Выбрать язык
Книги Ветхого Завета
Книги Нового Завета
с русским текстом1Кода кизонда ловсь и нумань пингста пиземсь,
стане ёньфтомоти аф ладяй шнамась.
2 Кода нармонць либорди, кода пзьгатась лии,
тяфта туфталфтома азф сюдомась ётай вакска.
3 Алашати – локша, ишимти – пандоз*а,
а ёньфтомотнень копорьснонды – байдек.
4 Тят корхта ёньфтомоть каршес сонь ёньфтомашинц коряс,
афток тонцьке арат лацонза.
5 Ёньфтомоть каршес корхтак сонь ёньфтомашинц коряс,
тяза ара смузюкс эсь сельмосонза.
6 Кие кучсы ёньфтомоть кулянь пачфтема,
ся керсыне эсь пильгонзон и кирди оцю зиян.
7 Кода лафча пилькне аф кандыхть лезкс шаморти,
стане валмуворксське аф канды лезкс ёньфтомоть кургса.
8 Кода пращас*б кевонь сотомась,
стане ёньфтомоти шнамась.
9 Кода пиди палакссь ирецтоть кядьса,
стане валмуворкссь ёньфтомоть кургса.
10 Кие сиводи ёньфтома али вакска ётай-потай ломань,
ся тии налса ляцить лаца, кона кинь лангс повсь нолясы налонц.
11 Кода пинесь мрдай уксолксонцты,
стане ёньфтомоське омбоцеда тисы ёньфтома тевонц.
12 Тон няендеть ломань, кона смузю эсь сельмосонза?
Содак, ёньфтомоть тонафтомац сондедонза тёждя.
13 Нолапарсь корхтай: «Кить лангса леф!
Лефсь якай-шяяй мишендема-рамсема вастова!»
14 Кенкшсь шаронды петлянзон лангса,
нолапарсь – вастонц лангса.
15 Нолась нолдасы кяденц шавати,
а кургозонза пачфтемс стака.
16 Нолась эсь сельмосонза
сисем ёнюста корхтай ломаньда смузю.
17 Суски пинеть пиледа усксы
ся, кие вакска ётамста эци лиятнень сялондомазост.
18 Ёньда лисьфсь ёряй толонь налхт и види кулома,
19 сонь лацонза сявок, кие васькафнесы ялганц,
и меле корхтай: «Мон тянь тиине аф прокс, а пеетькшнемга».
20 Коса аш пенгат, тоса толсь мады,
коса аш корхтафты ломань, тоса сялондомась сетьми.
21 Сеттнень эзда – пси, пенгатнень эзда – тол,
а сялондыть эзда – аф ладяма.
22 Корхтафтыть валонза – кода танцти ярхцамбяль,
синь крхкаста сувайхть ломанть потмос.
23 Ляпе валхне кальдяв ломанень кургса,
кода уцез сия, конань мархта архтф сёвонень кукшенць.
24 Душманць сельмос корхтай ляпоняста,
а седисонза канни зиянонь мяльхть.
25 Хуш сон корхтай ялгань вайгяльса, тят кема тейнза,
сяс мес седисонза сисем туткоткс мяльхть.
26 Хуш сонь аф кельгомац кяшф шамафксса,
кальдявшиц сяка панжеви сембонди.
27 Кие шуви лотка, ся сонць прай эзонза,
и кие вярипантт тутмади кев, сянь лангс сон мрдай.
28 Васькафни кяльсь афолезе няе сянь, кинь васькафты,
и ламбамста корхтай трватне аноклайхть прама.
*а 26:3 пандоз – узда
*б 26:8 Праща – кунардонь пингонь тюрембяль, сонь вельденза ляцендсть кефт.
Глава 26