Выбрать язык
Книги Ветхого Завета
Книги Нового Завета
с русским текстом1Иов ответ сётыса шуиз:
2«Зэм! Тодӥсько, озьы луоз шуыса;
но кызьы адями Инмар азьын шонере потыны быгатоз?
3Кыл тэкшерыны Соин мылкыд кариз ке,
сюрсэз пӧлысь одӥгезлы но Солы ответ сётыны уз пӧрмыты.
4Сюлмыныз визьлыко но кужмыныз ядыё Со;
кин Солы пумит урдскылӥз но каньыллыко улыны быгатӥз на?
5Со гурезьёсты интыысьтызы воштэ но, соосты уг ни тодмало:
йыркурез ӝуатскыку, соосты Со кымалля.
6Музъемез ас интыысьтыз воштэ но, солэн юбоосыз куалекъяло;
7шундылы вералоз, – но уз ӝужа, кизилиос вылэ но печать нюртэ.
8Со огназ инбамъёсты вӧлдылэ но зарезьлэн йылъёстӥз ветлэ;
9Асэз, Кесӥлез, Химаез*а кылдытӥз,
лымшорлэсь ватӥськем висъетъёссэ но;
10быдӟымлыкез, эскерыны луонтэмез,
лыдъяса быдтонтэм паймымон ужез лэсьтэ!
11Тани, Со мынам азьтӥм ортчоз, но Сое мон уг адӟы;
лобӟыса-ворттыса кошкоз, уг но шӧды Сое.
12Басьтӥз ке, кин Солы пумитъяськоз?
Кин Солы шуоз: ”Мар тон лэсьтӥськод?”
13Инмар Аслэсьтыз йыркурзэ уз палэнты;
Со азьын вылтӥяськонлэн нюръяськисьёсыз погралозы.
14Кызьы бен быгато мон Солы ответ сётыны,
кыӵе кылъёс вераны Со азьын мон шедьто?
15Мон янгыштэм ке но луысал, ответ сётыны ӧй быгатысал,
аслэсьтым Судьяме сюлворыса уло.
16Мон вазиськысал но, Со мыным ответ сётысал ке,
соку но мон ӧй оскысал, мынэсьтым куараме Со кылӥз шуыса,
17Кин тӧлпери пушкын монэ погыртэ но юнме шорысь
мынэсьтым яраосме йылэтэ,
18лулме лэзьыны маза уг сёты,
улонме куректон-кайгуосын пачылмытэ.
19Кужымме поныса кутсконо ке, Со туж кужмо;
судэ ке Соин пыроно, кин монэ Соин тодматоз, ваче вуттоз?
20Асме шонере поттыны кутски ке,
мынам аслам кылы-ымы ик монэ янгыше уськытоз;
мон янгыштэм-шектэм ке но, Со монэ янгышо-шеко шуыса ялоз.
21Янгыштэм-шектэм мон; мар луоз лулылы –
тодэме уг поты, аслэсьтым улонме синазькыль карисько.
22Ваньмыз огкадь; соин ик мон верай уго,
янгыштэм-шектэмез но, янгышо муртэз но Со быдтэ шуыса.
23Тазэ Со сюлоен син куспын погыртэ ке,
нош янгыштэм-шектэмъёслэсь курадӟонзэс серекъя.
24Сьӧлыклэсь кышкасьтэмъёс кие музъем сётэмын;
солэн судьяосызлэсь ымнырзэ Со ӵокса. Со ке ӧвӧл, нош кин бен?
25Мынам улоно нуналъёсы ивор нуллыса ворттылӥсьлэсь
ӝоггес ортчо, ӟечлыкез уг адӟо,
26капчи пыжъёс кадь чальтчо, сиён доры лобись ӧрӟи кадь дырто.
27Шуоно ке мыным: ”Аслэсьтым ӝожъяськонме мон вунэто,
мӧзмыт тусбуйме вошто, сэзь-сэзь карисько”,
28вань курадӟонъёсыным сэрен куалекъясько, тодӥсько уго,
Тон монэ янгыштэм-шектэм шуыса уд ялы.
29Мон янгышо ке, соку нош малы юнме курадӟисько?
30Лымы вуэн мон мисьтӥськысал ке но,
киосме дун-чылкыт карысал ке но,
31нош Тон соку но монэ дэрие куштод,
соку мынам дӥськутэ мынэсьтым юрдоз.
32Уго Со адями ӧвӧл, мон кадь, – Солы ответ сётыны но
Соин ӵош судэ мыныны мед быгатом шуыса!
33Кыкнамы вылэ но кизэ мед понысал –
асьмелэн куспамы сыӵе сылӥсьмы ӧвӧл.
34Аслэсьтыз корт бодызэ мон бордысь Со мед палэнтысал,
Солэн кышкатонэз монэ медаз дэймыты вал,
35соку мон верало но Солэсь уг кышка,
уго мон ас поннам ачим сыӵе ӧвӧл».
*а 9:9 Ас, Кесӥль, Хима – кизили люкъёс – созвездияос
Глава 9