Выбрать язык
Книги Ветхого Завета
Книги Нового Завета
с русским текстом1Кие явфты пря ломаньда, ся веши аньцек сонценнеть,
ся кеподи смузьшить каршек.
2 Ёньфтомось аф веши шарьхкодема,
а аньцек эсь мялень азома.
3 Шкайфтомоть мархта сай вярьгак ваномась,
и сялдомать мархта – визьксс сувамась.
4 Ломанень кургста лисьф валхне – крхка ветть;
синь – горняй шудерькс и смузьшинь лихтибря.
5 Аф пара – кирдемс зиянонь тиить ширенц
и нельгомс виде судть аф муворуть кядьста.
6 Ёньфтомоть кялец вяти сялондомас,
сонь валонза пачфтихть пикссемас.
7 Ёньфтомось юмай-арай эсь кяленц сюнеда,
и трванза кундасазь ваймонц туворс.
8 Корхтафтыть валонза – кода танцти ярхцамбяль,
синь крхкаста сувайхть ломанть потмос.
9 Кие цёлак*а эсь тевсонза,
– ся срафтыть-калафтыть брадоц.
10 Азорть лемоц – кеме башня:
видексшинь ломанць ворьгоди эзонза – и ули идеф.
11 Козяти уликс-парось, кода кемокстаф ош,
сон тейнза няеви сери и ванфты перяфксокс.
12 Вярьге прянь кандомась вяти прамати,
а сятявшись – шнамати.
13 Кие азсы эсь мяленц корхтайть педа-пес апак кулхцонтт,
ся ёньфтома и сувай визьксс.
14 Ломанть ваймоц кирдьсы ронгонь сярядемать,
но кда ваймось тапаф, кинди тя кирдеви?
15 Шарьхкодить седиец сатни содамоши,
и смузюфнень пилесна вешендьсазь сонь.
16 Казнесь келемгофтсы ломанть кинц,
и пачфтьсы сонь оцюнятненди.
17 Судса васенцекс корхтайсь няеви видекс,
мзярс аф сай мархтонза пялькстайсь, кона кизефнесы сонь.
18 Жерьбань каямась лоткафты пялькстомат,
и карань-каршек ащи вийхнень ёткса машфтсы тюремать.
19 Обжаф брадсь, кода кемокстаф ош,
сялондоматне явфтыхть, кода ошень ортаса тулотнеб.
20 Корхтаманц коряс ломанть пяшкодеви пекоцка,
кялец-валоц топодемс андсы сонь.
21 Эрямась и куломась кяльть азорксшинц алот;
кода ванат кяльцень мельге, стама имошт эздонза кочкат.
22 Кие мусь цебярь рьвя, ся мусь паваз
и сатозе Азорть пара мяленц.
23 Ашусь анай эняльдезь,
а козясь каршезонза корхтай казямста.
24 Кинь лама ялгадонза, ся пара тяза учсе;
но афкусонь ялгась уленди брадта мала.*в
*а 18:9 цёлак – нерадивый, ленивый
*б 18:19 тула – засов, большая дверная задвижка
*в 18:24 Синодальнай ётафтомаса: Кинь мялец мумс ялгат, сянди эстейнза улема ялгань кельгикс; и уленди тяфта: ялгась брадта мала.
Глава 18