Выбрать язык
Книги Ветхого Завета
Книги Нового Завета
с русским текстом1Иов ответ сётыса шуиз:
2«Сак кылзэ мынэсьтым верам кылъёсме,
таин ке но тӥ монэ буйгатоды.
3Чидалэ монэ, мон верало;
нош вераськем берам серекъялэ-мыскылляське.
4Адямиос вылэ шат мынам чагиськонэ?
Кызьы нош мон ӝоже уг усьы?
5Мон шоры учкыса кышкатске, ымдэс ворсалэ.
6Ӧжытак гинэ тодам вайисько но соку ик зурак куалектӥсько,
мугоры куалекъяны кутске.
7Малы законлы пумит мынӥсьёс уло, пересьмон арлыдазы вуо,
кужмынызы но юнэсь?
8Нылпиоссы соослэн азязы уло,
нылпиоссылэн нылпиоссы син азязы сыло.
9Соослэн коркаоссы кышкаса улонлэсь утемын,
Инмарлэн корт бодыез но соос вылын уг улы.
10Соослэн ошсы кидыссэ сётэ – уг пазьгы,
скалзы кунян ваёно луэ – уг кушты.
11Пудо уллёез кадь асьсэлэсь пичиоссэс соос потто,
соослэн пиналъёссы но тэтчало.
12Тимпан, цитра шудыса черекъяло,
чипчирган шудыса шулдыръясько;
13шудо-шудбуро уло, со виын ик дуннелэн пыдэсаз лэзисько.
14Нош асьсэос Инмарлы шуо: ”Кошкы ми дорысь,
Тынэсьтыд сюресъёстэ милям тодэммы уг поты!
15Кин со сыӵе Дунне Кутӥсь, ми Солы служить мед карысалмы?
Солы вазиськид ке но, мар пайдаез?”
16Адӟиськод, соослэн шудбурзы ки бордысьтызы потэмын ӧвӧл.
– Сьӧлыклэсь кышкасьтэмъёслэн кенешсы мынэсьтым кыдёкын лу!
17Ӵем дыръя-а законлы пумит улӥсьёслэн югдытӥсь макезы кысэ,
соос доры куректон-кайгу вуэ но Со соослы люкетлы
Аслаз вожпотон дыръяз курадӟон сётэ?
18Тӧл азьысь куро кадь, сильтӧлэн ӝутыса нуэм тӧлбер кадесь
соос луыны кулэ.
19Шуод: солы пунэмзэ берыктон понна Инмар
солэн нылпиосызлы шудтэм учыръёс дасяса возе.
– Солы аслыз Инмар пунэмзэ мед берыктоз,
тае со ачиз ас вылаз чидано мед луоз.
20Шудтэм учыре сюронзэ со ас синъёсыныз мед адӟоз,
Дунне Кутӥсьлэсь вожпотон виназэ со ачиз мед юоз.
21Улонэзлэн берпум толэзьёсыз-нуналъёсыз вуо ке,
кызьы со сюлмаськоз на юртъерез, семьяез сярысь?
22Инмарез-а визьлыклы дышетод, вылӥысьёсты но судить карисез?
23Одӥгез кулэ пачыл кужымез вань на дыръя каньылэн,
кышкатэк-куалекъятэк;
24пушсэ быдэсак кӧй басьтэм, лыосыз виымен тырмемын.
25Нош мукетыз ӝожлык пӧлын улыса кулэ, ӟечез адӟытэк.
26Нош соос кыксы но сюйын кыллёзы, нумыръёс соосты поръялозы.
27Тодӥсько мон тӥлесьтыд малпанъёстэс, кескич ужъёстэс,
соосты тӥ мыным пумит пунӥськоды.
28Тӥ шуоды: ”Кытын кивалтӥсьлэн коркаез,
кытын законлы пумит мынӥсьёслэн улэм тылыссы?”
29Сюрес вылын мынӥсь-ветлӥсьёслэсь тӥ ӧд юалэ шат,
соослэн чаклан-учкылонъёсынызы но ӧд тодматске-а?
30Кулон-бырон нуналэ лек мурт жалямын луэ,
нош вожпотон нуналэ палэнэ нуэмын шуыса ӧд тодэ-а?
31Кин сое улон сюресэз понна пыкылоз,
кин солы лэсьтэм ужезъя пунэмзэ берыктоз?
32Шайвылозь сое келяло но шайгу вылаз возьмаськись пукто.
33Со вылэ тырем нёжаллэн бадӟымесь сюй комокъёсыз
секытэсь ӧвӧл,
со бӧрсьы калык уллёен мынэ, нош солэн азьпалаз мынӥсьёс –
лыдъянтэм трос.
34Нош тӥ монэ юнме гинэ буйгатыны уд ӧдъяське-а?
Пӧяськыса гинэ тӥ монэн вераськиськоды».
Глава 21