Выбрать язык
Книги Ветхого Завета
Книги Нового Завета
с русским текстом1Сирияысь эксэйлэн ож ужен кивалтӥсез Нееман кузёез понна быдӟым адями вал, гажамон мурт, уго со пыр Кузё-Инмар Сирияысь калыклы вормон сётӥз; та адями туж усто ожгарчи вал, но гижлочерен висись вал со.2Огпол Сирияысь ожгарчиос люкаськыса Израиль музъеме мынӥзы но отысь пичи нылэз кутыса пленэ вайизы, со Нееманлэн кышноезлы юрттӥськыса улӥз.3Пичи ныл кузё кышноезлы шуиз: «Э, мынам кузёе Самарияысь пророк доры ветлысал ке, со солэсь гижлочерзэ быдтысал!»4Соку Нееман кузёез доры мыныса шуиз, Израиль музъемысь пичи ныл тазьы но тазьы шуэ.5Сириялэн эксэез [Нееманлы] шуиз: «Мын, ветлыса утча, нош мон Израильлэн эксэезлы гожтэт ысто». Со мынӥз но ас бордаз дас азвесь талант кутӥз, куать сюрс зарни сӥкль, дас пумо воштос дӥськут басьтӥз.6Израильлэн эксэезлы гожтэт вайиз, отын верамын вал: «Та гожтэтэн ӵош аслэсьтым медоме, Нееманэз, ыстӥсько, тон солэсь гижлочерзэ мед быдтод вал».7Израильлэн эксэез гожтэтэз лыдӟем бере выль дӥсьсэ ӵажак кесьыса шуиз: «Мон Инмар-а, виыны но, улӟытыны но быгатӥсько-а, малы со мон доры адямиез ыстэ, солэсь гижлочерзэ мед быдтом шуыса? Тани, табере тодэ, чаклалэ: монэн тушмонъяськыса улыны со муг утча».8Инмарлэн адямиез, Елисей, кылӥз, Израильлэн эксэез вылысьтыз дӥсянзэ ӵажак кесиз шуыса, соку со эксэйлы вераны ыстӥз: «Малы тон вылысьтыд дӥсяндэ кесид? Со мурт мон доры мед лыктоз но мед тодоз, Израильын пророк вань шуыса».
9Соку валъёсыныз ожмаськон уробо вылаз Нееман вуиз но Елисейлэн корказ пырон доры дугдӥз.10Со доры Елисей медозэ тазьы вераны лэзиз: «Мын, Иорданын сизьым пол мисьтӥськы, мугорыд выльмоз, чылкыт луод».11Нееман йыркурен пурӟиз но мыныса шуиз: «Тани, мон малпасько вал, со потоз но Инмарезлэн Кузё-Инмарлэн нимызлы вазиськоз, соку гижлочерелэн яра вылаз кизэ поноз но висёнме басьтоз шуыса.12Дамаскысь Авана но Фарфар шуръёс Израильлэн вань вуосызлэсь умоесьгес ӧвӧл-а? Со шуръёсын мисьтӥськыны но чылкытаны ӧй быгатысал шат?» Берытскиз но йыркуръяськыса кошкиз.13Ляльчиосыз, дораз лыктыса, солы шуизы: «Атай, пророк тыныд маке но кулэзэ верасал ке, тон сое ӧй быдэстысалыд-а? Уката ик, куке со тыныд тазьы гинэ шуиз: ”Мисьтӥськы, чылкыталод”».14Соку Нееман мынӥз но, Инмар адямилэсь верамзэ кылзӥськыса, Иордан вуэ сизьым пол зымиз. Соку солэн мугорыз пичи нунылэн кадь выльмиз, чылкытаз.
15Со но, бӧрсяз ветлӥсьёс но Инмар адями доры берытскизы; лыктыса Елисей азе султӥз, солы шуиз: «Тани, табере мон тодӥ, быдэс дунне вылын Израильлэн Инмарез кадь инмар ӧвӧл. Табере ляльчиедлэсь ваем саламзэ-кузьымзэ кут».16Инмар адями шуиз: «Улэп Кузё-Инмар, Кинлэн азяз мон сылӥсько! Саламдэ-кузьымдэ уг куты». Нееман сое ёртӥз, басьтыны косыса, нош соиз соглаш ӧз луы.17Соку Нееман шуиз: «Тазьы ке ӧвӧл, соку ляльчиедлы кык мулэн нуыны вормымон сюй мед сётозы, малы ке шуоно тынад ляльчиед азьланяз Кузё-Инмарлы сяна, мукет инмаръёслы тылын сутӥськись но, мукет курбонъёс но уз ни сётылы.
18Тани мар дыръя гинэ Кузё-Инмар ляльчиедлы сьӧлык медаз гожты: куке мынам кузёе Риммонлэн корказ йыбырттыны мынӥз ке, мынам ки вылам пыкиськиз ке, мон Риммонлэн корказ йыбыртто, – соку Риммонлэн корказ йыбырттэме понна Кузё-Инмар та учыре ляльчиедлы простить мед кароз».19Солы шуиз: «Каньылэн берт». Со дорысь кӧня ке вамышлы кошкиз.
20Инмар адямилэн, Елисейлэн, Гиезий медоез шуиз: «Тани, мынам кузёе Сирияысь лыктэм Нееманлэн киысьтыз ваем саламзэ-кузьымзэ басьтыны соглаш ӧз луы. Улэп Кузё-Инмар! Со бӧрсьы бызьыса мыно но солэсь марзэ ке но басьто».21Соку Гиезий Нееман сьӧры уйиськыса мынӥз. Бӧрсяз бызьыса лыктӥсь муртэз Нееман адӟиз но, ожмаськон уробоысьтыз васькыса, солэн пумитаз лыктыса шуиз: «Ӟеч малпанэн-а?»22Со шуиз: «Ӟеч малпанэн; кузё тазьы вераны ыстӥз: тани, Ефрем гурезьысь кык егит пиос мон доры лыктӥзы, пророк пиос пӧлысь соос; соослы азвесь талант но кык воштос дӥськут сёт».23Соку Нееман шуиз: «Басьты кык азвесь талант». Со Гиезийлэсь ёртыса куриз. Со кык азвесь талантэз кык пуйые поныса думылӥз, кык воштос дӥськутсэ кык ляльчиосыз кие сётӥз, соосты солэн азьтӥз нуизы.24Вырйыл доры вуэм бераз соослэн киысьтызы соосты басьтӥз но корказ ватӥз. Адямиосты кошкыны лэзиз, соос кошкизы.25Гиезий татчы вуыса, кузёез азе султэм бере, Елисей солы шуиз: «Кытысен тон татчы вуид, Гиезий?» Соиз шуиз: «Тынад ляльчиед нокытчы но ӧз ветлы».26Со солы шуиз: «Мынам сюлмы тонэн ӵош ӧз мыны-а, куке ожмаськон уробоысьтыз тынад пумитад со адями вазиськиз? Али сыӵе дыр шат, азвесь октыны, дӥськут, вӧйпуосты, виноград бакчаосты, векчизэ но, тазазэ но пудоез, ляльчи пиосты, ляльчи нылъёсты октон-калтон дыр шат?27Нееманлэн гижлочерез тон борды, тынад выжыед борды вань вакытъёс ӵожелы мед лякиськоз». Со дорысь со, гижлочерен висеменыз, лымы кадь тӧдьы луыса потӥз.
Глава 5