Выбрать язык
Книги Ветхого Завета
Книги Нового Завета
с русским текстом1Эксэе пуксьыкуз, Манассиялы дас кык арес вал, витьтон вить ар ӵоже со Иерусалимын эксэй пуконын пукиз, анаезлэн нимыз Хефциба.2Кузё-Инмар азьын со ярантэм ужъёс лэсьтыса улӥз, Кузё-Инмарлэсь израиль пиослэн азьысьтызы уллям калыкъёслэсь юрӟым ужъёссэс адӟем карыса улӥз.3Атаезлэсь, Езекиялэсь, быдтэм гурезь йылъёсын вӧсяськонъёсты со нош ик улӟытӥз, Вааллы курбон сётон интыос лэсьтӥз, Израильлэн Ахав эксэез кадь ик тыпы сурдъёсын вӧсяськонъёс усьтӥз; вань ин кужымъёслы йыбыртъяса, ужаса-тыршыса улӥз.4Кузё-Инмарлэн корказ курбон сётон интыос лэсьтӥз, кудӥз сярысь Кузё-Инмар шуиз: «Иерусалимын Мынам нимы улоз».
5Кузё-Инмарлэн коркаезлэн кыказ ик азбараз вань ин кужымъёслы сӥзем курбон сётон интыос лэсьтӥз.6Пизэ тыл пыр поттӥз, тунаськиз, пелляськиз, кулэм муртъёсты ӧтисьёсты, син пӧртмасьёсты котыраз люказ; Кузё-Инмарлэсь вожзэ поттон понна трос ярантэм ужъёс лэсьтӥз.7Храм пушкы Астарталэсь сульдэрзэ пуктӥз; храм пумысен Кузё-Инмар Давидлы но солэн Соломон пиезлы тазьы вераз: «Та храмам, Израильлэн вань выжыослэн городъёссы пӧлысь быръем Иерусалимам Мон Аслэсьтым нимме пумтэм вапумъёс ӵожелы юнмато.8Азьланяз израиль пиослэсь пыдзэс соослэн атайёссылы сётэм музъемелэн сьӧраз уг потты, Мынэсьтым косонъёсме быдэсъяса улыны тыршизы ке, Моисей ляльчиелэсь быдэсъяны косэм законъёссэ утьыса улӥзы ке».9Нош соос ӧз кылзӥське; Манассия соосты сокем йыромытылӥз – Кузё-Инмарлэн израиль калык азьын быдтэм калыкъёслэсь но уродгес ужъёс лэсьтыса улыны кутскизы.
10Кузё-Инмар Аслаз ляльчиосыз – пророкъёс – пыр шуиз:11«Манассия, Иудеялэн эксэез, татын азьвылгес улэм аморрейёслэсь но юрӟымгес ужъёс лэсьтэмез понна, сульдэръёсыныз-идолъёсыныз Иудеяез сьӧлыке пыртэмез понна,12со понна, – шуэ Израильлэн Инмарез Кузё-Инмар, – Иерусалим вылэ, Иудея вылэ сыӵе секытлык лэзё, кин со сярысь кылӥз ке, кык пельыз но жонгетоз;13Иерусалим вылэ Самарияез мертам гозыме кыско, Ахав юртлы дасям ӝуждала мертан гозыеным сое мертало; кызьы чашаез ӵушыло, озьы Иерусалимез ӵушо – ӵушозы но кымалтозы сое;14Аслэсьтым быръем люкетэлэсь кылем люкетсэ кулэтэм каро но соосты тушмонъёссылэн киулазы сёто, тупатэк улэм калыкъёссы киулэ тарканы, качаны сёто,15Мынам азям ярантэм ужъёс лэсьтыса улэмзы понна, атайёссылэн Египетысь потэм дырысенызы туннэ нуналозь Мынэсьтым вожме поттыса улэмзы понна».
16Эшшо ке, Манассия туж трос янгыштэм вирез кисьтӥз, соин со Иерусалимез пумысеныз пумозяз пачылмытӥз, аслаз сьӧлыкъёсыз сяна, со Иудеяез сьӧлыке пыртӥз – Кузё-Инмарлэн азяз ярантэм ужъёс лэсьтӥсь кариз.
17Мукетсэ, ваньзэ, мар лэсьтӥз Манассия, кыӵе сьӧлыкъёс со лэсьтӥз, ваньмыз Иудей эксэйёслэн книгаязы гожтэмын.18Атайёсыз кадь ик Манассия кулӥз но, сое корка вӧзысьтыз садэ, Уззалэн садаз, ватӥзы. Солэн интыяз эксэе пуксиз солэн Аммон пиез.
19Аммонлы, эксэе пуксьыкуз, кызь кык арес вал, со кык ар ӵоже Иерусалимын эксэйын пукиз; анаезлэн нимыз Мешуллемеф, со Ятбаысь Харуцлэн нылыз вал.20Манассия атаез кадь ик Кузё-Инмар азьын ярантэм ужъёс лэсьтыса улӥз.21Атаез кадь ик сыӵе ик сюрес кузя ветлӥз; атаез музэн ик, сульдэръёслы йыбыртъяса, ужаса-тыршыса улӥз,22атайёсызлэсь Инмарзэс Кузё-Инмарез кулэ ӧз кары, Кузё-Инмарлэн сюрес вылтӥз ӧз ветлы.23Аммонлэн медоосыз солы пумит лушкем уж малпазы, эксэез аслаз корказ виизы.24Но та музъемысь калык Аммон эксэйлы пумит лушкем уж лэсьтӥсьёсты ваньзэс виылӥз; та музъемысь калык со интые эксэе солэсь Иосия пизэ пуктӥз.
25Аммон сярысь, мар со лэсьтӥз, Иудей эксэйёслэн книгаязы гожтэмын.26Сое Уззалэн садаз шайгуэ ватӥзы. Солэн интыяз эксэе Иосия пиез пуксиз.
Глава 21