Выбрать язык
Книги Ветхого Завета
Книги Нового Завета
с русским текстом1Эксэй ыстӥз но Иудеяысь, Иерусалимысь вань тӧроосты со доры люказы.2Эксэй Кузё-Инмарлэн корказ мынӥз, соин ӵош вань иудейёс, Иерусалимын улӥсьёс, священникъёс, пророкъёс, вань калык мынӥзы – пичиысен бадӟымозь, собере Кузё-Инмарлэн коркасьтыз шедьтэм сӥзён книгалэсь вань кылъёссэ шара лыдӟиз.3Собере эксэй ӝужыт интые султӥз но Кузё-Инмарлэн азяз кыл сётӥз Солэн сӥзён-косонэзъя улыны, Кузё-Инмарлэн сюрестӥз ветлыны, Солэсь курон-косонъёссэ утьыны, усьтон-косонъёссэ но, пуктон-косонъёссэ но вань сюлмын, вань лулын быдэсъяны та книгае гожтэм сӥзён-косонлэсь кылъёссэ быдэсъяса улон понна со кыл сётӥз. Вань калык сӥзиськонэ пыриськиз.
4Эксэй Хелкия архиереез, кыкетӥ священникъёсты, ӧс дорын возьмаськыса сылӥсьёсты Кузё-Инмарлэн коркасьтыз Вааллы, Астарталы, вань ин кужымъёслы лэсьтэм вань тӥрлыкъёсты поттыны косӥз; соосты Иерусалим сьӧрысь Кедрон ӧр дурын сутӥз, пеньзэ Вефиле нуыны косӥз.5Иудей эксэйёслэсь Иудеяысь городъёсысь вӧсяськон интыосын, Иерусалимлэн котыраз ӵындытъянъёс ортчытъяны пуктылэм вӧсясьёссэ, Вааллы, шундылы, толэзьлы, кизилиослы, вань ин кужымъёслы ӵындытъянъёс ортчытылӥсьёсты но кулэтэм кариз.6Астарталэсь сульдэрзэ Кузё-Инмарлэн коркасьтыз поттӥз но, Иерусалим сьӧрысь Кедрон ӧр доры нуыса, Кедрон ӧр дорын сутӥз, пеньлы пӧрмытӥз но пеньзэ огшоры калыкез ватон шайвылэ сэрпалтӥз.7Азыса-калгыса улон коркаосты куашкатъяз, соос Кузё-Инмарлэн корка бордаз лэсьтэмын вал, – отын нылкышноос Астарталы дӥськут куыса улӥзы.
8Иудей городъёсысь вань вӧсясьёсты поттӥз, гурезь йылъёсысь вӧсяськон интыосты саптаз, Геваысен кутскыса Вирсавияозь со интыосын вӧсясьёс ӵындытъянъёс ортчытыло вал; капкаос азьысь вӧсяськонэз ортчытъян интыосты куашкатӥз, – город йырлэн Иисуслэн капкаяз пырон дорысьсэ но, кар капкалэн паллян паласьсэ но.9Гурезь йылъёсын вӧсясьёс Иерусалимысь Кузё-Инмарлэн курбон сётон интыяз курбон ӧз сётъялэ, нош вӧсям нянез агай-вынъёсын ӵош сиылӥзы.
10Енном пиослэн нёжалысьтызы Тофетэз саптаз: нокин но пизэ но, нылзэ но, Молохлы сӥзьыса, тыл вамен медаз ни потта шуыса.11Иудей эксэйёслэсь Кузё-Инмарлэн корказ пырон доры, Нафан-Мелех евнухлэн комнатаез вӧзы Фаруриме, пуктылэм шундылы сӥзем валъёссэс кулэтэм кариз; шундылы сӥзем ожмаськон уробоосты тылын сутӥз.12Ахазлэн комнатаезлэн липет йылаз Иудей эксэйёслэсь лэсьтэм курбон сётон интыоссэс, Кузё-Инмар коркалэн кыказ ик азбараз Манассиялэсь лэсьтэм курбон сётон интыоссэ эксэй куашкатӥз, отысь сэрпалтӥз но Кедрон ӧре куштӥз.13Иерусалим азьысь, Вӧйпугурезьлэн бурпалаз Израильысь Соломон эксэйлэсь лэсьтэм гурезь йылын вӧсяськонзэ, Сӥдонлэн юрӟым Астартаезлы, Моавлэн юрӟым Хамосэзлы, Аммонлэн юрӟым Милхомезлы сӥзем вӧсяськон интыосты эксэй саптаз.14Сульдэръёсты-идолъёсты пыргытъяз, вӧсяськон тыпы сурдъёссэс кораз, со интыосты адями лыосын тырмытӥз.
15Вефильысь курбон сётон интыез но, Израилез сьӧлыке пыртӥсь Нават пилэсь Иеровоамлэсь лэсьтэм гурезь йылын вӧсяськонзэ, – со курбон сётон интыез но, гурезь йылын вӧсяськонэз но куашкатӥз, пеньлы пӧрмытӥз, тыпы сурдэз сутӥз.16Иосия учкиз но отысь, гурезь бамалысь, шайгуосты адӟиз, шайгуосысь лыосты басьтыны ыстӥз, курбон сётон вылын сутӥз, сое саптаз. Тазьы быдэсмиз Кузё-Инмарлэн кылыз – та ужъёс сярысь Инмар адями азьвыл ик вераз вал, [соку, праздник дыръя, Иеровоам курбон сётон азьын сылэ вал. Собере берытскиз но та луоно ужъёс сярысь азьвыл ик верам Инмар адямилэсь шайгузэ адӟиз].17Соку Иосия шуиз: «Кыӵе таӵе та памятник, мае мон адӟисько?» Городын улӥсьёс солы шуизы: «Та Иудеяысь вуэм Инмар адямилэн шайгуэз, Вефильысь курбон сётон вылын мар тон лэсьтӥськод, со сярысь вераз».18Соку со шуиз: «Ас эрказ мед улоз, солэн лыосыз борды нокин но медаз йӧтскылы». Солэсь лыоссэ, Самарияысь вуэм пророклэсь лыоссэ утизы.
