Выбрать язык
Книги Ветхого Завета
Книги Нового Завета
с русским текстом1Тят шнафта пря вандыень шиса,
сяс мес аф содасак, мезе сон канды.
2 Катк тонь шнатанза лиясь, а аф тонцень кургце,
ширденнесь, а аф тонцень трватне.
3 Кевсь стака, шуварське аф тёждя;
но синдедост стака – кирдемс ёньфтомоть кяжень сафты тевонзон.
4 Кяжсь казяма, пялясшись, кода шада;
но кинди кирдеви кунелямась?
5 Сельмос сюцемась-тонафтомась
салавань кельгомада цебярь.
6 Кельги ялгать апрякаманзовок тя кельгома,
а душманть палсеманзовок аф видет.
7 Топодьстось медень кярьмасненьге тапасыне,
а вачедоти сембе сяпись маряви ламбамкс.
8 Ломанць, кона кадсы эсь эряма вастонц,
кода нармонь, кона кадсы эсь пизонц.
9 Танцти шине вайсь и ладанць кеняртьфтихть седи;
и пяк пара кулемс седи ваксста максф ёнць ялгань эзда.
10 Тяк кадонда эсь ялгацень и аляцень ялганцка.
Лисендяряй кальдяв – тят яка брадцень кудозонза:
маласа эряй шабрась
ичкозе эряй брадта пара.
11 Цёрай, ульхть смузюкс и кеняртьфнек седиезень;
эста монь кармай улема, мезе азомс сялдыезень каршес.
12 Ёнюсь няи зиян и кяши;
а эряфонь аф содайхне молихть сяда тов и токавихть.
13 Сявк сянь щамонц, кие макссь вал пандомс аф содаф ломанть шумонзон,
и киртьк тя щамть эсь кядьсот, кода кемокстама шумоть мрдафтоманц колга.
14 Кие варьхмодемшовор вярьгак вайгяльхть шумбраксни ялганц мархта,
сянь лувсазь сюдыкс.
15 Кудбряста путняй ведсь
и изгорды-сялонды рьвясь – фкат:
16 кие ёрай лоткафтомс тяфтама рьвять, ся ёрай лоткафтомс вармать,
али кирдемс курмозьса вайшуфтонь вайть*а.
17 Кшнись шовави кшниса,
а ломанць – лия ломаньца.
18 Кие якай-ваны смоква шуфтть мельге, ся ярхцай имождонза;
кие лац покоди азоронц лангс, ся ули шнаф.
19 Кода шамась няеви ведьса,
стане ломанць няеви эсь седиенц вельде.
20 Тонашись и юмамась-арамась аф содайхть топафкс,
тяфта жа аф топафтовихть ломанень сельмотневок.
21 Сиять ароптсазь шяняфтомань кядьгоса, зрнять варжасазь пянакудса,
а ломанць варжави-содави шнама вельде.
22 Ёньфтомоть хуш томбак шоварса-петькольса сёра мархта марса,
эстонга аф явфтови эздонза ёньфтомашиц.
23 Содак, кода ащихть тонь жувататне,
лацкас ватт стадацень мельге,
24 сяс мес козяшись аф пефтома пингс,
и оцязоронь каштазсь – аф юромста юромс.
25 Мзярда тишесь лятьф и эвондайхть од лисьфкат,
мзярда пандонь тишетне урядафт,
26 эста учатне улихть тейть щамонди,
и атясяватне – паксянь рамамс.
27 Сявань лофцсь саты эстейть ярхцамс,
кудсот эряйхнень каванямс
и пялот покоди аватненьге андомс.
*а 27:16 вайшуфтонь вай – оливковое масло
Глава 27