Выбрать язык
Книги Ветхого Завета
Книги Нового Завета
с русским текстом1Иисус*а кулэм бере израиль пиос Кузё-Инмарлэсь юаса шуизы: «Ми пӧлысь кин нырысь ик мыноз хананейёс вылэ – соосын ожмаськыны?»2Кузё-Инмар шуиз: «Иуда мыноз, тани, Мон музъемез со киулэ сётӥсько».
3Нош Иуда аслаз Симеон братэзлы шуиз: «Люкет басьтонам пыриськы: хананейёсын ожмаськыны кутском; мон но тынад люкет басьтонад пырисько». Симеон соин ӵош мынӥз.
4Иуда ожмаськыны мынӥз; хананейёсты, ферезейёсты Кузё-Инмар соос киулэ сётӥз; соос пӧлысь дас сюрссэ соос Везеке погыртӥзы.5Везекысен соос Адони-Везекен ваче пумиськизы, ожмаськыны кутскизы, хананейёсты, ферезейёсты соос вормизы.6Адони-Везек бызьыса кошкиз, нош таос со сьӧры уйиськыса мынӥзы но кутӥзы сое, киысьтыз пӧлызэ, пыдысьтыз бадӟым чиньызэ ӵогыса куштӥзы.7Соку Адони-Везек шуиз: «Киысьтызы пӧлызы, пыдысьтызы бадӟым чиньызы ӵогем сизьымдон эксэйёс ӝӧк улысьтым нянь пыры бичаса улӥзы; кызьы мон лэсьтӥ, озьы ик мыным но Инмар пунэмзэ берыктӥз». Сое Иерусалиме вайизы, отысен со кулӥз.
8Иуда пиос Иерусалимлы пумит ожмаськизы, сое киултӥзы, мечен-палашен коразы, городэз тылын сутӥзы.9Собере Иуда пиос гурезьёсын, лымшорпал музъемын, улыго интыосын улӥсь хананейёсын ожмаськыны мынӥзы.
10Собере Иуда Хевронын улӥсь хананейёслы пумит ожмаськыны вырӟиз, – азьвыл Хеврон Кириаф-Арба шуыса нимаське вал, – отысен со погыртӥз Шешаез, Ахиманэз но Фалмаез [Енак выжыысь].11Отысен со Давирын улӥсьёс вылэ ожмаськыны мынӥз; Давирез азьвыл Кириаф-Сефер шуыса нимало вал.12Халев шуиз: «Кин Кириаф-Сеферез киултыны быгатӥз ке, солы Ахса нылме кышнолы сёто».13Сое Гофониил, Халевлэн Кеназ вынызлэн пиез, киултӥз, соку Халев Ахса нылзэ Гофонииллы сётӥз.
14Картэз сьӧры кошкон азяз Гофониил Ахсаез атаезлэсь аслыз бусы люкет курыны ӝутказ. Ахса ишак вылысьтыз васькиз. Соку Халев солэсь юаз: «Мар тыныд кулэ?»15Ахса солы шуиз: «Бакель кар монэ: тон мыным лымшорпал музъемез сётӥд, вай мыным ву сётӥсь ошмесъёстэ но». [Солэсь мылкыдзэ-куронзэ тодыса], Халев Ахса нылызлы вылӥысьсэ но, улӥысьсэ но ошмесъёсты сётӥз.
16Кеней [Иофорлэн], Моисейлэн варматаезлэн, пиосыз Пальмаё карысь Иуда нылпиосын ӵош Арадлэн лымшор палаз интыяськем Иудей кыре кошкизы: татчы вуыса, израиль калык пӧлы улыны интыяськизы.
17Иуда Симеон братэныз ӵош мынӥз но Цефафын улӥсь хананейёсты погыртӥзы, соослэсь городзэс каргаса куашкатӥзы, соин ик со ”Хорма” шуыса нимаське.
