Выбрать язык
Книги Ветхого Завета
Книги Нового Завета
с русским текстом2-тӥ книга
1Сизьыметӥ араз Иодайлэн мылкыдыз лӧптӥз но, сю ожгарчиосын кивалтӥсьёсын кусып кылдытыса, ас палаз кариз Иерохамлэсь Азария пизэ, Иегохананлэсь Исмаил пизэ, Оведлэсь Азария пизэ, Адаиялэсь Маасея пизэ, Зӥхрилэсь Елишафат пизэ.2Соос быдэс Иудеяетӥ ортчизы, Иудеялэн вань городъёсысьтыз левитъёсты, Израиль выжыослэсь йыръёссэс люказы, собере Иерусалиме лыктӥзы.3Вань люкаськем калык Инмар коркан эксэез кабыл басьтыны кыл сётӥз. Иодай соослы шуиз: «Тани эксэйлэн пиез эксэй луыны кулэ, кызьы Кузё-Инмар Давидлэн пиосыз сярысь вераз.4Тани, тӥ мар лэсьтэ: тӥ пӧлысь куинетӥ люкетэз, субботае лыктылӥсь священникъёс, левитъёс, ӧс выжы дорын возьмаськисьёс луозы,5эксэй корка бордын – куинетӥ люкетэз, Иесод капка дорын – куинетӥ люкетэз, нош вань калык – Кузё-Инмарлэн коркаезлэн азбаръёсаз.6Священникъёс но левитъёслэн ужась-тыршись муртъёссы сяна, Кузё-Инмарлэн корказ нокин но мукет мурт медаз пыра. Соос гинэ пырыны быгато, уго соос дун-чылкыт луэмын, нош ваньмыз мукет адямиос Кузё-Инмарлэсь корказэ мед возьмалозы.7Левитъёс котыр ласянь эксэез мед котыртозы, котькудӥзлэн кияз ожмаськон тӥрлыкез мед луоз, кин храме пыриз, со виемын мед луоз. Эксэй пырыку-потыку тӥ со бордын луэ».
8Иодай священниклэсь косонзэ левитъёс но, вань иудей калык но быдэстӥз. Котькудзы ас адямиоссэс – субботае лыктӥсьёссэ но, субботае кошкисьёссэ но – басьтӥзы, малы ке шуоно Иодай священник воштӥськись черодэз кошкыны ӧз лэзьы.9Иодай священник сю ожгарчиосын кивалтӥсьёслы шибодыос сётъяз, Инмар коркан возиськись бадӟымъёссэ но, пичиоссэ но Давидлэсь щитъёссэ сётъяз;10вань калыкез, котькудзэ адямиез, ожмаськон тӥрлыксэ кияз кутытыса, храмлэн бурпаласеныз кутскыса храмлэн паллян палозяз, курбон сётон ӝӧк доры, корка доры но, эксэй котыре но султытӥз.11Эксэйлэсь пизэ поттӥзы но со вылэ эксэй изьы изьязы, сӥзён-косонэн книга сётӥзы но сое эксэе пуктӥзы; Иодай но солэн пиосыз сое вӧйын зырӟизы, шуизы: «Кема мед улоз эксэй!»12Бызьыса лыктӥсь, эксэй сярысь данъяса верась калыклэсь куаразэ Гофолия кылӥз но Кузё-Инмарлэн корказ калык доры потӥз.13Со адӟиз: эксэй пырон дорын ӝужыт интыяз сылэ но кивалтӥсьёс, гумыос эксэй котырын, та музъемысь вань калык шулдыръяське, гумыоссэс пелляса шудо, кырӟасьёс, ушъяны-данъяны быгатӥсьёс, киязы кырӟан гур поттӥсь шудонъёсты возё. Соку Гофолия выл дӥсьсэ ӵажак кесиз но кеськиз: «Эксэйлыклы пумит ӝутскон! Эксэйлыклы пумит ӝутскон!»14Соку Иодай священник сю ожгарчиосын кивалтӥсьёсты, ожгарчиослэсь кузёйыръёссэс, ӧтьытыса вайиз но соослы со шуиз: «Поттэ сое храмысь, кин ке со пала кариськиз ке, мечен виемын луоз», малы ке шуоно священник шуиз: «Кузё-Инмарлэн корказ сое эн вие».15Эксэй юртлэн вал возён капкаез доры вуэм бераз Гофолиялы инты сётӥзы но сое отчы виизы.
16Ваньзы соос Кузё-Инмарлэн калыкез мед луозы шуыса, Иодай асэныз но вань калыкен, эксэен кусып кылдытӥз.17Соку вань калык Вааллэн куалаез доры мынӥз но сое куашкатӥз, курбон тырон интыоссэ но, сульдэръёссэ-идолъёссэ но пыргытӥзы, Вааллэсь вӧсясьсэ Матфанэз курбон тырон азе виизы.18Кузё-Инмар коркалэсь ужъёссэ Иодай священникъёс, левитъёс кие сётӥз [выльысен улӟытӥз священникъёслэсь, левитъёслэсь нуналлы быдэ черодэн ужан-тыршонзэс], кызьы Давид люкылэ вал Кузё-Инмарлэн корказ Кузё-Инмарлы тылын сутӥськись курбон сётон ужез, Моисей законын гожтэмъя, шумпотыса, кырӟаса, Давидлэн пуктон-косонэзъя.19Кырсь адями малы но солы медаз пыра шуыса, со Кузё-Инмарлэн коркаезлэн капка дораз возьмаськисьёсты пуктӥз.20Сю ожгарчиосын кивалтӥсьёсты, кузёйыръёсты, калыкен кузёяськисьёсты, та музъемысь вань калыкез кутӥз но Кузё-Инмарлэн корказ эксэез келяз, вылысь капка пыр эксэй корка мынӥзы но эксэез эксэй пуконэ пуктӥзы.21Та музъемысь вань калык шулдыръяськиз, город басылӥз. Нош Гофолияез мечен бышкалтыса виизы.
Глава 23