эксэй доры ыстӥзы.24Сирияысь ожгарчиос ӧжыт кузя гинэ лыктӥзы ке но, Кузё-Инмар бадӟым кужымез соослэн киулазы сётӥз иудей калык атайёсызлэн Инмарзылэсь Кузё-Инмарлэсь куштӥськемзы понна. Иоаслы суд лэсьтӥзы.25Сириялэн ожгарчиосыз со дорысь кошкизы, нош соку со туж секыт висе вал, ляльчиосыз солы пумит лушкемен урдскизы – Иодай священниклэн пиезлэн вирыз понна – сое валесаз виизы, со кулӥз. Сое Давидлэн городаз ватӥзы, но эксэйёсты ватон шайгуосы ӧз ватэ.26Солы пумит урдскемъёс пӧлын вал: аммон ныллэн Шимеафалэн Завад пиез, моав ныллэн Шимрифалэн Иегозавад пиез.27Солэн пиосыз сярысь, солэн улон-вылонэзлы пумит трос азьпал веранъёс сярысь, Инмар коркаез пуктон сярысь эксэйёслэн книгаязы гожтэмын. Солэн интыяз Амасия пиез эксэе пуксиз.
Глава 24