Выбрать язык
Книги Ветхого Завета
Книги Нового Завета
с русским текстом1Кузё-Инмарлэн Кылчинэз Галгалысь Бохиме, [Вефиле но, Израиль юрт доры но] лыктӥз но шуиз [соослы: «Тазьы шуэ Кузё-Инмар]: Мон тӥледыз Египетысь поттӥ но атайёсты азьын [тӥледлы сётыны] сӥзем музъеме пыртӥ, Мон шуи: ”Сӥзён-косон пыр кылдытэм кусыпме тӥледын ноку но уг сӧры.2Нош тӥ та музъемын улӥсь калыкен кусыпъёс эн кылдытъялэ; [соослэн инмаръёссылы эн йыбыртъялэ, сульдэръёссэс-идолъёссэс пыргытылэ], курбон тыронъёссэс сӧрылэ”. Нош тӥ Мынэсьтым верам кылме санэ ӧд понэ. Мар тӥ лэсьтӥды?3Соин ик Мон шуисько: [улляны малпам калыкез мукет азе улыны уг ни интыя], тӥ дорысь соосты уг улля, тӥледлы соос кыӵес интыын луозы, соослэн инмаръёссы тӥ понна калтон интыын луозы».
4Кузё-Инмарлэн Кылчинэз та кылъёсты вань израиль пиослы верам бере калык, бадӟым куаразэ поттыса, зар бӧрдыны кутскиз.5Соин ик та интыез Бохим*а шуизы. Отын соос Инмарлы курбон сётӥзы.
6Иисус*б калыкез кошкыны лэзем бере израиль пиос [котькудӥз ас дораз], аслаз люкетлы басьтоно музъем вылаз кошкиз.7Иисуслэн вань улон нуналъёсаз, Иисус бере улыны кылем тӧроослэн, Кузё-Инмарлэсь Израильлы возьматэм вань быдӟымесь ужъёссэ адӟемъёсызлэн, вань улоно нуналъёсазы калык Кузё-Инмарлы ужаса-тыршыса улӥз.
8Сю дас арес луыса, Кузё-Инмарлэн ляльчиез, Навин пи Иисус, кулӥз.9Сое Фамнаф-Сараиысь люкетлы басьтэм музъем вылаз, Ефрем гурезе, Гааш гурезьлэн уйпалаз ватӥзы.10Вань та калык асьсэлэн атайёссы доры кошкем бере вордӥськиз мукетыз выжы, кудъёсыз уг тодо вал Кузё-Инмарез, Солэсь Израильлы возьматэм ужъёссэ но уг тодо вал.
11Соку израиль пиос Кузё-Инмарлэн син азяз лекесь ужъёс лэсьтыны, ваалъёслы йыбыртъяны кутскизы.12Соос атайёссылэсь Инмарзэс – соосты Египет музъемысь поттӥсь Кузё-Инмарез – палэнтӥзы; соос мукет инмаръёс пала берытскизы, котыразы улӥсь калыкъёслэн инмаръёссы пала, соослы йыбыртъяны кутскизы, – озьы соос Кузё-Инмарлэсь вожзэ поттылӥзы.13Кузё-Инмарлэсь палэнскизы, Вааллы, астартаослы йыбыртъяны кутскизы.
14Израиль вылэ Кузё-Инмарлэн вожпотонэз ӝуатскиз, соосты Со лушкась-таласьёс киулэ сётӥз – соос соосты лушкаса-таласа возизы; котыразы улӥсь тушмонъёс киулэ соосты сётӥз, соку соослэн тушмонъёссы азьын сылыны кужымзы ӧз ни тырмы.15Кытчы гинэ соос ӧз мынэ, котькытын но Кузё-Инмарлэн киыз соослы пумит вал, кызьы Кузё-Инмар соослы шуылӥз, кызьы соос азьын Кузё-Инмар кыл сётӥз. Соослы туж ӝикыт-ёркыт вал.
16Соку Кузё-Инмар [соослы] судьяос сётӥз, соос лушкась-таласьёслэн киулысьтызы соосты утьылӥзы.17Нош соос судьяослэсь но ӧз кылзӥське, азыса-калгыса ветлӥзы мукет инмаръёс сьӧры, соослы йыбыртъязы, [озьы Кузё-Инмарлэсь вожзэ поттылӥзы], ӝоген атайёссылэн Кузё-Инмарлэн курон-косонъёсызлы тэрытскыса ветлон сюрес вылысьтызы кожизы. Соос атайёссы кадь ӧз улэ.
18Кузё-Инмар соослы судьяос пуктэм бере Ачиз Кузё-Инмар судьяосын ӵош вал, судьяослэн вань улоно нуналъёссы ӵоже Со соосты тушмонъёссылэсь утиз, уго Кузё-Инмар, ултӥясьёслэн, ӝикатыса-ёртыса возисьёслэн курадӟытэмзылы чидатэк ӝуштэмзэс-лулӟылӥськемзэс кылыкуз, соосты жаля вал.19Нош судья кулэ ке, соку ик соос атайёссылэсь но уродэсь ужъёс лэсьтылӥзы: мукет инмаръёс пала берытско но, соослы ужаса-тыршыса, йыбыртъяса улыны кутско. Урод ужъёс лэсьтэмысь ӧз дугдылэ, кырыж сюрес вылысьтызы [ӧз но кожылэ].
20Соку Кузё-Инмарлэн вожпотонэз Израиль вылэ ӝутскиз но Со шуиз: «Атайёссылы сётэм сӥзён-косонэз сӧрыса улэмзы понна, Мынэсьтым верамме кылзӥськымтэзы понна,21та калык пӧлысь [Навинлэн пиез] Иисус кулыкуз [та музъем вылэ] кельтэм мукетъёссэ калыкъёсты уг ни улля,22со калыкъёсын Израильлэсь визьзэ сынало, учко-чаклало: Кузё-Инмарлэн сюрес вылаз возиськозы-а, уз-а, Солэн сюресъёсыз кузя ветлозы-а, уз-а, кызьы ветло-возисько вал соослэн атайёссы?»23Кузё-Инмар та калыкъёсты кельтӥз, соку ик соосты ӧз улля, Иисуслэн киулаз ӧз сёты.
*а 2:5 Бохим – «бӧрдӥсьёс» шуэм луэ
*б 2:6 татын Иисус Навин сярысь вераськон мынэ
Глава 2