Выбрать язык
Книги Ветхого Завета
Книги Нового Завета
с русским текстом1Иов ответ сётыса шуиз:
2«Кудкемозь тӥ мынэсьтым лулме курадӟытыса возёды на,
кылыныды йыръёды на монэ?
3Тани, ог дас пол ини тӥ монэ сантэмалляды,
уд но кепыраське монэ ёртыса-ӝикатыса возьыны.
4Мон зэмзэ ик сьӧлыкай ке, мынам сьӧлыке ас бордам кыле.
5Нош тӥляд мон азьын вылтӥяськемды потэ ке,
сантэмаськон улэ сюременым монэ пыӵкылэмды потэ ке,
6тодэлэ, монэ Инмар погыртӥз но
Аслаз вотэсэныз монэ шобыртӥз шуыса.
7Тани, мон кесяськисько: ”Ултӥяло!” Но нокин но уг кылзы;
тэльмырыса вазиськисько, нош дурбасьтӥсь ӧвӧл.
8Со мынэсьтым сюресме ӵоксаз но,
выжеме-ортчеме уг ни луы, сюресме пеймыт кариз.
9Мон вылысь данме сэрпалтӥз, йырысьтым венец изьыме басьтӥз.
10Котыр ласянь монэ тарказ но, мон кошкисько;
писпуэз кадь мынэсьтым оскиськонме Со ишкалтӥз.
11Мон вылэ туж бадӟым йыркурез ӝуатскиз,
Аслаз тушмонъёсыз пӧлы монэ пыртэ.
12Солэн полкъёсыз ӵош лыктӥзы, мон пала вамыштӥзы,
улон юрт котырам интыяськизы.
13Мынэсьтым агай-вынъёсме Со мон бордысь палэнтӥз,
тодмоосы но монэ мурт каро ни.
14Мынам матысьёсы монэ куштыса кельтӥзы,
тодмоосы монэ вунэтӥзы.
15Мынам юртам лыктэмъёс но, медъяськыса ужась кышноос но
монэ мурт шуыса лыдъяло;
соослэн син азязы мон палэнысь лыктэм мурт луи.
16Аслэсьтым медоме ӧтисько но, со уг вазиськы;
мон сое сюлворыса курыны кулэ.
17Шокаме ик кышноелы синазькыль луиз,
аслам пушкысьтым потэм нылпиосы понна
мон сое сюлворыса курыны кулэ.
18Пичи пиналъёс гинэ но монэ синазькыль каро:
ӝутскисько но, соос монэ унь-мань каро.
19Аслам эшъёсы мынэсьтым юрдо,
азьвыл яратэм муртъёсы мыным пумит берытскизы.
20Лыосы ку бордам, лулмугор бордам лякиськизы,
пиньёсы вӧзы гинэ куэ кылиз на.
21Жалялэ монэ, эшъёсы мынам, жалялэ тӥ монэ, –
уго Инмар киыныз мон борды йӧтӥськиз.
22Инмар кадь тӥ но малы монэ ёртӥськоды,
лулмугорме йырйыса, кӧттэс тырыны уд быгатӥське-а?
23Э, мынам кылъёсы гожтэмын луысалзы ке!
Книгаын пусйылэмын луысалзы ке,
24узвесен корт ожонэн пумтэм вапумъёс ӵожелы
из вылын вандылэмын луысалзы ке!
25Нош мон тодӥсько, мынам Мозмытӥсе улэп,
Со берпум нуналэ мынэсьтым та сисьмыса усьылӥсь куме
сюйысь султытоз,
26мон аслам лулмугорыным Инмарез адӟо.
27Мон Сое ачим адӟо; мынам синъёсы, муртлэн ӧвӧл, Сое адӟозы.
Гадь пушкам сюлмы каньсыра!
28Тӥледлы вераны кулэ вал: ”Малы сое асьмеос ёртыса возиськомы?”
Уродлэн-леклэн выжыез мон бордысь шедьтэмын кожаськоды кадь.
29Кышкалэ мечлэсь, уго меч ӧрекчаськыса улэм понна
пунэмзэ берыктӥсь луэ,
но тодэлэ: суд вань».
Глава 19