Выбрать язык
Книги Ветхого Завета
Книги Нового Завета
с русским текстом1Одӥгаз нуналэ Инмар пиос Кузё-Инмар азе султыны лыктӥзы; соос пӧлын Кузё-Инмар азе султыны шайтан но лыктӥз.2Кузё-Инмар шайтанлы шуиз: «Кытысь тон лыктӥд?» Кузё-Инмарлы ответ сётыса, шайтан шуиз: «Мон музъем вылтӥ ветлӥ, быдэсак котыртӥ сое».3Соку Кузё-Инмар шайтанлы шуиз: «Мынэсьтым Иов ляльчиме синйылтӥд-а? Музъем вылын со кадез ӧвӧл: дун-шектэм адями, шонерлыко, Инмарлэсь кышканэн улӥсь, уродлэсь-леклэсь палэнскылӥсь, татчыозь со туж дун-шектэм улэ, нош тон Монэ солы пумит узатӥськод вал сое чик янгышезтэк быдтыны».4Но шайтан Кузё-Инмарлы ответ сётыса шуиз: «Ку понна ку, нош аслаз улонэз понна адями сётоз ваньзэ, маиз солэн вань;5нош Тон, кидэ ӝутыса, солэн лы бордаз, солэн мугорыз борды йӧтӥськы – данъялоз на-а со Тонэ?»6Кузё-Инмар шайтанлы шуиз: «Тани, со тынад кияд, но лулзэ гинэ солэсь уть».
7Нош шайтан Кузё-Инмарлэн син азьысьтыз кошкиз но Иовез пыдтышкысеныз йырпыдэсозяз туж лек гижло чер висёнэн шобыртӥз.8Мугорзэ корманы Иов черепица чальдэтэз басьтӥз но пень вылэ пуксиз [гурт сьӧры].9Кышноез солы шуиз: «Татчыозь тон туж дун-шектэм улӥськод на-а?! Инмарез курла-сантэма но кул».*а10Соку Иов кышноезлы шуиз: «Визьзэс ыштэмъёс кадь тон вераськиськод. Инмар дорысь ӟечсэ кабыл басьтомы, нош уродзэ кабыл ум басьтэ шат?» Таос пумысен Иов аслаз кылыныз-ымыныз ӧз сьӧлыка.
11Вань та куректон-кайгуослэсь Иов борды вуэмзэс солэн куинь эшъёсыз кылӥзы но котькудӥз ас дорысьтыз потӥз: Феманысь Елифаз нимо пи, Савхейысь – Вилдад, Наамитысь – Софар, соос огазе люкаськизы – соин ӵош чигиськыны-ӝожтӥськыны но сое буйгатыны мынон понна.12Кыдёкысен ик синъёссэс вылӥе ӝутӥзы но сое соос ӧз тодмалэ; куаразэс бадӟым каризы но викышъяса зар бӧрдыны кутскизы; котькудӥз выл дӥсянзэ ӵажак кесяз; йыр вылтӥзы ин пала тузон пазязы.13Соин валче сизьым нунал но сизьым уй ӵоже музъем вылын пукизы; но нокин но солы пал кыл но ӧз вера, адӟизы уго, солэн курадӟонэз укыр секыт шуыса.
*а 2:9 Трос дыр ортчем бере кышноез солы шуиз: «Кема-а чидаса тон улод на? Аслэсьтым утиськонме ӧжытак возьмаса уло на. Музъем вылын тонэ тодазы (буре) уг ни ваё, пиосмы, нылъёсмы (пушкылэн висёнъёсыз, юнме тыршем уже) кулӥзы. Тон ачид зын нумыръёс пӧлын пукиськод, уйёстэ шобырскытэк потӥськод, нош мон, медо радын ужаса, одӥг интыысь мукетаз, коркась корка ветлӥсько но витисько: ку меда шунды пуксёз – ужъёсы бере, секытэсь висёнъёсы бере шутэтскыны мон мед быгатысал. Инмарлы кыӵе ке но кылъёс вера но кул!» – та чуръёс басьтэмын Септуагинтаысь.
Глава 2