Выбрать язык
Книги Ветхого Завета
Книги Нового Завета
с русским текстом1Уц музъемын Иов нимо адями улӥз; та адями дун-шектэм вал, шонерлыко, Инмарлэсь кышканэн улӥз, уродлэсь-леклэсь палэнскылӥз.2Солэн сизьым пиосыз но куинь нылъёсыз вордскизы.3Солэн юртъераз сизьым сюрс векчи пудоез, куинь сюрс верблюдъёсыз, вить сю пар ошъёсыз, вить сю ишакъёсыз но трос гинэ медоосыз вал; шундыӝужанысь вань пиосмуртъёс пӧлысь ваньмызлэсь но нимо-даногес вал та адями.
4Солэн пиосыз, черодзы вуыса, огзы доры огзы сиыны-юыны огазе люкаськылӥзы, асэнызы валче сиыны-юыны асьсэлэсь куинь сузэръёссэс ӧтьыны ыстылӥзы.5Юондыр нуналъёссы йылпумъяськем бере Иов нылпиоссэ дораз ӧтьыны ыстылӥз но соослы чылкытатӥськон сямез ортчытылӥз, ӵукна вазь ик султыса, котькудзы понна тылын сутӥськись курбон сётылӥз, [лулынызы сьӧлыкам понна одӥг кунян курбонлы сётылӥз]. Уго Иов шуылӥз: «Мынам пиосы, оло нош сьӧлыказы, асьсэлэн сюлмазы Инмарез курлазы». Тазьы карылӥз Иов котькудаз таӵе нуналъёсы.
6Одӥгаз нуналэ Кузё-Инмар азе султыны Инмар пиос лыктӥзы; соос пӧлын ик шайтан но лыктӥз.7Кузё-Инмар шайтанлы шуиз: «Кытысь тон лыктӥд?» Кузё-Инмарлы шайтан ответ сётыса шуиз: «Мон музъем вылтӥ ветлӥ, быдэсак котыртӥ сое».8Кузё-Инмар шайтанлы шуиз: «Мынэсьтым Иов ляльчиме синйылтӥд-а? Музъем вылын со кадез адями ӧвӧл, сьӧлыкасьтэм, шонерлыко, Инмарлэсь кышканэн улӥсь, уродлэсь-леклэсь палэнскылӥсь».9Соку шайтан Кузё-Инмарлы ответ сётыса шуиз: «Оло, юнме гинэ-а Иов Инмарлэсь кышка?10Тон сое котыр ласянь ӧд кенера-а, солэсь корказэ но ваньзэ, маиз солэн вань, ӧд кенера-а? Солэн киыныз лэсьтэм ужъёсты Тон бакель карид но, солэн пудо уллёосыз быдэс музъем вылэ вӧлдӥсько;11нош Тон, кидэ ӝутыса, ваньмыз борды, маиз солэн вань, йӧтӥськы, – данъялоз на-а со Тонэ?»12Соку Кузё-Инмар шайтанлы шуиз: «Маиз солэн вань, ваньмыз тынад киулад; но со вылэ киыныд гинэ эн йӧтӥськы». Соку шайтан Кузё-Инмарлэн син азьысьтыз кошкиз.
13Одӥгаз нуналэ Иовлэн пиосыз, нылъёсыз асьсэлэн бадӟым агайзы дорын сиськизы, вина юизы.14Но тани, Иов доры ивортӥсь лыктыса шуэ:15«Ошъёс гыризы, соос бӧрсьын ишакъёс уллёен ветлӥзы. Савей выжыысь муртъёс со дыре урдскизы но соосты киултӥзы, нош пинал пиосты йылсо мечен бышкаса виизы. Мон огнам гинэ утиськи тыныд ивортон понна».
16Со эшшо вера на вал, соку мукетыз лыктыса ивортэ: «Инмысь Инмар тыл усиз но ыжъёсты, пинал пиосты но ӵушказ, ньылӥз соосты; мон огнам гинэ утиськи тыныд ивортон понна».
17Со вера вал эшшо – мукетыз лыктыса ивортэ: «Халдей муртъёс куинь отрядэн интыяськизы но верблюдъёс вылэ урдскизы, соосты киултӥзы, нош пинал пиосты йылсо мечен бышкаса виизы, мон огнам гинэ утиськи тыныд ивортон понна».
18Таиз вера на вал эшшо – мукетыз лыктыса ивортэ: «Тынад пиосыд, нылъёсыд бадӟым агайзы дорын сиськыса, вина юыса пуко вал.19Но тани, кыр дуннеысь кужмо тӧл вуиз но коркалэсь ньыль сэрегзэ ик котыртӥз, нош корка пинал пиос вылэ пограз, соос кулӥзы; мон огнам гинэ утиськи тыныд ивортон понна».
20Соку Иов султӥз но аслэсьтыз выл дӥськутсэ кесьыса лэзиз, аслэсьтыз йырзэ ӵышкиз, музъем вылэ уськытскыса йыбырттӥз.21Со шуиз: «Анаелэн пушкысьтыз мон гольык потӥ, гольык ик берытско но. Кузё-Инмар сётӥз, Кузё-Инмар ик басьтӥз но; [кызьы кулэ вал Кузё-Инмарлы, озьы ик луиз но,] Кузё-Инмарлэн нимыз данлыко мед луоз!»
22Вань та учыръёсы Иов ӧз сьӧлыка но номыр ик умойтэмзэ Инмар сярысь ӧз куареты.
Глава 1