18Иуда Газаез но со котырысь музъемез, Аскалонэз но со котырысь музъемез, Екронэз но со котырысь музъемез [Азотэз но со котырысь музъемез] аслыз кариз.
19Кузё-Инмар Иуда палан вал, соин ик со гурезез аслыз кариз; нош нёжалын улӥсьёсты улляны ӧз быгаты, малы ке шуоно соослэн ожмаськыны корт уробооссы вал.
20Халевлы Хевронэз сётӥзы, кызьы шуэ вал Моисей, [отын аслыз люкетлы со Енак пиослэсь куинь городзэс басьтӥз] но отысь Енаклэсь куинь пиоссэ улляз.
21Иерусалимын азьвыл улэм иевусейёсты Вениамин пиос ӧз уллялэ; Вениамин пиосын ӵош иевусейёс туннэ нуналозь но Иерусалимын уло на.
22Иосифлэн пиосыз но Вефильлы пумит мынӥзы, Кузё-Инмар соос палан вал.23[Дугдыса] Иосиф пиос Вефиль каре (азьвыл со Луз шуыса нимаське вал) эскерись-чаклась муртъёсты ыстӥзы.24Возьмаськисьёс городысь лыктӥсь адямиез адӟизы, [сое киулазы басьтӥзы] но солы шуизы: «Возьматы милемлы городэ пыронэз, соку ми тонэ вӧсь ум каре».
25Со соослы городэ пыронэз возьматӥз, соос городын улӥсьёсты меч улэ погыртӥзы, нош та адямиез, солэсь вань ӵыжы-выжыоссэ лэзизы.26Та адями хеттейёслэн музъемазы мынӥз но город пуктӥз, солы Луз ним сётӥз. Та ним туннэ нуналозь улэ.
27Манассия Беф-Санын, [мукет нимыз Скифополь], улӥсьёсты ӧз улля, со котырысь гуртъёсын улӥсьёсты но, Фаанахын но со котырысь гуртъёсын улӥсьёсты, Дорын но со котырысь гуртъёсын улӥсьёсты, Ивлеамын но со котырысь гуртъёсын улӥсьёсты, Мегиддонын но со котырысь гуртъёсын улӥсьёсты ӧз улля; хананейёс та музъеме улыны кылизы.28Израильлэн кужымез юнмам бере со хананей калыкез аслыз выт тырись кариз, нош улляны ӧз улля.29Ефрем выжы но Газерын улӥсь хананейёсты улляса ӧз лэзьы; соос пӧлын, Газерын, улӥзы хананейёс, [солы выт тыризы].
30Завулон но Китронын, Наглолын улӥсьёсты ӧз улля, хананей калык соос пӧлын улӥз но соослы выт тыриз.
31Асир но Аккоын улӥсьёсты ӧз улля, [соос солы выт тыризы, Дорын улӥсьёсты но], Сӥдонын, Ахлавын, Ахзивын, Хелваын, Афекын, Реховын улӥсьёсты но ӧз улля.32Асир выжы улӥз та музъемын улӥсь хананейёс пӧлын, уго соосты улляны ӧз быгаты.
33Неффалим но Вефсамисын, Беф-Анафын улӥсьёсты ӧз улля, хананейёс пӧлын – та музъемын улӥсь калык пӧлын – улӥз; Вефсамисын, Беф-Анафын улӥсьёс солы выт тыризы.
34Аморрейёс Дан пиосты гурезьёсын ӝикатыса возизы, нёжалэ васькыны ӧз лэзе.35Аморрейёс Херес гурезе улыны кылизы, [кытын уло гондыръёс, ӟичыос], Аиалонэ, Шаалвиме; но Иосиф пиослэн кизы вормиз [аморрейёсты], соос выт тырыса улӥсь калык луизы.36Аморрейёслэн улон интызы Акравим вырйылысен Селаозь, эшшо кыдёкегес но кыстӥськиз.
*а 1:1 татын Иисус Навин сярысь вераськон мынэ
Глава 1