Выбрать язык
Книги Ветхого Завета
Книги Нового Завета
с русским текстом1Ляпоста азф валсь матсы кяжть,
а обжай валсь крьвястьсы сонь.
2 Смузюфнень кулхцондомда меле, ломаттнень мяльсна ёниямс,
а ёньфтомотнень кургстост лиси ёньфтомаши.
3 Азорть сельмонза ваныхть сембе вастова:
синь няйсазь кальдяфнень и цебярьхнень.
4 Седиень озафты валсь – эряфонь шуфта,
а васькафни валсь колай мяль.*а
5 Ёньфтомось мезькска аф лувсыне алянц ёньц путоманзон,
а кие кулхцондсыне сюцематнень-тонафтоматнень, ся ёню.
6 Видексшинь ломанть кудсонза лама козяши,
а шкайфтомоть уликсонц сатсы зиян.
7 Смузюфнень трвасна пачфнихть содамоши,
а ёньфтомотнень седисна аф тяфтапт.
8 Азорсь туткоды шкайфтомотнень озксказнедост,
а виде вайме ломаттнень озондомасна Сонь мялезонза.
9 Азорсь туткоды шкайфтомоть кидонза,
а видексшинь киге молить Сон кельгсы.
10 Кие кадсы виде кить, сянь учи казяма сюцема-тонафтома,
и кие афолезе куле сюцемать, ся кулы.
11 Азорсь няйсы тонашить и Аваддонть*б,
и сядонга лац – ломаттнень седиснон.
12 Лиянь лангса пеетькшнись аф кельгсы, мзярда сонь сюцесазь-тонафтсазь,
и смузюфненди сон аф моли.
13 Кеняртьф седись валдоптсы шамать,
а седиень пичефкссь ризнафтсы ваймоть.
14 Ёнють седиец вешенди содамошит,
а ёньфтомотнень кургсна анневихть ёньфтомашиса.
15 Павазфтомось эрь шиня пичефксса,
а кинь седиец кеняртькшни, сянди фалу ила.
16 Сяда пара Шкайда пелезь кржа уликссь
оцю козяшить и сонь инксонза пелендемать вастс.
17 Антф букань сивольть оцю кяж кирдезь пореманц вастс
сяда цебярь перень сёрода кельгозь ярхцамась.
18 Курокста крьвязи ломанць ушеткшни сялондомат,
а кие кирдьсы кяженц, ся сетьмофтьсы пялькстомать.
19 Нолапарть киц кассь сялги тишеса,
а виде вайме ломанть киц вадяв.
20 Смузю цёрась кеняртьфтьсы алянц,
а ёньфтомось мезькска аф путсы тядянц.
21 Кинь кржа ёнец, ся кеняртькшни ёньфтомашинцты,
а ёнюсь моли виде киге.
22 Коса аш ёнень максома, тоса тефне срадыхть,
а коса ёнень максыда лама, тоса сембось лиси.
23 Кодама кеняртькс, мзярда муят эрявикс каршек вал,
и конашкава пара, мзярда валсь азови эсь пингстонза!
24 Смузю ломанць куци эряфонь киге вяри,
тяфта сон мяни адта, кона алува.
25 Азорсь калафтсыне прянь няихнень кудснон,
а удаватнень умаснон Сон ванфтсыне-кемокстасыне.
26 Азорсь туткоды кальдяв ломаттнень мяльснон-арьсемаснон эзда,
Сонь мялезонза аруфнень валсна.*в
27 Аньцек эстейнза паронь вешендись
терди зиян эсь кудонц лангс,
а кие прокс аф кельгсыне салавань казнетнень*г,
ся кармай эряма.
28 Видексшинь ломанть седиец арьсесы каршек валонц,
а шкайфтомотнень кургсна тюхадихть кяж.
29 Азорсь ичкозе шкайфтомотнень эзда,
а видексшинь ломаттнень озондомаснон кульсыне.
30 Валда сельмованфсь кеняртьфти седи,
пара кулясь кемокстай ронга.
31 Кинь пилец кулхцондсы эряфонь максы тонафтомать,
ся ули смузюфнень ёткса.
32 Кие аф сявсы мяльс ёньц путомать,
ся эсь ваймонц лувсы аф питникс,
а кие кулхцонды сюцемат-тонафтомат,
ся муй ёнь.
33 Азорда пелемась тонафты смузьшинди,
и сятявшись вяти шнаманди.
*а 15:4 Синодальнай ётафтомаса: Сятяв кяльсь – эряфонь шуфта, аф кирдеви кяльсь колай мяль.
*б 15:11 Аваддон – тя тонашить омбоце лемоц, сонь смузец «юмама-арама васта»
*в 15:26 Евреень кяльса тя вастть смузец: но пара валхне аруфт.
*г 15:27 салавань казне – взятка
Глава 15