Выбрать язык
Книги Ветхого Завета
Книги Нового Завета
с русским текстом1Савхей пи Вилдад ответ сётыса шуиз:
2«Тон тазьы кема вералод на-а? –
Тынад ымысьтыд потэм кылъёс – шукырес тӧл!
3Инмар, оло нош судэз мыдланьтэ ке шат,
Дунне Кутӥсь зэмлыкез воштэ шат?
4Тынад пиосыд Со азьын сьӧлыказы бере,
соин ик Со соосты асьсэлэн законлы пумит улонзылэн
киулаз сётӥз но.
5Нош тон Инмарез утчад ке, Дунне Кутӥсьлы вӧсяськид ке,
6дун-чылкыт, шонерлыко улӥд ке, Со али ик тыныд юрттоз,
шонерлыкедлэн улон интыезлы каньыллык ваёз.
7Кутсконаз тынад ӧжыт вал ке, азьпалаз тачак луоз.
8Азьвыл улэм выжыослэсь юа но
соослэн атайёссылэсь чакланъёссэс валаны тыршы;
9нош ми – толлоос, номыре но ум тодӥське,
малы ке шуоно музъем вылын улоно нуналъёсмы вужер гинэ.
10Тани, соос тонэ дышетозы, тыныд шуозы,
сюлмысьтызы поттыса, таӵе кылъёс вералозы:
11”Тростник будос вутэк ӝутӥське-а? Камыш вутэк будэ-а?
12Со али вож куеныз сылэ, погыртэмын но ӧвӧл,
нош вань турынъёслэсь азьло куасьме”.
13Ваньзылэн Инмарез вунэтӥсьёслэн сюресъёссы сыӵеесь,
чеберъяськисьлэн оскиськонэз но быроз;
14солэн оскиськонэз ӵогыса куштэмын,
аслыз оскиськись луонэз – со чонарилэн коркаез.
15Аслаз корка вылаз пыкиськоз, нош со сылыны уз чида;
со борды кутӥськоз, нош со возиськыны уз быгаты.
16Шунды азьын со вожектэ, сад сьӧры солэн вайёсыз пото;
17из люк борды выжыосыз бинисько,
изъёс вискытӥ нырзы мычиське.
18Нош сое интыысьтыз ишкалто ке, со солэсь куштӥськыса шуэ:
”Мон тонэ ӧй адӟылы!”
19Тӥни солэн улон сюресэзлэн шумпотонэз!
Нош музъемысь мукетъёсыз ӝужало.
20Адӟиськод-а, Инмар дун-шектэмез кулэтэм уг кары,
урод-лек муртъёсты китӥзы кутыса уг возьы.
21Со эшшо тынэсьтыд ымдэ пальпотӥсь кароз на,
ымдуръёстэ шумпотыса вазьылӥсесь кароз на.
22Тонэ адӟонтэм карисьёс возьытлыкен шобырскозы,
сьӧлыкъёслэсь кышкасьтэмъёслэн балаганъёссы но уз ни кыле».
Глава 8