Выбрать язык
Книги Ветхого Завета
Книги Нового Завета
с русским текстом1Кие сюцемда-тонафтомда меле ляды кашанкс,
ся апак учентт прай – и аф пчкафтови ни.
2 Мзярда ламолгоды видексшинь ломаттнень лувкссна,
эста ломаньтналсь кеняртькшни,
а мзярда азорондай шкайфтомось,
ломаньтналсь куфци.
3 Кие кельги смузьшить, ся кеняртьфтьсы алянц;
кие бралги усксеви аватнень мархта, ся карьхцясы уликсонц.
4 Видеста судендай оцязорсь кемокстасы масторть,
а казнень кельгись – срафтсы-калафтсы сонь.
5 Кие сельмос пяк шнасы ялганц,
ся атци сонь пильгалонза кундамат.
6 Кальдяв ломанть кунцесы сонцень пежец,
а видексшинь ломанць кеняртькшни и морай.
7 Видексшинь ломанць содасы: ашутьке судонь тевоц ванома видеста,
а шкайфтомось аф пичеди колганза.
8 Кяжиста пеетькшнихне кеподихть ошса комболдома,
а смузюфне сетьмофтьсазь кяжень лакамать.
9 Мзярда ёнюсь судендай ёньфтомоть мархта,
ёньфтомось али сялонды, али рахси – аф содай ваймама.
10 Веронь валыхне сельмоса афолезь няе аф муворуть,
а виде ваймотне пичедихть сонь эряфонц инкса.
11 Ёньфтомось валсы сембе кяженц,
а смузюсь учи сонь ётаманц.
12 Мзярда оцюнясь кулхцонды васькафнемат,
эста сембе сонь покодиензовок арайхть зиянонь тиикс.
13 Ашусь и люпштаец ва мезьса малат:
Азорсь тяндиге-тонандиге макссь эряф.
14 Кда оцязорсь судендасы ашуть видешить коряс,
эста сонь оцязорондамац кемокстави пефтома пингс.
15 Ились и сюцемась-тонафтомась максыхть смузьши;
но идсь, конань мельге аф ваныхть, сувафтсы тядянц визькс шамас.
16 Мзярда ламолгодыхть шкайфтомотне, эста ламолгоды зиянонь тиемась;
но видексшинь ломаттне няйсазь синь прамаснон.
17 Сюцек-тонафтк цёрацень, и седице аф кармай пичедема инксонза;
сон канды тонь ваймозт кенярдема.
18 Мзярда пророкнень эзда аш няйфкс*а,
эста ломаньтналсь лиси кедьстонза,
но конашкава павазу ся, кие тиенди койть коряс!
19 Уресь валса аф тонафтови,
хуш сон и шарьхкодьсы азфть, но сяка аф кулхцонды.
20 Тон няендеть ломань, кона апак арьсек азсы валонц?
Ёньфтомоть лангс надиямась сяда оцю.
21 Кда уреть ёмластокиге трямс-касфтомс ляпошиса,
меколи сонь эвондай мялец улемс азоронь цёракс.
22 Кяжи ломанць ушеткшни сялондомат,
и эсь прянь аф кирдись тиенди лама пеже.
23 Прянь няемась ёмлалгофтсы ломанть,
а сятяв ваймось ули шнаф-кепотьф.
24 Кие вяти марстонь тефт салаень мархта,
ся аф кельгсы эсь ваймонц;
сон кульсы, кода судса сюдосазь салайть, но аф виденцяй.
25 Ломаньда пелемась путни кундамат,
а кие надияй Азорть лангс, сянди аш мезьда пелемс.
26 Ламонцне вешендьсазь оцюнять пара мяленц,
но виде судсь Азорть эзда.
27 Видексшинь ломаттне туткодыхть зиянонь тиида,
и шкайфтомотне – виде киге молида.
*а 29:18 няйфкс – видение
Глава 29