Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 5

Иисус тердьсыне васенце тонафнихнень

(Матф. 4:18-22; Марк 1:16-20)

1Весть Иисус ащесь Геннисарет эрьхкть трваса. Ломаттне эцезь эцесть Тейнза Шкаень валть кулхцондома.2Иисус няйсь эрьхкть трваса кафта венчт, а калонь кундайхне оргалязь кундамаснон венчснон ваксса.3Иисус озась фкя венчти, кона Симононнель, и эняльдсь тейнза аф ламода аердомс трвать эзда. Венчса озада Сон тонафтсь ломаттнень эса.

4Мзярда аделазе, мярьгсь Симононди: «Паньк венчть крхка вастс и ёрдасть калонь кундамантень ведти».5Симон каршезонза мярьгсь: «Тонафты, минь покодеме веньберьф и мезевок ашеме кунда. Аньцек Тонь валцень инкса ёрдасайне калонь кундаматнень».6Синь тяфта и тисть – и кундасть сняра кал, мянь калонь кундамасновок кармасть сязендевома.7Синь яфчазь кядьснон омбоце венчста ялгаснонды, тердезь лездома. Сят састь, и пяшкодезь калса кафцьке венчнень сяшкава – нльне кармасть ваяма.8Тянь няемста Симон Пётр прась плманжа лангс Иисусонь инголи и мярьгсь: «Азор, архт маластон! Мон ломанць пежуван».9-10Симононь и мархтонзотнень – ётксост Зеведеень цёранза Иаков и Иоанн, тя Симононь ялганза – пяк эвфтезень тняра калонь повомась. Иисус мярьгсь Симононди: «Тят пеле; тя пингста сявомок кармат ломанень кунцема».11Синь таргазь кафцьке венчнень эрьхке трвати, кадозь семботь и тусть Иисусонь мельге.

Иисус пчкафтсы наксафты урмаса сярядить

(Матф. 8:1-4; Марк 1:40-45)

12Мзярда Иисус ульсь фкя ошса, Тейнза сась ломань, кона марнек вельхтяфоль наксафты урмаса. Иисусонь няемста сон прась инголенза плманжа лангс и эняльдезь корхтазевсь: «Азор, Тейть аруяфтован, улеза мяльце».13Иисус венептезе кяденц, токафтозе сярядити и мярьгсь: «Ули мялезе, аруяк». Эстокиге наксафты урмась кадозе ломанть.14Иисус кошардозе сонь киндинге тянь колга аф азондомс, и мярьгсь: «Архт няфтть пря озксвятити и Моисеень коенц коряс кантт озксказне аруяфтомацень инкса. Тянь вельде тейст няфтьсак пчкамацень».

15И нинге сяда пяк срадсть кулятне Иисусонь колга, и ламодонга лама ломань сашендсь кулхцондомонза и урмаснон пчкафтома.16Но Иисус сидеста тушендсь шава вастс и тоса озондсь.

Иисус пчкафтсы параличса колафть

(Матф. 9:1-8; Марк 2:1-12)

17Весть, мзярда Иисус тонафтсь, пуромфнень ёткса озафтольхть фарисейхть и койти тонафтыхть, конат састь Галилеянь и Иудеянь сембе васттнень эзда, Иерусалимстонга. Азорть виец Иисусть эсоль, сясы Тейнза пчкафтовсть сярядихне.18Вов мзярошка алят кандсть ацам лангса параличса колаф ломань, конань ёрасть сувафтомс куду и путомс Иисусонь инголи.19Ломаньда пяк ламоль и синь ётковаст ашесть ётав. Эста алятне куцсть кудбряв, сязезь вельхксть и нолдазь сярядить ацамнек кудгучкати Иисусонь инголи.20Иисус няезе синь кемамаснон, мярьгсь сярядити: «Тонь пежетне нолдафт».

21Койти тонафтыхне и фарисейхне кармасть арьсема: «Кие тяфтамсь, кона пеедьсы Шкайть? Шкайда башка, кинди нолдавихть пежетне?»22Иисус содазень синь арьсемаснон, мярьгсь: «Мезе тинь арьсетяда седисонт?23Мезсь сяда тёждя азомс: "Тонь пежетне нолдафт" али азомс "Стяк и якак"?24Но тяни содасть: Ломанень Цёрать ули азорксшиц модать лангса нолямс пежет», – и пшкядсь параличса колафти: «Корхтан тейть: стяк, сявк ацамцень и архт эсь кудозт».

25Ся эстокиге стясь сембонь сельминголе, сявозе ацамонц, конань лангса кандозь и, Шкайть шназь, тусь кудозонза.26Сембе вельф абондсть, шназь Шкайть. Эводембачк корхтасть: «Тячи минь няеме тев, конанди стака кемамс».

Иисус тердьсы Левиень

(Матф. 9:9-13; Марк 2:13-17)

27Тяда меле Иисус лиссь и няезе Левиень, каяфксонь кочкайть. Сон озадоль каяфксонь кочкама кудть ваксса. Иисус мярьгсь тейнза: «Мольхть Монь мельган».28Левий кадозе семботь, стясь и тусь Иисусонь мельге.

29Сяльде Левий эсь кудсонза тись Тейнза оцю каваняма. Тоса ламоль каяфксонь кочкайда и лия ломаньда. Синь симсть-ярхцасть марса Левиень и Иисусонь мархта.30Фарисейхне и ёткстост койти тонафтыхне изгордозь корхтасть Иисусонь тонафниензонды: «Кода тинь сиптяда-ярхцатада каяфксонь кочкайхнень и лия пежуфнень мархта?»31Иисус мярьгсь каршезост: «Пчкафтысь эряви аф шумбрати, а сярядити.32Мон сань пежуфнень Шкайти шарфтоманкса, а аф видексшиса эряйхнень».

Кизефкс постонь кирдемать колга

(Матф. 9:14-17; Марк 2:18-22)

33Синь каршезонза мярьгсть: «Иоаннонь тонафниенза сидеста поставайхть и озондыхть; стане фарисейхнень тонафнисновок, ина Тоннетне симихть-ярхцайхть!»34Иисус мярьгсь тейст: «Кали кошардовихть поставама рьвяяма илань инжихне, мзярда рьвяяйсь мархтост?35Аньцек сайхть шит, мзярда сявсазь кядьстост рьвяяйть, вов эста, ся шитнень, синь кармайхть поставама».

36Иисус азондсь тейст тяфтама валвеляфкс: «Кивок аф панни ташта щамти од щамста сязьф панкс; афток одтьке сязендьсы, ташттинге од панкссь аф педи.37Кивок аф кайси од вина кедень ташта кяскавс; каяндяряй – од винась сязендьсыне кяскафнень, винаське шуди, кяскафневок юмайхть.38Од винась кайсема од кяскавга.39Симондяряй кие сире винада, сянь аф ули мялец симомс одта; сон мярьги: сиресь сяда цебярь».


предыдущая глава Глава 5 следующая глава