Выбрать язык
Книги Ветхого Завета
Книги Нового Завета
с русским текстом1Винась – кяжиста пееди, иретьфти симомбяльсь – пяляскафты;
эрсь, кие прафты тейст, ся аф ёню.
2 Оцязорть кяжец пелькс кода лефонь рнама:
кие сонь кяжияфтсы, ся катк пели эсь эряфонц инкса.
3 Шнави ся, кие кирди пря сялондомада,
а эрь ёньфтомось – курок крьвязи кяжса.
4 Нолась сёксенда аф сокай,
сяс нумань пингста мезевок аф муй.
5 Ломанень седиса арьсефксне – крхка ветть,
но ёню ломанць амолясыне синь.
6 Ламотне шнафтыхть пря аф полафни кельгомаснон мархта,
но кие муй стама ломань, конань лангс афкукс ули кода надиямс?
7 Видексшинь ломанть эряфоц аф мувору,
вай, конашкава павазуфт сонь иденза-уноконза!
8 Оцязорсь озай судендама вастозонза
и сельмованфса понжафтсы сембе кяжть.
9 Кие мярьгови: «Мон аруяфтыне седиезень,
мон аруван пежезень эзда?»
10 Аф видеста няфти весатне и аф виде ункстаматне,
и тя и тона – туткоткст Азорти.
11 Мянь шабатьке тевонзон коряс няеви,
ару и виде сонь эряфоц али аф.
12 Кули пилеть и няи сельмоть
– тяньге-тонаньге тиезень Азорсь.
13 Тяк кельге удомать, афток арат ашукс;
кирдить сельмотнень панжада, и топодемс ярхцат кшида.
14 «Аф цебярь, аф цебярь», – корхтай рамайсь,
а кодак туй – шнафты пря рамафксса.
15 Ули зрня и эрь кодама питни кевнят,
но инь питнись – тя ёнюста корхтай трватне.
16 Сявк сянь щамонц, кие макссь вал пандомс аф содаф ломанть шумонзон,
и киртьк тя щамть эсь кядьсот кода кемокстама ширде саф ломанть шумонц мрдафтоманц колга.
17 Васькафнема вельде сатф кшись пяк танцти;
но меле ломанть кургоц пяшкоди шуварда.
18 Тевонь корхтафтомась кемокстасыне арьсефкснень;
смузюфнень ёнень максомасна лездыхть тюремань вятемаса.
19 Кие нолни клят-млят, ся панчсесы салавашить;
тят ялгафта сянь мархта, кинь аф пяксневи кургоц.
20 Кие сюдосы алянц и тядянц,
сянь валдоптомац мады туста шобдаса.
21 Эряскодозь сявф тядянь-алянь эзда лятф козяшись
пингта меле аф канды бславама.
22 Тят корхне: «Мон кяженкса пандан кяжса»;
надияк Азорть лангс, и Сон аралатанза тонь.
23 Васькафни гирятне – тя туткотксши Азорти,
и аф видеста няфти ункстамбяльхне – кальдяв тев.
24 Азорсь вятьсыне ломанть аськолксонзон,
вдь кивок аф содасы эсь кинц.
25 Ломанць пови кундамас, кда сон эряскодозь надияфты максомс Азорти казне,
и аньцек меле арьси надияфтоманц колга.
26 Смузю оцязорсь понжафтсыне шкайфтомотнень,
ётай лангаст тялямань шарыса.
27 Ломанень ваймопожфсь – тя Азорть валдоптомац,
кона валдоптсыне седиень сембе крхкалмотнень.
28 Кельгозь ужяльдемась и видешись ванфтсазь оцязорть,
кельгозь ужяльдемаса сон кемокстасы эсь оцязоронь озама вастонц.
29 Од цёратнень шнама вастсна – вийса,
а атятнень мазышисна – шаржу шяярьса.
30 Пиксомась и эрьхтемась аруяфтыхть кальдявда,
вачкодематне ароптсазь седить пежеда.
Глава 20