Выбрать язык
Книги Ветхого Завета
Книги Нового Завета
с русским текстом1«Адямилы музъем вылын улыны дыр лыдъяса сётэмын ӧвӧл-а,
солэн нуналъёсыз но медъяськем муртлэн кадесь ик ӧвӧл-а?
2Ляльчи саюлэ пуксьыны кыӵе мылкыд каре,
медъяськем мурт ас ужезлэсь йылпумъяськемзэ кыӵе возьма,
3озьы мон аслым люкетлы огыр-бугыр толэзьёс басьтӥ,
куректоно-кайгуо уйёс но мыным лыдъяса сётэмын.
4Выдыкум шуисько: ”Куке но султо-а?”
Нош ӝыт кыстӥське но кыстӥське,
ӵук ӟардытозь жадьытозям погылляськисько.
5Мугоры мынам нумыръёсын шобыртэмын,
тузонӟем гижлоосын яраӟемын;
куэ мынам пилиськылэ, урӟектыса улэ.
6Улоно нуналъёсы куиськон сусолэсь но ӝоггес бызё,
мыным оскиськон сётытэк бырыло.
7Тодад вай: мынам улонэ тӧл пельтэм кадь,
синмы ӟечсэ адӟыны уз берыктӥськы.
8Монэ адӟисьлэн синмыз монэ уз адӟы;
Тынад синъёсыд мон шоры учкозы, нош мон отын ӧвӧл ни.
9Пилем пичиёме но ыше-быре;
пыдэстэм дуннее усем мурт отысь уз поты ни,
10аслаз корказ уз ни берытскы, солэн интыез сое уз ни тодма.
11Аслэсьтым кылме-ымме кутыса уг возьы ук;
духе ёрмыса-ӝикаса улыку мон верало; лулылэн куректон дыръяз урттылӥсько.
12Мон зарезь яке зарезьысь шимес пӧйшур-а, –
малы мон доры Тон возьмаськисьёсты пуктӥд?
13Куке малпасько: ”Монэ валесэ буйгатоз,
кӧлон интые куректон-кайгуме нуоз”,
14кӧлыкум тон монэ кышкатӥськод,
уйвӧтам адӟонъёс пыр тон монэ курдатӥськод;
15лулы мынам шоканэ, эсьмаса, мед дугдоз вал шуыса вите,
лыосме утён сярысь, эсьмаса, кулон мед лыктоз вал шуыса,
сое возьмаса улэ.
16Синазькыль луиз мыным улон.
Пумтэм вапумъёс мыным улоно ӧвӧл.
Мон бордысь палэнскы, уго мынам нуналъёсы –
юнме алекъяськон гинэ.
17Мар со адями,
мар Тон сое сокем дунъяськод но
солы Аслэсьтыд саклыктэ сокем висъяськод,
18ӵукналы быдэ со доры ветлӥськод,
минутлы быдэ сое чакласькод-эскериськод?
19Кудкемозь Тон монэ огнаме кельтытэк улод на,
кема-а улод на мон бордысь палэнскытэк,
дыльдыме ньылыны маза сётытэк кема-а возёд на монэ?
20Мон сьӧлыкай ке, мар мон Тыныд лэсьтом на,
адямиослэн возьмасьсы!
Малы Тон монэ Аслыд пумитъяськись карид,
озьы мон аслым ачим синазькыль луи?
21Мынэсьтым сьӧлыкме малы куштонтэмез вал,
законлы пумит улэмъёсме малы басьтонтэмез вал?
Уго, тани, мон сюе выдо; ӵуказе монэ утчалод но, мон ӧвӧл ни».
Глава 7