Выбрать язык
Книги Ветхого Завета
Книги Нового Завета
с русским текстом1Иов ответ сётыса шуиз:
2«Э, мынам зар бӧрдэмъёсы шонер мертамын луысалзы ке,
соосын валче курадӟонэ вес вылэ понэмын луысал ке!
3Со зарезьысь луолэсь, зэм ик, секытгес луысал!
Соин ик мынам кылъёсы сюлме веськасьтэмесь.
4Уго Дунне Кутӥсьлэн ньӧлъёсыз мон пушкы пыремын;
соослэн ядзы лулпушме сюпсе;
Инмарлэн сётэм шимес ужъёсыз мон вылэ урдскизы.
5Турыно возь вылын кыр ишак вузэ-а, суралтэм дураз ош бурсэ-а?
6Шӧгез сылалтэк сиё-а, курегпузлэн тӧдьыяз шӧмыз вань-а?
7Мар борды мынам лулылэн йӧтӥськемез уг поты вал,
со луиз мынам юрӟым сиёнэ.
8Э, куке мынам мылкыд каронэ быдэсмысал ке,
оскиськонме но Инмар санэ понысал ке!
9Э, монэ пыргытыны Инмар ӟеч эриксэ сётысал ке,
Аслэсьтыз кизэ вӧлъяса, монэ погыртысал ке!
10Та мыным эшшо шумпотон луысал,
аслам жалясьтэм висёнам мон юнматскысал,
уго мон Святойлэн веранъёсызлэсь ӧй куштӥськы.
11Оскиськыса улон понна кытын на мынам кужыме?
Улонэлэн йылыз-пумыз таӵе бере, малы сое кузёмытоно на?
12Изъёслэн юнлыксы кадь-а мынам юнлыке?
Ыргон-а мынам лулмугоры?
13Мон бордын вань-а мыным юрттэт,
вань-а мыным кыӵе ке юрттэт-пыкиськон?
14Курадӟисез-куректӥсез ас эшез жаляны кулэ –
Дунне Кутӥсьлэсь кышканзэ со ӧз ке ышты.
15Но мынам агай-вынъёсы оскыны луонтэмесь,
визыл кошкись ву кадесь, ӝог бызись шур вуос кадесь,
16йӧос шунаку пожаськем ву кадесь,
лымы шунаку бугыръяськыса бызись ву кадесь.
17Пӧсь куазь вуэ ке, шуръёс пичиёмо, нош ӟырдыт пӧсь ке луэ,
ышо-быро.
18Ас ӧрзэс вошто, луоё кыре пыро но ышо-быро;
19Фемае мынӥсь караванъёс соос шоры учко,
Савее мынӥсь сюресчиос соос вылэ оскисько,
20нош оскиськонзы юнме луэ, отчы вуо но ӝоже усьыса ӵыжекто.
21Озьы ик тӥ но табере нокин-номыр кадесь ӧвӧл ини:
кышкытэз адӟыса курдатскиды.
22Мон верай-а: ”Вае мыным ваньбурдэс”
яке ”асьтэлэн ваньлыкты пӧлысь мон понна тыре;
23тушмонлэн киысьтыз монэ мозмытэ,
курадӟытӥсьёслэн киулысьтызы монэ дун тырыса басьтэ”?
24Монэ дышетэ, соку мон чус карисько; возьматэ,
кытын мон сьӧлык лэсьтӥ.
25Макем кужмоесь зэмлыклэн кылъёсыз!
Нош мае возьмато тӥляд мынэсьтым сьӧлыкъёсме
шарае поттонъёсты?
26Шарае поттон понна тӥ ӧвӧлтэм кылъёс малпаськоды-а?
Тӧлъя-буръя тӥ ӧвӧлтэм кылъёстэс лэзиськоды.
27Анайтэм-атайтэм нылпи вылэ тӥ урдскылӥськоды но
асьтэлэн эштылы гу гудӥськоды.
28Но тӥледыз курисько, учкелэ мон шоры;
тӥляд азяды ӧрекчаськыса верасько-а?
29Выльысен учке: вань-а ӧрекчаськонэз?
Учке-эскере: мон палан зэмлык.
30Мон ӧрекчаськыса вераськисько шат?
Мынам ньылоны, оло, уг быгаты шат курытэз шӧдыны-висъяны?»
Глава 6