Выбрать язык
Книги Ветхого Завета
Книги Нового Завета
с русским текстом1«Аслам улонэ аслам лулылы синазькыль луиз ини;
куректон-кайгуэлэн кияз сётӥсько;
лулы куректыку-кайгырыку верало.
2Инмарлы шуо: ”Монэ янгыше эн уськыты;
вера мыным: мар понна Тон монэн нюръяськиськод?
3Тыныд ӟеч-а потэ монэ ултӥяны,
Аслад киыдлэсь ужзэ синазькыль карыны,
нош сьӧлыклэсь кышкасьтэмъёслэн кенешсы вылэ югыт ыстӥськод?
4Лулмугороослэн кадесь-а Тынад синъёсыд,
адямиос кадь-а Тон учкиськод?
5Тынад нуналъёсыд адямилэн нуналъёсыз кадесь шат,
улоно аръёсыд воргоронлэн нуналъёсыз кадесь-а?
6Малы Тон мынэсьтым шекъёсме утчаськод,
сьӧлыкъёсме тодыны тыршиськод?
7Мон законлы пумит улӥсь ӧвӧл шуыса тодӥськод ук,
Тынад киулысьтыд монэ нокинлы мозмытыны луонтэмез но тодӥськод?
8Тынад киосыд мон вылын тыршизы,
котыр ласянь соос монэ нелькизы-кылдытӥзы,
нош Тон табере монэ быдтӥськод?
9Тодад вай али, кызьы Тон монэ горд сюез кадь нелькид-лякылӥд,
нош табере тузонлы-сюйлы монэ берыктӥськод?
10Тон монэ йӧлэз кадь ӧд-а кисьты,
кузятэмез кадь монэ ӧд-а напчыты?
11Куэн, лулмугорен Тон монэ дӥсяд но лыосын, сӥныръёсын
Тон ик монэ ӧд-а юнматы?
12Гажан-жалянэн улон мыным ӧд-а кузьма,
сюлмаськыса мынэсьтым духме Тон ик ӧд-а утьы?
13Но сое но Тон Аслад сюлэмад ватыса возид, –
тодӥсько, со Тон бордын вал шуыса, –
14мон сьӧлыкай ке, Тон шӧдод но
мынэсьтым сьӧлыкамме вӧсь карытэк уд кельты шуыса
тодӥсько вал.
15Мон янгыш ке, куректон мыным! Шонер ке но,
аслэсьтым йырме ӝутыны уг дӥсьты.
Мон ултӥянэн пачылмемын; мынам курадӟонэ шоры учкы:
16со йылэ но йылэ. Сьӧсь пӧйшур кадь Тон мон сьӧры уйиськиськод,
нош ик мон вылэ урдскиськод но Аслэсьтыд паймымон луэмдэ
мон пыр возьматӥськод.
17Мыным пумит выль адӟисьёсты поттӥськод;
мыным пумит Аслэсьтыд йыркурдэ кужмоятӥськод;
огез бӧрсьы мукетыз шугадӟонъёс мон вылэ урдӥсько.
18Малы Тон монэ кӧтпушкысь поттӥд?
Мед кулом вал, куке монэ нокинлэн но синмыз
адӟыса ӧз на вуы на вал;
19кылдымтэ-вылымтэез кадь кӧтпушкысен ик
монэ шайгуэ мед нуозы вылэм!
20Вакчиесь ӧвӧл-а мынам нуналъёсы?
Кельты, палэнскы мон бордысь,
ӧжытак ке но сэзь-сэзь кариськыны мед быгатом,
21пеймытлыклэн шаераз, кулонлэн-эзельлэн вужераз
кошкемелэсь азьло –
отчы мынэм берам уг ни берытскы –
22пеймытлыклэн дуннеяз, кытын радлык ӧвӧл,
кытын туж пеймытлы укшась пеймытлык улэ”».
Глава 10