Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
КРИСТОССЬ – ВИНОГРАДОНЬ ПОЧКЕ
Колма кизот Исус Кристос тонафтсь модать лангса, пчкафнесь сярядихть, азондозе Евангелиять – пара кулять. Шкаень тя тевти аноклазень эсь тонафниензонга. Вов кода Исус тонафтозень синь:
«Мон афкуксонь виноградонь почкан, Алязе виноградонь касфты. Эрь тараткязень, кона аф канды имож, керсы, а кона канды, сянь ароптсы, сядонга лама кандоза. Тинь ароптфтада ни валть вельде, конань азондыне тейнть. Уледа эсон, эста монга улян тиньцонт. Вдь башка тарадсь аф канды имож, аф улендяряй почкть лангса. Тяфта тиньге мезевок аф тиефтяда, аф улендярятада монь эсон.
Мон почксь, тинь тараттне. Кие эряй моньцон, монга эсонза, ся канды лама имож. Моньфтомон тейнть мезевок аф тиеви. Кие аф ули моньцон, ёрдави шири тарад лаца, и коськи. Тяфтама тараттнень кочксесазь и ёрясазь толти, синь палыхть. Улендярятада тинь эсон и валневок эсонт, эста анада мезе мяленте, максови тейнть...
Кода Алязе кельгсамань, стане монга кельктядязь; уледа кельгомасон. Ванфтондярясасть кошардомвалнень, ульхтяда кельгомасон, кода мон ванфтыне Алязень кошардомвалонзон и эрян сонь кельгомасонза... Тянь тиема кошарттядязь тиньге: кельгода фкя-фкянь...
Кда тя масторлангсь тинь сельмосонга афоледязь няе, содасть: монь тиндедонт инголе афолемазь няе. Улендяряледе тинь тя масторлангть эзда, эста масторлангсь кельголезе сонценнеть. Но тинь аф тя масторлангть эзда, вдь мон кочкадязь эстейне масторлангста, и сяс тя масторлангсь афоледязь няе тинь. Кда панцемазь монь, кармайхть панцемонт тиньге; кда монь валозень ванфнезь, кармайхть ванфтомонза тиннетьке. Семботь тянь ломаттне тисазь тейнть монь лемозень инкса, сяс мес аф содасазь Кучиезень. Кда мон афолень са тя масторлангу и афолень корхта мархтост, эста синь улельхть аф муворуфт. Но тяни тейст аш кода лувомс пряснон видекс. Ся, кие монь афолемань няе, ся Алязеньге афолезе няе».
ИОАНН 15:1-7, 9-10, 17-23
408 
