Выбрать язык
Книги Ветхого Завета
Книги Нового Завета
с русским текстом1Аод кулэм бере израиль пиос нош ик Кузё-Инмар азьын лек ужъёс лэсьтыса улыны кутскизы.2Соку соосты Кузё-Инмар Асорын кузёяськыса улӥсь ханаан эксэйлэн, Иавинлэн, киулаз сётӥз; армиеныз Сӥсара нимо мурт кивалтӥз, со Харошеф-Гоимын улӥз.3Израиль пиос Кузё-Инмарлы тэльмырыса вазиськизы; Иавинлэн укмыс сю ожмаськон корт уробоосыз вал, израиль пиосты со кызь ар ӵоже туж курадӟытыса возиз.
4Со виын Израильын Лапидофлэн кышноез, азьпалзэ тодытыса верась Девора, судья луиз.5Со улӥз Деворалэн Пальма улаз, Рамаен Вефиль каръёс вискын, Ефрем гурезьын; израиль пиос со доры судэ лыкто вал.
6Девора Варакез, Неффалимлэн Кедес карысьтыз Авиноамлэсь пизэ, ӧтьыны лэзиз, солы шуиз: «Израильлэн Инмарез Кузё-Инмар тыныд таӵе косон сётэ: мын, Фавор гурезь йылэ туб, Неффалим выжыысь, Завулон выжыысь дас сюрс адямиез ас сьӧрад басьты;7нош мон тон дӥне, Киссон ӧр доры, Иавинлэсь армиен кивалтӥсьсэ Сӥсараез ваё, ожмаськон уробооссэ но туж трос ожгарчиоссэ, соосты тон кие сёто».
8Варак солы шуиз: «Тон монэн ӵош мынӥд ке, мон но мыно; ӧд ке мыны, мон но уг мыны; [уго мон уг тодӥськы, кудаз нуналэ Кузё-Инмар Кылчинзэ мон сьӧры ыстоз]».9Девора солы шуиз: «Тонэн ӵош мыныны мон мыно, но тод: та ветлон сюресэд тыныд данлык уз вайы; Кузё-Инмар Сӥсараез кышномуртлэн киулаз сётоз». Девора султӥз но Варакен ӵош Кедесэ мынӥз.10Завулон пиосты, Неффалим пиосты Варак Кедесэ ӧтчаз; соку со бӧрсьы дас сюрс адями мынӥз; Девора но соин ӵош мынӥз.
11Со вакытэ Моисейлэн ӵыжы-выжыезлэн, Ховавлэн, кеней пиосыз бордысь потэм Хевер ас выжыысьтыз люкиськиз; со аслэсьтыз балаганзэ Кедес вӧзысь Цааннимысь тыпы сурдэ пуктӥз.
12Сӥсаралы ивор вуттӥзы, Авиноамлэн Варак пиез Фавор гурезе, пе, тубем.13Сӥсара вань ожмаськон уробооссэ, укмыс сю ожмаськон корт уробоосты, Харошеф-Гоимысь вань калыксэ Киссон ӧр дуре люкатӥз.14Соку Девора Вараклы шуиз: «Султы, туннэ нуналэ Кузё-Инмар Сӥсараез тон кие сётоз уго; Ачиз Кузё-Инмар тынад азьтӥд мыноз». Варак Фавор гурезьысь васькиз, со бӧрсьы дас сюрс адями васькиз.15Соку Кузё-Инмар Сӥсараез куалектытӥз, вань ожмаськон уробоосыз, вань ожгарчиосыз Вараклэсь мечсэ адӟыса куалектӥзы; Сӥсара ожмаськон уробоысьтыз васькиз но пыдын бызьыса кошкиз.16Варак солэн ожмаськон уробоосыз, ожгарчиосыз сьӧры Харошев-Гоим дорозь уйиськиз; Сӥсаралэн ожмаськыны люкам калыкез одӥгтэм тӥр-пурт улын быриз, нокин но улэп ӧз кыльы.
17Нош Сӥсара пыдын Кеней пи Хеверлэн Иаиль кышноезлэн балаганаз бызьыса кошкиз; уго Асорысь Иавин эксэй но Кеней пи Хеверлэн семьяосыз куспазы тупаса улӥзы.18Иаиль Сӥсаралэн пумитаз потыса шуиз: «Пыр мон доры, кузёе, пыр, эн кышка». Со балаган пушкы пыриз, соку Иаиль сое шобретэныз биняз.19[Сӥсара] солы шуиз: «Вай мыным ӧжытак вудэ сюме юзматыны, сюэ куасьме». Йӧлын тырмытэм ку сепыссэ пертчиз но сое йӧлын сектаз, собере нош ик сое шобретэныз биняз.
20[Сӥсара] солы шуиз: «Балаганэ пырон ӧс дорад султы, кин ке но пырыса тынэсьтыд юаз ке: ”Татын нокин но ӧвӧл-а?”, тон шу: ”Ӧвӧл”».21Хеверлэн Иаиль кышноез балаган бордысь йылсо пуӵ басьтӥз, кияз молот кутӥз но шыпытэн со доры мынӥз. Соку со йылсо пуӵен йырвекчияз бышкалтӥз, музъем борды Сӥсараез ӝиптӥз, нош со жадьыса изе вал, озьы со кулӥз.22Тани, Варак Сӥсара сьӧры уйиське. Иаиль солэн пумитаз потыса шуиз: «Пыр, мон тыныд утчано адямидэ возьмато». Со Иаиль бӧрсьы пыриз но адӟиз: Сӥсара кулэмын, йылсо пуӵ солэн йырвекчияз бышкалтӥськыса улэ.
23Со нуналэ Инмар [Кузё-Инмар] ханаан калыклэсь Иавин эксэйзэ израиль пиос азьын зӥбыт-востэм кариз.
24Израиль пиослэн кужымзы юнгес но юнгес луиз ханаан калыклэн Иавин эксэез вылын; ханаан калыклэсь Иавин эксэйзэ быдтытозязы, кужымзы ялан юнмаз.
Глава 4