Выбрать язык
Книги Ветхого Завета
Книги Нового Завета
с русским текстом1Феманысь Елифаз ответ сётыса шуиз:
2«Инмарлы пайда сётыны адями быгатэ шат?
Валась мурт аслыз ачиз пайда вае.
3Тон шонер улӥсь шуыса, Дунне Кутӥсьлы мар ӟечез?
Аслэсьтыд сюресъёстэ тон дун-шектэм возиськод шуыса,
луоз-а Солы пайдаез?
4Тынэсьтыд кышкаса-а, Со тонэн ӵошатскыны кутскоз,
тонэн Со судэ пыроз-а?
5Зэм, туж бадӟым тынад вожпотонэд,
законлы пумит улонэд но мертаны луонтэм бадӟым.
6Ас агай-вынъёсыдлы залог тырытыса пунэмен сётылӥд,
кесяськем дӥськутэн ветлӥсьёсты пунэм тыронзы понна
гольык кельтылӥд.
7Сюэз куасьмыса каньсырамез вуэн ӧд секта,
сютэмлы няньдэ ӧд сётылы;
8нош кужымо адямилы тон музъем сётылӥд но,
нимо-дано адями отчы улыны интыяськылӥз.
9Палкышноосты номыртэк тон келялляд,
анайтэм-атайтэм пиналъёсты но тырттэм киын кельтылӥд.
10Со понна тонэ кыӵесъёс котыртӥзы,
малпамтэ шорысь вуэм бадӟымесь кышканъёс лыктыса,
тонэ бугыртӥзы,
11оло, пеймытлыкын улыса, тон номыре но уд ни адӟиськы?
Бадӟым вуос тонэ шобыртӥзы.
12Инъёслэсь вылӥынгес ӧвӧл-а Инмар?
Учкы вылӥе кизилиос шоры, макем соос вылӥын!
13Но тон шуиськод: ”Инмар мар тодэ?
Пеймытлык пыр быгатэ-а Со судить карыны?
14Пилемъёс – Солэн катанчиосыз, Со уг адӟы,
нош ветлэ инлэн котырестӥз гинэ”.
15Вашкала аръёсы законлы пумит улӥсьёслэн ветлэм
сюрес вылазы, оло, тон возиськиськод шат?
16Соос дырызлэсь вазь быдтэмын вал
улон интызылэн инъет улаз ву тудӟыса пырем бере.
17Соос Инмарлы шуылӥзы: ”Ми дорысь кошкы!”
Дунне Кутӥсь соослы мар кароз?
18Соослэсь коркаоссэс Со ваньбурен тырмытылӥз.
Сьӧлыклэсь кышкасьтэмъёслэн кенешсы, матам но эн лыкты!
19Шонер улӥсьёс тае адӟыса шумпотылӥзы,
дун-шектэм мурт соосты серекъялляз:
20”Милям тушмонмы быдтэмын,
соослэсь кылем ваньбурзэс тыл ньылӥз”.
21Инмарлы матэ кариськы ук – каньыллыко улод;
та пыр тон доры ӟечлык вуоз.
22Инмарлэсь сётэм законзэ кабыл басьты,
Солэсь кылъёссэ аслад сюлэмад пон.
23Дунне Кутӥсь пала тон берытскид ке,
соку Со нош ик улондэ ӟеч пала берыктоз,
законлы пумит улонлэсь палэнскод,
24чилясь кортэз сюй-тузон шуыса лыдъялод,
Офирлэсь зарнизэ – ву ӧрысь из шуод.
25Дунне Кутӥсь тынад зарниед, чилясь азвесед луоз,
26уго соку Дунне Кутӥсь тынад шумпотонэд луоз,
Инмар пала ымнырдэ ӝутод.
27Вӧсяськод Солы но, Со тонэ кылоз,
аслэсьтыд сӥзиськемъёстэ тон быдэстод.
28Мае ке лэсьтыны мылкыд карид ке, соид тынад быдэсмоз,
сюресъёсыд вылын югыт пиштыса улоз.
29Куке но кинэ ке но ултӥяло ке, тон шуод: ”Ӝутске!”
Йырзэ ошыса улӥсь муртэ Со утёз,
30янгышо луись муртэ но мозмытоз,
чылкытлыко киосыд пыр со утиськоз».
Глава 22