Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИОНА ШКАЙМАРЯЙСЬ
Азорсь весть мярьгсь Иона шкаймаряйти: "Стяк, архт Ниневия оцю ошу и мярьк тейнза: Азорсь няйсыне кальдяв тефнень и пантфтсы шумоцень." Иона ёрась ворьгодемс Азорть сельмингольде. Сон пачкодсь Иоппияв, мусь тоса Фарсису моли оцювенч, пандсь уеманкса и сувась венчти.
Аньцек Азорсь эстокиге кучсь вии варма, кеподсь сяшкава вишке давол, нльне срафтокшнезе оцювенчть. Венчень вятихне эводсть, эрьсь кармась эняльдема эсь шкаенцты. Оцювенчть тёждялгофтоманкса ушедсть ёрямост ведти паршиснон. Иона ся пингть кемоста удось. Венчстотне жерьбань ёрдазь содазь – вайсихть Ионань инкса. Эста мярьгсть тейнза: "Мезе мархтот тиема?" Сон каршезост: "Ёрдамасть оцюведти и сон сетьми". Ионань ёрдазь оцюведти, ведсь эстокиге ацяндсь. Эста венчстотнень сявозень оцюдонга оцю пелема Азорть эзда. Синь кандсть тейнза озказне и макссть вал фалу кемамс тейнза.
Шкайсь кошардозе кабаконашка калть нилемс Ионань. Колма шит и колма вет сон калть потмосоль, сембе тя пингть апак лотксек озондсь Азорти, Шкаенцты. Азорсь мярьгсь калти ёрдамс Ионань модать лангс.
Азорсь омбоцеда мярьгсь шкаймаряйти: "Стяк, архт Ниневия оцю ошу и тонафтт эсонза, кода мон кошардыхтень". Тяни Иона кулхцондозе Азорть и тусь Ниневияв. Пачкодсь тоза и кармась ошень курнятнень эса тонафтома, корхтась: "Нинге нильгемонь шит, и Ниневиясь ули срафтф". Ниневиянь оцязорсь тянь кулемста кадозе кудонц, ёрдазень лангстонза оцязоронь щамонзон, щась калмамань равжа щам. Сон мярьгсь пачфтемда марнек ломаньтналти: "Сембе ломаттненди и ракшатненди аф ярхцамс, аф симомс. Аф нолямс ракшатнень ванома вастс. Сембе ломаттненди щамс равжа щамса, равжа котфса вельхтямс ракшатненьге. Псиста тердемс Шкайть, катк шарфты ширезонк. Катк эрьсь полафтсы эряфонц и лоткай пежетень тиендемда. Пади эста ляпоми Шкайть седиец и аф кулофтсамазь".
Мзярда Азорсь няезе, ломаттне аердсть кяжи тевснон эзда, сон ашезь куче лангозост зиян.
ИОНА ШКАЙМАРЯЙТЬ КНИГАЦ 1-4
274 
