Выбрать язык
Книги Ветхого Завета
Книги Нового Завета
с русским текстомСоломононь нинге лия валмуворксонза
1Нятка Соломононь валмуворксонза, конатнень кочказь Езекиянь, Иудеянь оцязорть, ломаненза.
2 Шкайть иневалдоц – салавашинь кяшемаса,
а оцязорхнень иневалдсна – салавашинь шарьхкодемаса.
3 Кода менелень сересь и мода потмонь крхкалмось,
стане оцязоронь седиське – аф шарьхкодеви.
4 Явфтк рдазть сияста,
и машты кядь покодись тии сиянь кукшень;
5 паньк шкайфтомоть оцязорть маласта,
и оцязоронь озама вастсь кемокстави видексшиса.
6 Тяк оцюлгофне пряцень оцязорть инголе,
и оцюнятнень ваксс тят стякшне.
7 Вдь сяда пара, мзярда мярьгихть тейть: «Сак сей, сяда вяри»,
сянь вастс, мзярда тонь ёмлалгофттядязь оцюнянь инголе.
Мезе няйсть тонь сельмотне,
8 сянь тяк эряскода кандомс судс,
афток мезе кармат тиендема тевть ваномдонза меле,
мзярда каршек молице сувафттанза визькс шамас?
9 Мзярда судса пялькстат каршек молицень мархта,
тят панчсе лиянь салаваши,
10 афток тянь кулиец апрякатанза тонь,
и тя визькссь аф валхтови лангстот.
11 Эсь пингстост азф валхне –
кода зрнянь марьхть сиянь шаваса.
12 Кулхцонды пилети смузю сюцемась-тонафтомась –
кода зрнянь пилькс и ару зрняста тиф крганят.
13 Кода кельме ведь копоркссь нумань пингста,
стане кучити кулянь пачфтиец, кона лац тисы тевонц,
сон эреклафтсы эсь азоронц ваймонц.
14 Кода коволхне и вармась, конат аф кандыхть пизем,
стане ломанць, кона шнафты пря казнеса, но аф казьсы.
15 Куватьс кирдемшкаса кяляцяви оцюнясь,
и ляпоста корхтамась томбасы пакарть.
16 Кда тон муть медь – ярхцак эздонза мерань содазь,
сивондярят пяк лама – уксондсак.
17 Пяк сидеста тят яка ялгацень пяли,
афток мольфтьсак мяленц и кармай машнема лангозт.
18 Кода тюремань байдексь, торсь и оржа налсь,
стане ломанць, кона судса васькафни маластонь ломаненц лангс.
19 Кода наксада пейсь и шамор пильгсь,
стане стака пингста валонь аф кирди ломань лангс надиямась.
20 Кода якшамста щамонь каяфтомась,
кода керф вастть лангс уксусонь каямась,
стане ризнай седити моронь морамась.
21 Кда думшанце вачеда, антк сонь;
кда сась симомац, макст тейнза ведь:
22 тяфта тиезь, тон вятьсак сонь визькс шамас*а,
и Азорсь пандсы тейть.
23 Кельме вармась канды пизем,
а кяльготни кяльсь – кяжи шамат.
24 Сяда пара эрямс кудвельхксть ужеса,
сялонды рьвя мархта оцю кудса эрямать вастс.
25 Кода шяйф потмоти кельме ведсь,
стане ичкоздень масторста саф пара кулясь.
26 Видексшинь ломанць, кона мяндеви шкайфтомоть валонц ала,
кода пяндра эши и рдаскофтф лихтибря.
27 Кода аф пара сивомс вельф лама медь,
стане жа аф пара фалу вешемс эстейть шнама.
28 Ломанць, конанди аф кирдеви эсь пряц,
кода срафтф-калафтф стена мархта ош.
*а 25:22 валда валс: «тяфта тиезь тон кочкат крфай сетть сонь прянц лангс»
Глава 25