Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ПОЛОНЦТА ЕВРЕЙХНЕНЬ МРДАМАСНА
Вавилононь вии мастортьке меколи сась пец. Сонь сявозь мидияннетне, сяльде 593 кизоня персияннетне. Курокста Кир персиянь оцязорсь нолдазень еврейхнень меки атянь-авань масторозост: «Тяфта корхтай Кир, персиянь оцязорсь: "Модалангонь сембе масторхнень тейне максозень Азорсь, Менелень Шкайсь. Сон кошардомань путомс тейнза куд Иудань Ерусалиму. Сембе, кит Шкайть ломаньтналонц ёткста, катк молихть Иудань Ерусалиму, Азорти, Израилень Шкайти кудонь стяфтома. Улеза мархтост Шкайсна.» Атянь-авань масторозост мрдась нильгемонь тёжяньда лама еврей, ламосна иудейхть, лиякс мярьгомс, Иудань тарадста ломатть. Сяка лама еврейда лядсь персиянь мастору.
Мрдамдост меле омбоце кизоня израилень ломаттне пуромсть Ерусалиму и срхкасть одукс стяфтомс Азорть калафнеф кудонц, путсть од шкайкудонди кудъюр. Ламоц сире озксвятихне, левиеннетне и юромонь прятне, кит няендезь ингольдень шкайкудть, кудъюрть путомста кайгиста авардсть. А ламотне кенярдезь юватькшнесть. И ашезь явфнев ломаньтналти кенярдемань юватькшнематне авардемать эзда; вайгяльсновок кулевсь ичкози. Зоровавель, Ехония Иудань оцязорть унокоц, ульсь вятикс тя шкайкудть стяфтомста. Но ломаньтналхне, кит састь эряма израилень ломаттнень ингольдень модазост, афолезь няе еврейхнень, шорясть шкайкудть путоманцты. Эвфнезь путыхнень и муворгофнезь персиянь оцязорть Артаксерксонь инголе. Тейст кирдевсь шкайкудонь тиема тефнень кеветие кизос – персиянь од оцязорть, Дариянь, самс.
Аделафоль шкайкудть путомац Дариень оцязорондаманц котоце кизоня.
ЭЗДРА 1-6
240 
