Выбрать язык
Книги Ветхого Завета
Книги Нового Завета
с русским текстом1Пророк пиос Елисейлы шуизы: «Тани, милям тон дорын улон интымы ӝикыт милемлы;2Иордан шур дуре мыномы но котькудмы быдэн кор отысь басьтомы, отчы асьмелы улон инты лэсьтомы». Елисей шуиз: «Мынэлэ».3Одӥгез шуиз: «Куремме санэ пон: тон но ас ляльчиосыныд ӵош мын». Елисей шуиз: «Мыно».4Соосын ӵош мынӥз. Иордан дуре вуыса, писпуосты кораны кутскизы.5Одӥгезлэн, писпу погыртыкуз, тӥрез вуэ усиз. Со черектӥськыса шуиз: «Эй, кузёе! Со пунэмен басьтэмын вал!»6Соку Инмар адями шуиз: «Кытысен со усиз?» Соиз интызэ возьматӥз. Инмар адями писпу ваез ӵогыса отчы куштӥз но, тӥр ву вылэ лӧптӥз.7Со шуиз: «Басьты аслыд». Соиз кизэ мычиз но басьтӥз.
8Сириялэн эксэез Израильысь калык вылэ ожен урдскиз но, медоосыныз кенешыса, соослы шуиз: «Сыӵе но сыӵе интые мон аслым лагерь пукто».9Инмар адями Израиль эксэйлы тазьы вераны ыстӥз: «Со интытӥ эн ветлы, отчы Сирияысь ожгарчиос ватӥськизы».10Израильлэн эксэез со интые адямиоссэ ыстылӥз, кудӥз сярысь солы, чакласькыны косыса, Инмар адями вералляз; одӥг пол но кык пол гинэ ассэ отын ӧз утьылы со.11Та учыр пумысен Сириялэн эксэезлэн сюлмыз куалектӥз, ляльчиоссэ котыраз люкаса, соослы шуиз: «Вералэ мыным: кин асьмелэнъёс пӧлысь Израильлэн эксэеныз кусып возе?»12Медоосыз пӧлысь одӥгез солы шуиз: «Нокин но соин кусып уг возьы, эксэй кузёе; Израильлэн Елисей пророкез вань, со Израильлэн эксэезлы тынэсьтыд кӧлан комнатаяд верам кылъёстэ вера».13Со шуиз: «Мынэлэ, тодэлэ кытын со; мон адямиосме ысто но сое кутыса ваё». Солы ивор вуттӥзы: «Тани, со Дофаимын».14Отчы валъёсты, ожмаськон уробоосты, трос ожгарчиосты ыстӥз. Уйин лыктыса городэз котыртӥзы.
15Инмар адямилэн вӧзаз юрттӥськыса улӥсез ӵукна султыса кыре потӥз; тани, ожгарчиос городэз котыртӥллям, котыр валъёс, ожмаськон уробоос. Солэн медоез шуиз: «Э, кузёе, мар кароно асьмелы?»16Со шуиз: «Эн кышка, асьме пала пырисьёс тросгес, соос пала кариськисьёс сярысь».17Соку Елисей вӧсяськыса шуиз: «Кузё-Инмаре! Усьты вал солэсь синзэ, мед адӟысал». Соку Кузё-Инмар ляльчиезлэсь синзэ усьтӥз но со адӟиз: тани, быдэс гурезь вылын, Елисейлэн котыраз, пачылаз тылын пиштӥсь валъёс, тылын пиштӥсь ожмаськон уробоос.
18Со доры сири ожгарчиос мыныку, Елисей Кузё-Инмар азьын вӧсяськыса шуиз: «Синтэм-адӟисьтэм кар соосты». Елисейлэн курем кылызъя Со соосты синтэмесь-адӟисьтэмесь кариз.19Соку Елисей соослы шуиз: «Та со сюрес но, со город но ӧвӧл; ойдолэ мон сьӧры, утчано адямиды доры мон тӥледыз келяса мыно». Соосты Самарияе вуттӥз.20Соос Самарияе вуэм бере Елисей шуиз: «Кузё-Инмаре, соослэсь синзэс усьты, адӟыны мед быгатозы». Кузё-Инмар соослэсь синзэс усьтӥз но, соос адӟизы, Самариялэн шораз вуиллям шуыса.
