Выбрать язык
Книги Ветхого Завета
Книги Нового Завета
с русским текстом1«Ӧтьыса вазиськы, тыныд ответ сётӥсь вань ке.
Святойёс пӧлысь кудзылы тон вазиськод?
2Озьы, шузиез йыркуръяськон вие,
валасьтэмез керӟегъяськон быдтэ.
3Адӟи мон шузилэсь выжы лэземзэ но соку ик солэсь выжызэ каргай.
4Солэн нылпиосыз шудбуро улонэз уз адӟе,
соосты капка азьын жугозы,
дурбасьтӥсьсы но уз луы.
5Солэсь арано юзэ сютэм мурт сиёз,
бышкись турын пӧлысь сое басьтоз,
ньылонзы пашмем муртъёс солэсь ваньбурзэ ньылозы.
6Озьы, сюй-тузон пӧлысь кайгу уг поты,
музъемысь шугадӟон уг буды;
7нош адями ёрмыса-курадӟыса улонлы вордӥське,
тылгизьы кадь вылӥе ӝутӥськон понна со вордӥське.
8Нош мон Инмарлы вазиськысал,
аслэсьтым ужме Инмар кие сётысал.
9Инмар бадӟымесь, эскерыны луонтэмесь,
лыдъянтэм трос паймымон ужъёс лэсьтэ,
10музъемлэн бам вылаз зор сётэ, бусыос вылэ вуос лэзе;
11ултӥямъёсты вылӥе пуктылэ,
куректӥсьёс-бӧрдӥсьёс утиськон понна вылӥе ӝутӥсько.
12Кескичъёслэсь урод малпанъёссэс Со куашкатэ но,
соослэн киоссы кутскем ужзэс йылпумъяны уг ни быгато.
13Визьлыко муртъёсты асьсэлэн кескичлыкенызы ик Со кутэ но,
кескичъёслэн кенешсы юнме луэ:
14нуназе соос пеймытэз пумитало,
нуназе шорын, уйин кадь, кырмиськыса ветло.
15Со куанерез мечлэсь уте, соослэн ымзылэсь,
кужмолэн киызлэсь уте.
16Но шудтэм муртлы оскиськон вань,
ӧрекчаськон аслэсьтыз ымзэ пытса.
17Шудо адями, кудзэ Инмар визьма,
соин ик Дунне Кутӥсьлэсь вӧсь каронзэ кулэтэм эн кары,
18уго Со яраё каре но Ачиз ик соосты бине;
Со вӧсь каре но, Солэн ик киосыз эмъяло.
19Куать шугадӟонысь-ёрмонысь тонэ уте,
сизьыметӥяз но уродлык тон борды уз кутскы.
20Сютэм арын тонэ кулонлэсь мозмытоз, ожын – мечлэсь утёз.
21Кыллэн сюлоезлэсь астэ ватод, лыктӥсь уродъёслэсь уд кышка –
соос матэ вуизы ке.
22Куашканэз-таркаськонэз, сютэм кылёнэз серем карод,
музъем выл пӧйшуръёслэсь но уд кышка,
23уго бусыысь изъёсын тон кусып возиськод,
бусыысь пӧйшуръёс но тонэн тупаса уло.
24Тынад тылысэд кышкантэм интыын сылэ шуыса тодод,
аслэсьтыд коркадэ чакласа улод но уд сьӧлыка.
25Адӟод, тынад кидысэд туж трос шуыса,
выжыосыд но музъем вылысь турын кадь.
26Ас дыраз чабей культоослэн пуктӥськемзы кадь,
пересьмыса шайгуэ пырод.
27Тани, мае ми тодыны быгатӥмы; озьы ик со вань но;
тае кылзы но аслыд синйылты».
Глава 5