Выбрать язык
Книги Ветхого Завета
Книги Нового Завета
с русским текстом1Мзярда озат оцюня мархта ярхцама,
тяк юксне, кие инголет.
2 Кда тон кельгсак лама ярхцамацень,
путт перяфкс клдомазт.
3 Тят кая сельме танцти каваняманц лангс,
вдь тя васькафни ярхцамбяль.
4 Тяк шава пряцень козяши мельге панцезь,
ульхть смузю и кадыть ня мяльхнень.
5 Варжакстат козяшить лангс, и сон аш ни;
сон касфты эстейнза пацят и,
кода куцькан, туй лиезь менели.
6 Тят ярхца сянь пяле, кинди ужяль кши сускомоц,
и тят кая сельме танцти каваняманзон лангс,
7 сяс мес потмова сон фалу луви.
«Ярхцак и сипть», – корхтай сон,
а седиец аф мархтот.
8 Ся аф ламоть, конань тон сивить, уксондсак,
и стак ётафтсайть эсь пара валхнень.
9 Ёньфтомоти аш месть корхнемс,
сон сяка пеедьсыне тонь смузю валхнень.
10 Тяк шашфне кунардонь межать
и тят эце уроснень паксяснон лангс,
11 сяс мес синь Аралайсна вии.
Сон вятьсы судонь тевснон каршек тейть.
12 Ладяк седицень ёньц путомати
и пилецень – тонафты валхненди.
13 Тяк кадонда од цёрать ёньц путомафтома.
Путондярят тейнза илиса, сон аф кулы.
14 Тон пикссак сонь илиса
и идесак ваймонц адта.
15 Цёрай! Кда тонь седице ули смузю,
эста монь седиезе кенярди,
16 сембе потмозе кенярди,
мзярда тонь трватне кармайхть корхтамонза видеть.
17 Катк тонь седице аф каяй сельме пежуфнень эряфснон лангс,
но фалу ули Азорда пеликс.
18 Эста тонь кармай вандыень шице,
и надияма вастце аф юмай.
19 Цёрай, кулхцондомак и ульхть смузюкс,
ладяк седицень виде кить лангс.
20 Тяк ётафне пингцень винань симондихнень
и сивольда тетькихнень мархта:
21 сяс мес симилась и тетькись ашулгодыхть,
и нувамась щасыне синь сязентьф-нозонтф панарса.
22 Кулхцонтк аляцень, кона макссь тейть эряф,
и тят безярда тядядот, мзярда сон сиреди.
23 Рамак видеши и тяк мишенде,
рамак смузьши, ёньц тонафтома и шарьхкодема.
24 Видексшинь ломанть аляц кармай кеняртькшнема,
и смузють шачфтыец ули павазу.
25 Катк кеняртькшни аляце
и кенярдемада морай тядяце, кона тонь шачфтонзе.
26 Цёрай, макск тейне эсь седицень,
и катк тонь сельмотне ваныхть монь кинень лангс.
27 Усксеви авась – тя крхка лотка,
и лиянь рьвясь – тяйня эши.
28 Сон ащи ужа фтала, кода салай-шави ломань,
и касфнесы полань полафнихнень лувксснон.
29 Кие вайксни? Кие куфци?
Кие сялонды? Кие пеняцяй?
Кие пикссеф туфталфтома?
Кие ваны якстерь сельмоса?
30 Ся, кие кельгсы кече вина мархта ащекшнемать
и кие фалу якай танцти винань варжама.
31 Тят вана винать лангс, кода сон якстерьгоды,
кода пиндолды кече потмоса
и кода тёждяста симови:
32 меле сон сусктанза куй лаца,
пупатанза равжа пря куйкс.
33 Эста тонь ёньце тапаряви
и сельмотне кармайхть всякаень няендема*а.
34 Тон кармат, кода оцюведь кучкаса уды ломань,
кода мачта пряс матф ломань.
35 И мярьгат: «Монь пикссемазь, но мон ашень маря сярятьф;
монь тутмиемазь, а мон тянь ашине шарьхкоде.
Мзярда сргозян,
тага карман винань вешендема».
*а 23:33 Синодальнай ётафтомаса: и сельмотне кармайхть ванома лиять рьванц лангс. Евреень текстса аш «рьвя» али «ава» вал.
Глава 23