21Соосты адӟыса, Израильлэн эксэез Елисейлы шуиз: «Атае, соосты виылоно ӧвӧл-а?»22Со шуиз: «Эн виылы. Виён понна шат тон соосты аслад меченыд, аслад пукыӵеныд кутылӥд? Соослы сиыны нянь, юыны ву ӵекты, собере соос асьсэлэн кузёзы доры мед мынозы».23Соослы бадӟым сиён-юон дасяз, соос сиизы, юизы. Собере соосты кошкыны лэзиз, соос кунзылэн йырыз доры мынӥзы. Сириялэн та уллёосыз азьло-берло Израиль музъеме ожен ӧз ни ветлэ.
24Та бере Сириялэн Венадад эксэез аслэсьтыз вань ожгарчиоссэ люказ но мыныса Самарияез котыртӥз.25Соос Самарияез котыртыса возьыку, отын туж курадӟыса сютэм улон нуналъёс вуизы, ишаклэсь йырзэ гинэ но тямыстон азвесь сӥклен вузаллязы, кабезлэн ньылетӥ люкетэз мында*а дыдык сӥть вить азвесь сӥклен вузаллязы.
26Одӥг пол Израиль эксэй карлэн борддор вылтӥз ортчон дыръя солы кышномурт бадӟым куараен вазиськиз: «Эксэе, кузёе, юртты».27Эксэй шуиз: «Тыныд Кузё-Инмар ӧз ке юртты, кытысь, маиным тыныд юрттом? Кутсаськон итымысьтым-а, вина нюртон гуысьтым-а?»28Эксэй солы шуиз: «Мар тыныд?» Кышномурт шуиз: «Та кышномурт мыным шуиз: ”Вай мыным пидэ, туннэ сое сиёмы, нош мынэсьтымзэ пиме ӵуказе сиёмы”.29Мынэсьтым пиме пӧзьтӥмы но сиимы. Мукет нуналэ кышномуртлы шуи: ”Вай ук тон но пидэ, сиёмы”, нош со пизэ ватӥз».30Кышномуртлэсь верамзэ кылзэм бераз эксэй дӥськутсэ ӵыжак кесиз; со борддор кузя ортчиз, калык адӟиз, солэн мугор вылаз бышкись ӟустари дӥськут дӥсямын шуыса.31Со шуиз: «Инмар мыным сое но сое мед лэсьтоз, эшшо тросгес мед лэсьтоз, Сафатлэн Елисей пиезлэн туннэ нуналын йырыз быдэс кылиз ке».
32Нош Елисей аслаз корказ пукиз, пересь визьнодчиос со котырын пукизы. [Эксэй] ас дорысьтыз адямиез ыстӥз. Ыстэм муртлэн вуэмезлэсь азьло со пересь визьнодчиослы шуиз: «Адӟиськоды-а, адями виисьлэн пиез мынэсьтым йырме ӵогыса басьтыны ыстӥз? Учкелэ, ыстэм мурт лыктӥз ке, ӧсэз ворсалэ, ӧстӥ пырыны эн лэзе. Тӥни, со бӧрсьы лыктӥсь кузёезлэн пыд куараез но кылӥське ини».33Со соосын вераське на вал, но, тани, ыстэм мурт со доры вуыса шуэ: «Тани кыӵе шугадӟон вуиз Кузё-Инмар дорысь! Азьпалаз Кузё-Инмар дорысь мар мыным возьмано на?»
*а 6:25 кабезлэн ньылетӥ люкетэз мында – ог 500 грамм
Глава 6