Выбрать язык
Книги Ветхого Завета
Книги Нового Завета
с русским текстом1Шкайфтомось ласьки, хуш кивок мельганза аф пани,
а видексшинь ломанць, кода леф – сон аф пели.
2 Мзярда масторса лама коень коламада, эста тоса лама азорда;
а смузю и шарьхкоди азор мархта масторсь кирди кемоста.
3 Ашусь, кона люпшнесыне лафчнень,
кода резняй пизем, кона юмафтсыне-арафтсыне сёронь касыкскятнень.
4 Коень кадыхне шнасазь шкайфтомотнень,
а коень пяшкодихне каршект тейст.
5 Кальдяв ломаттне аф шарьхкодьсазь, мезсь виде и мезсь аф,
а сят, кит вешендьсазь Азорть, шарьхкодьсазь тянь педа-пес.
6 Аф муворуста эряй ашусь сяда пара
козять коряс, конань кинза кичкорхт.
7 Коень ванфтысь – ёню цёра,
а кие ялгафты ярмаконь карьхцяйхнень мархта – ся сувафтсы эсь алянц визькс шамас.
8 Кие касфнесы козяшинц, пандомда максомста оцю питнень сявозь,
ся кочкасы козяшинц сятненди, кит лездыхть ашуфненди.
9 Кие паннесыне пилензон коень валхнень эзда,
сянь озондомацка Азорти туткоткс.
10 Кие виде вайме ломанть вятьсы зиянонь ки лангс,
ся сонць прай эсь лоткозонза,
а аф муворуфненди максови пара талека.
11 Козя ломанць – смузю эсь сельмосонза,
но ашусь, конань ули шарьхкодемац, пачк няйсы сонь.
12 Мзярда азорондайхть видексшинь ломаттне,
эста сембе пяк кеняртькшнихть,
мзярда кепсихть шкайфтомотне,
ломаттне кяшендихть.
13 Кие сёпсыне эсь пежензон, сянь аф ули сатфксоц;
а кие виденцяй и кадсыне синь, ся ули кельгозь ужяльтьф.
14 Павазу ся ломанць, кона фалу пели Азорда;
а кие кевонзафтсы седиенц, ся пови зиянц.
15 Кодама рнай лефсь и врьгяти офтсь,
тяфтама ашушиса эряйхненди – шкайфтома оцюнясь.
16 Ёньфтома оцюнясь кармай салсема эсь ломаньтналонц кядьста,
а оцюнясь, кона афолезе няе нелькф козяшить, кувалгафтсы эряфонц.
17 Кие мувору ломанень веронь валомаса,
ся куломозонза кармай ласькондема-кяшендема.
И катк кивок аф лезды тейнза.
18 Кие эряй аф муворуста, ся ули идеф;
а кие якай кичкор киге, ся апак учентт прай.
19 Кие сокасы-видесы моданц,
ся топодемс ярхцай кшида,
а кие ётафнесы пингонц, панцемок шавонь мельге,
ся топафтови ашса.
20 Ломанць, конань лангс ули кода надиямс, ули козяста бславаф,
а кие эряскоды куроконе козякодомс, аф мяни наказамада.
21 Кирдемс кинь-бди фкять ширенц – тя аф пара тев,
но сембе сяка, ломанць кши сускомонксонга анок тиемс пеже.
22 Жаднай ломанць эряскоды козякодомс,
и аф содасы: сонь учсы ашуши.
23 Сельмос сюцись-тонафтысь
ламбама валонь корхтайда шнави.
24 Кие салси тядянц-алянц уликсонц, и корхтай: «Тя аф пеже»,
ся зиянонь тиихнень ялгасна.
25 Жаднай ломанць крьвясти сялондомат,
а Азорть лангс надияйсь кармай эряма сатыксса.
26 Кие надияй эсь прянц лангс, ся ёньфтома,
а кие якай смузьшинь киге, ся идеви.
27 Кие максы ашувонди,
ся аф кармай содама аш,
а кие шарфни сельмонзон ашуть эзда,
сянь лангс прай лама сюдома.
28 Мзярда кепсихть шкайфтомотне,
ломаттне кяшихть,
а мзярда синь машфтовихть,
касы видексшинь ломаттнень лувкссна.
Глава 28