Выбрать язык
Книги Ветхого Завета
Книги Нового Завета
с русским текстом1Наамитысь Софар ответ сётыса шуиз:
2«Мынам малпаськонъёсы монэ ответ сётыны лӧпкыто но
мон дыртӥсько соосты вераны.
3Монэ сантэмась пыкылонэз мон кылзӥськи,
нош мынам валан сётӥсь духе мон понна ответ сётоз.
4Тон уд тодӥськы шат, дауръёс кутсконысен ик,
музъем вылэ адямиез пуктэм дырысен ик, –
5законлы пумит улӥсьёслэн шулдыръяськонзы
вакчи дыр гинэ кыстӥське,
чеберъяськисьёслэн шумпотонзы
одӥг минутлы гинэ сётӥське шуыса?
6Солэн бадӟымлыкез инмозь ке но будӥз,
солэн йырыз пилемъёс борды ке но йӧтӥз,
7аслаз сӥтез кадь пумтэм дауръёс ӵожелы со ышоз-быроз;
азьвыл сое адӟемъёс шуозы: ”Кытын со?”
8Ум кадь со лобӟоз но, уз шедьтэ сое; уйвӧт кадь ышоз-быроз.
9Сое адӟем син улэ со уз ни сюры, солэн интыез сое уз ни тодма.
10Солэн пиосыз кураськисьёс азьын тэрытскыса улозы,
соослэн киоссы солэсь лушкамзэ берыктозы.
11Солэн лыосыз егит дыр сьӧлыкъёсыныз пачылмемын,
соин валче соос сюе выдозы.
12Солэн ымаз уродлык ческыт потэ ке,
сое со кыл улаз ватыса возе ке,
13уте, уг но кушты сое, ялан ым пушказ возе ке,
14соку солэн та сиёнэз кӧтпушказ сюро кыйлэн сэпезлы пӧрмоз.
15Ньылэм ваньбурзэ ӧскыса поттоз:
Инмар сое солэн пушкысьтыз поттыса куштоз.
16Кыйлэсь ядзэ со сюпсе; сое ехидналэн кылыз виёз.
17Солы уз кылды адӟыны чечыен, йӧлын бызись ӧръёсты, шуръёсты!
18Ужаса люкам узырлыкез берыктоз, уз ньылы;
люкам ваньбурезъя ик дун тыронэз но луоз, нош со шум уз поты.
19Уго со зӥбыса возиз, куанеръёсты уллялляз,
асэныз пуктылымтэ коркаосты киултылӥз;
20кӧт тыронэз ӧз тодылы, сукъяськыкуз номыре но ӧз жаля.
21Солэн кӧттырмостэм лулпушкызлэсь номыр но
ватӥськыны ӧз быгатылы,
со понна ик солэн шудбурез кема уз улы.
22Пачыл ваньбур пӧлаз солы ӝикыт луоз;
котькудӥзлэн ултӥям-вӧсь карем муртлэн киыз со вылэ ӝутӥськоз.
23Кӧтпушкыз пачылаз тырмиз ке,
Со Аслэсьтыз ӝуась вожпотонзэ со вылэ лэзёз но
солэн пушказ висёнъёсты зорытоз.
24Корт ожмаськон тӥрлыклэсь пегӟоз-а со, –
ыргон пукыӵ со пушкы бышкалтӥськоз;
25ньӧлзэ поттыны кутскоз, – со мугор пушкысь потоз,
солэн сэпез пыр пиштыса потоз;
кулонлэн туж бадӟым кышканъёсыз со доры вуозы!
26Вань сьӧдэз-пеймытэз солэн пушказ ватӥськемын:
нокинэн пеллямтэ тыл сое сиёз-ньылоз;
улон юртаз кылемез доры но уродлык вуоз.
27Солэсь законлы пумит улэмзэ инбам усьтоз,
музъем солы пумит кариськоз.
28Ас юртаз люкам узырлыкез ышоз-быроз,
Солэн вожпоттон нуналаз ваньмыз пазьгиськоз.
29Тӥни кыӵе Инмар азьын законлы пумит улэм адямилэн адӟонэз,
Дунне Кутӥсьлэн солы сётэм люкетэз!»
Глава 20