Выбрать язык
Книги Ветхого Завета
Книги Нового Завета
с русским текстомАгуронь валонза
1Агуронь, Иакеень цёранц, валонза и смузю корхтаманза. Вага мезе тя ломанць мярьгсь Ифиилонди, Ифиилонди и Укалонди*а:
2 Афкукс, лия ломаттнень коряс мон сембода аф ёнюсь,
и монь аш прявиезе, кона эряви ломанти,
3 мон ашень тонафне смузьшити
и монь аш содамошине Иняруть колга.
4 Кие кеподсь менели и валгсь тоста?
Кие кочказе вармать эсь курмозезонза?
Кие ашкодозе ведть щам потмос*б?
Кие путозень модань сембе петнень?
Кода сонь лемоц и кода цёранц лемоц,
Тон вдь содасак!
5 Шкайть эрь валоц ару, кода серептьф зрня;
Шкайсь араласыне сятнень, кит надияйхть лангозонза.
6 Мезевок тят полаткшне Сонь валонзонды,
афток Сон сюцетянза, и тон лисят васькафникс.
7 Кафтонь колга мон Тейть эняльдян,
тя кафтса тят атказа тейне, мзярс мон шисан:
8 аерфтк эздон шава и васькафни валонь корхтамать,
тят макса тейне аф ашуши, аф козяши,
но эрь шиня макссек тейне кши талеказень;
9 афток, вельф ярхцазь, шарфтан эздот
и мярьган: «Кие Азорсь?»,
али, улемок ашукс, карман салсема
и сувафтса Шкаезень лемонц визьксс.
10 Тяк сялда покодить азоронц инголе,
афток покодись сюдотанза и тон лядат муворукс.
11 Ули юром, кона сюдосы алянц
и аф бславасы тядянц.
12 Ули юром, кона ару эсь сельмосонза,
хуш апак штак эсь рдаздонза.
13 Ули юром, вай, конашкава прянь няи сельмованфоц
и кода вярьге кандсы прянц!
14 Ули юром, конань пеенза кода торхт
и пей пакаренза кода пеельхть,
синь мяльсна каподемс ашуфнень масторлангста,
ашса эряйхнень ломаттнень ёткста.
15 Улихть ломатть, конат педли лацот,
макст и макст тейст.
Ва ня колмотне мзярдовок аф топафтовихть,
и нилетне мзярдовок аф мярьгихть: «Саты!» –
16 Тонашись, аф шачфни потмось,
модась, конанди фалу кржа ведьта,
и толсь, кона аф мярьги: «Саты!»
17 Сельмоть, кона пеетькшни алянц лангса
и безярди тядянцты кулхцондомада,
пупстыесазь паксянь варсихне
и сивсазь куцьканонь лефксне!
18 Ня колмотне тейне апак панчт,
и ня нилетне тейне аф шарьхкодевихть:
19 куцьканонь китне менельса,
куень китне кевбандова,
оцювенчень китне ведть кучкава
и цёрань китне стирти.
20 Усксеви рьвять киц тяфтама:
ярхцась, нардазе кургонц
и корхтай: «Мон мезевок кальдяв ашень тие».
21 Ня колмотнень эзда модась комболды,
и нилетне тейнза аф кирдемшкат:
22 уресь, кона тиеви оцязоркс;
ёньфтомось, кона топодемс ярхцай кшида;
23 аеркс авась, кона лиси рьвакс,
и авауресь, кона сявсы азораванц вастонц.
24 Ва тя нилетне масторлангса ёмлат,
но синь смузюдонга смузюфт:
25 панжапне – вийсна аф оцю,
но кизонда анокласазь ярхцамбяльснон;
26 пандонь шеерхне*в – лафчт,
но пизоснон тиендьсазь кевбандова;
27 циледихнень аш оцязорсна,
но синь молихть марса, ряцок-ряцок, кода ушмовий*г;
28 нетьказсь кундави кядьса,*д
но эрси оцязоронь куттнень потмоса.
29 Ва ня колмотне прянь кандозь шятяйхть,
и нилетне эсь питнень содазь молихть:
30 лефсь, вирьбаксянь жувататнень ёткса инь виись –
киньге инголе аф потай;
31 прянь няи атёкшсь*е, атясявась,
и эсь ломаньтналонц инголи лисьф оцязорсь.
32 Кда тон ёньфтомашидот шнафтоть пря
и арьсеть зиян,
эста пякстак кургцень кядьса.
33 Вдь лофцонь пихтемась тии вай,
шалхка ланга эрьхтемась – вер,
и кяжень крьвястемась – сялондома.
*а 30:1 али: Вага мезе тя ломанць мярьгсь: «Шкайняй, конашкава мон сизень. Шкайняй, конашкава мон сизень, монь вийне маштсть»
*б 30:4 Лиякс мярьгомс: Кие путозе ведть коволть потмос.
*в 30:26 Евреень текстса: даматтне. Даман – паксянь нумолшка, кевбанттнень ёткса эряй жуватаня.
*г 30:27 ушмовий (сире вал) – армия, войско
*д 30:28 Синодальнай ётафтомаса: Котфонь кодай унжась кирди мадянянзон вельде
*е 30:31 Синодальнай ётафтомаса: кильтьф лишмось
Глава 30