Выбрать язык
Книги Ветхого Завета
Книги Нового Завета
с русским текстом1Тани со ханаан калыкъёс, кудъёссэ Кузё-Инмар Ханаан музъемын ортчем ожмаськонъёсты тодӥсьтэм израиль пиослэсь визьзэс сынан понна кельтӥз, –2тае Со Израиль выжыослэн вордӥськоно, ожмаськонэз азьвыл тодӥсьтэм пиоссы мед тодозы, ожмаськыны мед дышетскозы шуыса лэсьтӥз:3филистим пиослэн вить кивалтӥсьёссы, вань хананей выжыос, Сӥдонын улӥсьёс, Ваал-Ермонысен Емафе пырон дорозь, Ливан гурезьын улӥсь евейёс.4Соос улыны кельтэмын вал израиль пиослэсь визьзэс сынан понна, – Кузё-Инмарлэн Моисей пыр соослэн атайёссылы сӥзьыса сётэм курон-косонъёсызлы тэрытскозы-а, уз-а шуыса тодыны.
5Израиль пиос хананей, хеттей, аморрей, ферезей, евей, [гергесей], иевусей калыкъёс пӧлын улӥзы.6Соослэсь нылъёссэс асьсэлы кышнолы вайылӥзы, асьсэлэсь нылъёссэс соослэн пиоссылы кышнолы сётылӥзы, соослэн инмаръёссылы йыбыртъяса улӥзы.7Кузё-Инмар азьын израиль пиос лек уж лэсьтӥзы: вунэтӥзы асьсэлэсь Инмарзэс Кузё-Инмарез, ваалъёслы, астартаослы йыбыртъяны кутскизы.
8Израиль вылэ Кузё-Инмарлэн йыркурез ӝуатскиз, соку Со соосты Месопотамияысь Хусарсафем эксэйлэн киулаз сётӥз; Хусарсафемлы израиль пиос тямыс ар ӵоже ужаса-тыршыса улӥзы.9Соку израиль пиос Кузё-Инмарлы тэльмырыса вазиськизы, Кузё-Инмар соослы утись сётӥз, Халевлэн Кеназ вынызлэсь Гофониил пизэ. Со соосты утиз.10Со бордын Кузё-Инмарлэн Духез улӥз, со Израиль калыклэн судьяез вал. Со [Хусарсафемлы пумит] ожмаськыны ӝутскиз, Кузё-Инмар Месопотамиялэсь Хусарсафем эксэйзэ солэн киулаз сётӥз, солэн киыз Хусарсафемез вормиз.11Ньыльдон ар ӵоже та музъем каньылэн улӥз. Собере Гофониил, Кеназлэн пиез, кулӥз.
12Израиль пиос нош ик Кузё-Инмар азьын лек ужъёс лэсьтыны кутскизы, соку Кузё-Инмар Моав кунлэсь Еглон эксэйзэ, кужым сётыса, Кузё-Инмарлэн син азяз лек ужъёс лэсьтыса улэмзы понна Израильлы пумит лэзиз.13Еглон эксэй ас котыраз аммон, амалик калыкъёсты люказ но, ожен мыныса, Израилез погыртӥз, Пальмаё карез киултӥз.
14Моав кунлэн Еглон эксэезлы израиль пиос дас тямыс ар ӵоже ужаса-тыршыса улӥзы.15Соку израиль пиос Кузё-Инмарлы тэльмырыса вазиськизы но, Кузё-Инмар соослы утись сётӥз – Иеминийлэсь Гера пиезлэсь Аод пизэ, со паллян ки вал. Моав кунлэн Еглон эксэезлы израиль пиос со сьӧры саламъёс-кузьымъёс лэзизы.16Аод аслыз мыд-мыд палтӥз шерем меч лэсьтӥз, кузьдалаез гырпум кузьда, дӥсян улаз бурпалаз сое е бордаз шӧдьытӥз.17[Лыктыса] Моав кунлэн Еглон эксэезлы саламъёс-кузьымъёс вайиз; нош Еглон эксэй туж кӧй маке вал.
18Аод вань саламъёссэ-кузьымъёссэ сётӥз но соосты вайись муртъёсты сюрес вылэ келяз.19Галгалысь сульдэръёс-идолъёс дорысь берытскем бераз со шуиз: «Эксэй, мынам тыныд лушкем веран кылы вань». Со шуиз: «Чус кариське!» Соку ваньзы со вӧзын сылӥсьёс коркась потӥзы.20Аод со доры пыриз: со нимаз пуктэм сайкыт комнатаяз пуке вал ини. Аод шуиз: «[Эксэй], мынам вань тон понна Инмарлэн верам кылыз». [Еглон] пукон вылысьтыз [со азе] султӥз.21[Еглон султэм бере] Аод паллян киыныз бурпалаз ошем мечсэ поттӥз но Еглонлэн кӧтаз бышкалтӥз.22Меч пыдло бышкалскиз, кутонэныз валче, кӧйын шобырскиз меч. Аод мечсэ солэн пушкысьтыз ӧз потты, пыдлось ӧстӥ потыса, со кошкиз.23Корказе потэм бераз коркалэн бадӟым палаз пырон ӧсэз ворсаз, тунгоназ.24Со отысь потэм бере Еглонлэн ляльчиосыз лыктыса адӟизы: ӧсъёс ӵогамын. Куспазы верасько: «Зэм но, педло потан понна эксэй сайкыт комнатаяз ворсаськем».25Кема возьмаса улӥзы, но адӟо, бадӟым комнатае пырон ӧсэз нокин но уг усьты бере, усьтон кутӥзы но усьтӥзы, но тани, адӟо: кузёзы кулэмын, выж вылын кылле.26Соос паймыса улон дыръя Аод кошкиз [со сярысь ваньзы вунэтӥзы], сульдэръёс-идолъёс вӧзтӥ ортчиз но Сейрафе ватӥськиз.27Израиль музъеме вуэм бераз Ефрем гурезьысен [Аод] гумыен пелляны кутскиз. Израиль пиос соин ӵош гурезьысь васькизы, со соослэн азьпалазы мынӥз.
28Соослы со шуиз: «Мон бӧрсьы мынэ, [Инмар] Кузё-Инмар тӥлесьтыд тушмонъёстэс, моав калыкез, тӥляд киулады сётӥз». Со бӧрсьы мынӥзы, Моаве мынон Иордан вамен выжон интыез киултӥзы, со вамен нокинэ но потаны ӧз ни лэзе.29Со виын ог дас сюрс пала Моав пиосты погыртӥзы, ваньзы соос сӥльвироесь, кужмоесь пиос вал, одӥгзы но пегӟыны ӧз быгатэ.30Озьы моав калык израиль пиос азьын тэрытскыса улыны кутскиз. Тямыстон ар ӵоже та музъем вылын каньылэн улӥзы. [Аод кулытозяз соослэн судьязы вал].31Со бере судья луиз Самегар, Анафлэн пиез; со куать сю филистим муртъёсты, ошъёсты уллян йылсо бодыен жугыса, вииз; со но Израилез утиз.
Глава 3