19Кузё-Инмарлэсь вожзэ поттылыса, Израиль эксэйёслэсь Самарияысь городъёсысь гурезь йылъёсы лэсьтылэм куяськон-вӧсяськон куалаоссэс но Иосия куашкатъяз, Вефильын кызьы кариз, таосыныз но озьы ик лэсьтӥз;20гурезь йылъёсысь вӧсясьёсты, отчы учырамъёссэ, ваньзэс вандӥз но курбон сётон интыын адями лыосты сутӥз, – ачиз соку Иерусалиме берытскиз.
21Эксэй вань калыклы косон сётыса шуиз: «Инмардылы Кузё-Инмарлы Пасха ортчытэ, кызьы та сӥзён книгаын гожтэмын», –22малы ке шуоно Израилез кивалтӥсь судьяослэн нуналъёссы дырысен, Израиль эксэйёслэн улон нуналъёсазы, Иудей эксэйёслэн улон нуналъёсазы, таӵе Пасха ортчытэмын ӧй ни вал;23нош Иосиялэн дас тямысэтӥ арзэ эксэйын пукон дыръяз Кузё-Инмарлы сӥзем таӵе Пасха Иерусалимын ортчытэмын вал.
24Кулэм муртлэсь духсэ ӧтьылӥсьёсты, син пӧртмасьёсты, терафимъёсты*а, сульдэръёсты, Иудей музъеме, Иерусалиме вуэм вань юрӟым макеосты Иосия быдтӥз Кузё-Инмарлэн коркасьтыз Хелкия архиерейлэсь шедьтэм книгаяз гожтэм законлэсь кылъёссэ быдэстон понна.25Солэсь азьвыл вань сюлмыныз, вань лулыныз, вань кужмыныз Моисей законъя, Кузё-Инмар пала берытскись, со кадь эксэй ӧй вал; со бӧрсьы но солы укшась эксэй ӧз ӝутӥськы.26Озьы ке но Сое вӧсь карись Манассиялэн лэсьтэм сьӧсь ужъёсыз понна Кузё-Инмар туж бадӟым вожпотонзэ, Иудея вылэ ӝуатскем йыркурзэ, ӧз вунэты.27Соку Кузё-Инмар шуиз: «Ас азьысьтым Иудеяез но сэрпалто, кызьы Израилез сэрпалтӥ, та быръем городме, Иерусалимез, сэрпалто, коркаез но, кудӥз сярысь Мон шуи вал: ”Отын Мынам нимы улоз”».
28Иосия сярысь, ваньзэ, мар со лэсьтӥз, Иудей эксэйёслэн книгаязы гожтэмын.29Солэн эксэйын пукон нуналъёсаз Египетлэн эксэез, Нехао фараон, Ефрат шур дуре Ассириялэн эксэезлы пумит ожен мынӥз. Иосия солэн пумитаз потӥз, нош соиз Иосияез адӟем бераз Мегиддонын сое вииз.30Солэн ляльчиосыз кулэм шӧйзэ Мегиддонысь нуизы, Иерусалиме вуттӥзы но шайгуаз ватӥзы. Та музъемысь калык кутӥз Иосиялэсь Иоахаз пизэ но атаез интые, вӧйын зырӟыса, эксэе пуктӥз.
31Эксэе пуксьыкуз, Иоахазлы кызь куинь арес вал, куинь толэзь ӵоже со Иерусалимын эксэй пуконын пукиз; анаезлэн нимыз Хамуталь, со Ливнаысь Иеремиялэн нылыз вал.32Азьвыл улэм атайёс кадь ик со Кузё-Инмар азьын ярантэм ужъёс лэсьтыса улӥз.33Нехао фараон ӝегатӥз сое Ривлае, Емаф музъеме, Иерусалимын со эксэй медаз луы шуыса, Иудея понна выт тырон понӥз – сю талант азвесь но [сю] талант зарни.34Нехао фараон эксэе пуктӥз Иосиялэсь Елиаким пизэ, Иосия атаез интые, солэсь нимзэ воштӥз – Иоаким кариз; нош Иохазэз кутыса Египетэ нуиз, отчы ик со кулӥз.35Иоаким фараонлы азвесь но, зарни но сётъяз; со музъемлы дунъет пуктӥз фараонлэн косонэзъя азвесь тырон понна; та музъем вылын котькуд улӥсьлэсь аслаз дунъямезъя со азвесь но зарни бичаз, сое Нехао фараонлы тырон понна.
36Эксэе пуксьыкуз, Иоакимлы кызь вить арес вал, со дас одӥг ар ӵоже Иерусалимын эксэйын пукиз; анаезлэн нимыз Зебудда, со Рума карысь Федаиялэн нылыз вал.37Азьвыл улэм атайёс кадь ик со Кузё-Инмар азьын ярантэм ужъёс лэсьтыса улӥз.
*а 23:24 терафимъёс – корка пушкын возиськись, мунёлы укшась сульдэръёс-идолъёс
Глава 23