Выбрать язык
Книги Ветхого Завета
Книги Нового Завета
с русским текстомЛемуилонь валонза
1Лемуил оцязорть смузю валонза. Ня валхнень тейнза тонафтозень тядяц:
2 Цёраняй! Цёранязе, конань мон шачфтыне,
цёранязе, Шкаень кядьста анафкязе!
3 Тяк макса вийцень аватненди,
эряфонь кицень – оцязоронь юмафтыхненди.
4 Аф оцязорхненди, Лемуил,
аф оцязорхненди симондема винада,
и аф азорхненди – пуреда,
5 афток синь иредихть и юкстасазь койть,
и люпштафнень кадсазь виде судфтома.
6 Максода пуре юмайхненди-арайхненди,
и вина – ризнайхненди.
7 Катк синь симихть и юкстасазь ашушиснон
и оду аф лятфтасазь маятамаснон.
8 Пшкятть-корхтак кяльфтомоть инкса,
сембе ямбархнень инкса.
9 Пшкятть-корхтак инксост и макст тейст виде суд,
видеста якафтк ашуть и ямбарть тевснон.
Цебярь рьвять шнамац
10 Кода мумс цебярь рьвя?
Сон жемчукта сяда питни.
11 Мирдец сембе седиса надияй лангозонза,
и тя мирдсь аф ляды сатфксфтома.
12 Сон сембе эрьфонцберьф тиенди мирденцты пара,
сон аф канды тейнза зиян.
13 Сон кочкай пона и иляназ,
и эсь кядьсонза, пара мяльса, покоди.
14 Сон кода мишендиень-рамсиень оцю венчне,
ичкозде усксы кшинц.
15 Сон стяй, мзярда нинге шобда,
и аноклай кудэряензонды ярхцамбяль,
явсы аваурензонды ярхцамань талекаснон.
16 Сон муй цебярь пакся и рамасы сонь,
и эсь покодеманц вельде сатф ярмакта озафты виноградонь пере.
17 Сон карксасы перьфонц вийса
и илештьф ожат кярьмоди тевс.
18 Сон няйсы: мишендемац-рамсемац моли лац,
ветеньге аф мадонды сонь валдоптомац.
19 Сон венептьсыне кядензон кштирдемати,
и суронза аф нолнесазь кштирть.
20 Сонь кядьлапшец панчф ашуфненди,
и кядец венептьф ашса эряйхненди.
21 Ловста-якшамста сон аф пели кудэряензон инкса,
сяс мес сембе синь щафт кафтонь щамса.
22 Сон тиенди вельхкст-ацапт эсь вастонцты;
сонь щамонза стафт-кодафт шуваня иляназста и якстерь понань сюреста.
23 Мирденц содасазь ошень ортатнень ваксса,
сон озаф эсь масторонь оцюнянзон ёткса.
24 Цебярь рьвясь тиенди иляназонь панархт и мишендьсыне синь,
сон пачфни каркст Финикиянь мишендихненди-рамсихненди.
25 Нардешиц и шнави ломанькс лувомац – сонь щамонза,
сон кенярдезь ваны вандыень шити.
26 Сон панчсесы кургонц смузьшинь азомс,
сонь кяльбрясонза сятяв ёньц тонафтома.
27 Сон ваны кудъётконь тефнень мельге,
и аф ярхцай нолашинь кшида.
28 Сонь иденза стяйхть и мярьгихть тейнза: «Тон павазуват»,
мирдецка шнакшнесы сонь:
29 «Цебярь рьвада лама,
но тон ёткстост сембода цебярсят».
30 Мяльс тумась васькафты и мазышись шава,
но рьвясь, кона пели Азорда, улеза шнаф!
31 Максода тейнза казне пара тевонзон коряс,
и катк тевонза шнасазь сонь ошень ортатнень ваксса!
Глава 31