Выбрать язык
Книги Ветхого Завета
Книги Нового Завета
с русским текстом1Оцязорть седиец Азорть кядьса, кода ведь шудерькс:
ков мялец, тов Сон шарфтсы сонь.
2 Ломанть сембе кинза эсь сельмосонза няевихть видекс,
но Азорсь ваны седить лангс.
3 Видексшинь эряфсь и виде судсь
Азорть мяльс тушендыхть озксказнень кандомада пяк.
4 Прянь няи сельмованфсь и прянь шнафты седись –
тя шкайфтомотнень эряфонь тяштьсна, кона вятьсыне синь пежень киге.
5 Покодемань кельгить арьсеманза вятихть сатфксонди,
а сембе эряскодыхне ашулгодыхть.
6 Кие васькафнема вельде кочкай козяши,
ся панци варма мельге и вешенди кулома.
7 Шкайфтомотнень веронь валы тевсна прайхть эсь пряснон лангс,
сяс мес синь аш мяльсна тиендемс видешить коряс.
8 Зиянонь тиить киц кичкор-мячкор,
а ару ломанть тевонза видет.
9 Сяда пара эрямс кудвельхксть ужеса,
сялонды рьвя мархта оцю кудса эрямать вастс.
10 Шкайфтомоть ваймоц веши тиемс кальдяв:
сон эсь ялганцка аф ужяльдьсы.
11 Наказасак кяжиста пеетькшнить – эряфонь аф содайсь ёнияй;
сюцесак-тонафтсак смузють – сядонга пяк касы содамошиц.
12 Видексшинь Шкайсь ваны шкайфтомоть кудонц мельге,
Сон кучи шкайфтомоть лангс зиян.
13 Кие паннесы пиленц ашуть эняльдеманц эзда,
ся сонцьке кармай эняльдема – и аф ули кульф.
14 Салавань казнесь матсы кяжть,
и повс наваф казнесь – кяжень лакамать.
15 Видеста судендамась – кеняртькс видексшинь ломанти,
но пелькс зиянонь тиихненди.
16 Ломанць, кона пувордась шарьхкодемань киста,
кармай ваймосема кулофнень пуромкссост.
17 Кие кельгсы кштимать-морамать, ся ашулгоды;
кие кельгсы винать и танцтиста ярхцамать, ся аф козякоды.
18 Шкайфтомось и кяжись повихть зиянц
Шкаень кельгить и видешиса эряйть вастс.
19 Сяда пара эрямс шавмодаса*а
изгорды и кяжи рьвя мархта эрямать вастс.
20 Смузють кудсонза питни паршихть и танцти ярхцамбяльхть,
а ёньфтомось семботь карьхцясы.
21 Кие тяряфни тиендемс видексшить и афкуксонь кельгомать коряс,
ся муй эряф, видексши и шнама.
22 Смузюсь сай виихнень ошезост
и срафтсыне ошень стенаснон, конатнень лангс синь надиясть.
23 Кие кирдьсы кяленц и кургонц,
ся ванфтсы эсь прянц зиянда.
24 Прянь няить и вярьге прянь кандыть лемоц – лиянь лангса пеетькшни,
сонь прянь няемац мезьсонга аф ункстави.
25 Нолать шавсазь сонцень таколдоманза*б,
вдь кядензон аш мяльсна покодемс.
26 Сон шиньберьф сяконь арьси, кода ба пяшкодемс таколдоманзон,
а видексшинь ломанць максы лиянди и максы аф ужяльдезь.
27 Шкайфтомотнень озксказнесна – тя туткотксши,
и сядонга оцю туткоткс, мзярда сон кандови зиянонь арьсезь.
28 Судса васькафнись юмай-арай;
а виде няить-кулить кармайхть кулхцондомонза.
29 Шкайфтомось тиендьсы шаманц аф пеликс,
а видексшинь ломанць арьси эсь кинц колга.
30 Кодамовок смузьшись, шарьхкодемась али ёньц тонафтомась
аф лезды сянди, кие ащи каршек Шкайти.
31 Алашать анокласазь тюремань шити,
но сяськомась – Азорть эзда.
*а 21:19 шавмода – пустыня
*б 21:25 тяса: желания, хотения
Глава 21