Выбрать язык
Книги Ветхого Завета
Книги Нового Завета
с русским текстом1Эксэе пуксьыкуз, Иосиялы тямыс арес вал, со куамын одӥг ар ӵоже Иерусалимын эксэй пуконын пукиз; анаезлэн нимыз Иедида, со Боцкафысь Адаиялэн нылыз вал.2Кузё-Инмар азьын со ярамон ужъёс лэсьтыса улӥз, Давидлэн, атаезлэн, сюрес кузяз ветлыса улӥз, бурпала но, паллян пала но ӧз кожылы.
3Дас тямысэтӥ арзэ эксэйын пукыкуз, Иосия ыстӥз Мешулламлэсь Ацалия пиезлэсь Шафан пизэ, подъясез, Кузё-Инмарлэн корказ тазьы вераса:4«Мын Хелкия архиерей доры, Кузё-Инмарлэн корказ ваем, ӧс выжыын возьмаськыса сылӥсьёслэсь калыклэсь люкам азвесез лыдъяны кос,5сое Кузё-Инмарлэн корказ ужаны пуктэмъёслэн киязы мед сётозы, нош таосыз Кузё-Инмарлэн корказ сӧриськем интыоссэ тупатъясьёслэн киязы мед сётозы –6лэсьтӥськисьёслы, из тырисьёслы, борддор ӝутӥсьёслы, коркаез тупатъян понна пу, вӧлэм изъёс басьтыны;7киязы сётэм азвесь понна отчётсэс куроно ӧвӧл, соос ӧрекчаськытэк ужало уго».
8Хелкия архиерей Шафан подъясьлы тазьы шуиз: «Законэн книгаез мон Кузё-Инмарлэн коркасьтыз шедьтӥ». Хелкия книгаез Шафанлы сётӥз, соиз сое лыдӟыны кутскиз.9Шафан подъясь эксэй доры лыктӥз, со эксэйлы ответ вайыса шуиз: «Коркась шедьтэм азвесез тынад ляльчиосыд Кузё-Инмарлэн корказ ужаны пуктэм муртъёслэн киязы сётӥзы».10Шафан подъясь эксэйлы ивор вуттыса шуиз: «Та книгаез мыным Хелкия архиерей сётӥз». Шафан сое эксэй азьын лыдӟиз.11Законэн книгаысь кылъёсты кылэм бераз эксэй дӥськутсэ кесиз.12Хелкия священниклы, Шафанлэн Ахикам пиезлы, Михеялэн Ахбор пиезлы, Шафан подъясьлы, эксэйлэн Асаия медоезлы эксэй косон сётыса шуиз:13«Мынэлэ, мон понна, калык понна, быдэс Иудея понна та шедьтэм книгаысь кылъёс сярысь Кузё-Инмарлэсь юалэ, малы ке шуоно Кузё-Инмарлэн асьме вылэ туж бадӟым вожпотонэз ӝуатскиз асьмелэн атайёсмы та книгаысь кылъёсты санэ понытэк улэмзы понна, со верам кылъёсъя асьмеос ужаны, улыны кулэ вал».
14Соку Хелкия священник, Ахикам, Ахбор, Шафан но Асаия азьпалзэ тодытӥсь Олдама доры мынӥзы, Харкаслэн Тиква пиезлэн Шаллум пиезлэн кышноез доры, со дӥськут чаклась-утисьлэн кышноез вал, Иерусалимын улӥз, солэн кыкетӥ люкетаз, – соин соос вераськизы.15Та кышномурт соослы шуиз: «Тазьы шуэ Израильлэн Инмарез Кузё-Инмар: тӥледыз мон доры ыстэм муртлы вералэ:16”Тазьы шуэ Кузё-Инмар: та инты вылэ, отын улӥсьёсыз вылэ секытлык лэзё – Иудей эксэйлэсь лыдӟем книгаысьтыз вань кылъёсты.17Мон дорысь палэнскемзы понна, ас киоссылэн вань ужъёсынызы Мынэсьтым вожме поттыса мурт инмаръёс азьын ӵындытыса улэмзы понна Мынам йыркуре ӝуатскиз та инты вылэ, со уз кысы”.
18Нош Кузё-Инмарлэсь юаны ыстэм Иудей эксэйлы вералэ: ”Тынад кылэм кылъёсыд пумысен тазьы шуэ Израильлэн Инмарез Кузё-Инмар:19Та инты вылэ, отын улӥсь калык вылэ Мынэсьтым верамме, соос шимес карган макелы пӧрмозы шуэмме кылӥд но, тынад сюлмыд небӟиз, Кузё-Инмар азьын зӥбыт-востэм кариськид, тон дӥськуттэ кесяд, Мон азьын бӧрдыны кутскид, соин ик Мон но тонэ кылӥ, – шуэ Кузё-Инмар. –20Со понна, тани, Мон тонэ атайёсыд пӧлы поно, каньыллыкен тон шайгуад понэмын луод, тынад синъёсыд та инты вылэ Мынэсьтым лэзем шугадӟонъёсме уз адӟе”». Эксэйлы ответ вуттӥзы.
Глава 22