Выбрать язык
Книги Ветхого Завета
Книги Нового Завета
с русским текстом1Пара лемсь оцю козяшида цебярь,
и цебярь валса шнамась – сияда и зрняда питни.
2 Козясь и ашусь ва мезьса малат:
тяньге-тонаньге тиезень Азорсь.
3 Ёнюсь няи зиян и кяши;
а эряфонь аф содайхне молихть сяда тов и токавихть.
4 Сятявшись и Азорда пелемась
кандыхть мархтост козяши, шнама и эряф.
5 Салава сускить кинц лангса сялги тишет и кундамат;
кинди питни ваймоц, ся кирдеза эздост ширеса.
6 Ладяк од цёрать виде ки лангс,
и сон аф шарфты эздонза сиредемстовок.
7 Козясь азорондай ашуть лангса,
и пандомда сявись тиеви урекс ярмаконь максыти.
8 Кие види аф видеши, ся нуй зиян,
сонь кяжень байдекоц синдеви и азорксшиц прай.
9 Кельгозь ужяльдись ули бславаф,
сяс мес сон явондсы эсь кшинц ашуфнень мархта.
10 Паньк кяжи пеетькшнить и аф ули каршек ащема,
лоткайхть пялькстоматне и фкя-фкянь сялдоматне.
11 Кие кельгсы седиень арушить и кинь корхтамац пети мяль,
сянди оцязорсь – ялга.
12 Азорть сельмонза ванфтсазь содамошить,
а васькафнить валонзон Сон тисыне модапулькс.
13 Нолапарьсь корхтай: «Ушеса леф!
Монь шавсамазь мишендема-рамсема вастть кучкаса!»
14 Крхка томба – усксеви авань трватне,
кие кяжияфтсы Азорть, ся тоза прай.
15 Ёньфтомашись педсь цёрань седити,
но ёньц путы ились паньцы тянь эздонза.
16 Кие люпштасы ашуть эсь козяшинц касфтоманкса,
и кие максси козяти, ся ашулгоды.
Смузюфнень валсна
17 Стяфтыть пилетнень, кулхцонтк смузюфнень валснон
и шарфтк седицень монь содамошизти.
18 Ули пяк пара, кда тон ванфтсайть ня валхнень эсь седисот
и путсайть синь эсь трватненди.
19 Ва мес мон тяни тонафтте тонь, самай тонь:
улеза Азорсь тейть надияма вастокс.
20 Мон сёрмадонь тейть колмогемонь валмуворкс,
конатнень эса тон муят ёнень максомат и содамошит.
21 Вельдест тон тонадсайть видешинь валхнень, конатнень лангс ули кода надиямс,
и маштсайть азондомс ня валхнень тонь кучихненди.
22 Тяк нельгонде ашуть уликсонц аньцек сянкса, мес сон ашу,
и тяк люпшне ямбар*а ломанть судса,
23 вдь Азорсь арай ширезост
и сявсыне-саласыне нельгихнень ваймоснон.
24 Тят ялгафта курок кяжияйть мархта,
и тят латце соткст курок сялгадыть мархта,
25 афток тонадат сонь кинзонды
и тонць эсь ваймоцень кундафтсак туворс.
26 Тят уле сянь лаца, кие люпштай лиянь кядь
и тяфта надияфты пандомс лиять шумонц.
27 Вдь кда тоньге аф ули мезьса пандомс,
эста сявсазь алдот вастценьге.
28 Тяк шашфне кунардонь межать,
конань путозь нинге тонь атянь-атятне.
29 Тон няендеть ломань, кона пяк машты эсь тевсонза?
Сон кармай покодема оцязорхненди,
а аф тяфтамка ломаненди.
*а 22:22 ямбар – несчастный, бедный, горемыка
Глава 22