Выбрать язык
Книги Ветхого Завета
Книги Нового Завета
с русским текстом1Смузю рьвясь кемокстасы кудонц,
а ёньфтомось – эсь кятть калафтсы сонь.
2 Кие моли виде киге, ся пели Азорда,
но кинь кинза кичкорхт, ся мезькска аф путсы Сонь.
3 Ёньфтомоть валонза – тя локша сонцень прянь няеманцты,
а смузюфнень ванфнесазь трвасна.
4 Коса аш букат, тоса андомань очксь шава,
но таза букатнень мархта шачи лама сёра.
5 Виде вайме ломанць аф васькафни судса,
а кяльготнись ваймонцка тарксесы васькафнемаса.
6 Аф поваднай ломанць вешенди смузьши, и аф муй,
а шарьхкоди ломанти содамошись максови тёждяста.
7 Аертт ёньфтома ломанть эзда,
сонь кургстонза ёню валхт аф лисихть.
8 Ёнють смузьшиц – эсь эряфонц шарьхкодемаса,
а ёньфтомотнень ёньфтомашисна – эсь прянь васькафнемаса.
9 Ёньфтомотне пеетькшнихть эсь пежеснон лангса,
а виде ломаттнень ёткса Шкайть пара мялец.
10 Седись содай эсь ризфонц,
и кенярдеманцка лиясь аф марясы.
11 Шкайфтомотнень кудсна калады,
а видексшинь ломаттнень кошсна касыхть-келемихть.
12 Ламоц китне няевихть ломаттненди видекс,
но синь вятихть куломас.
13 Уленди, пеедемста седись ризнай,
и кенярдемада меле сашенды пичефкс.
14 Виде кинь кадысь топафтови эсь тевонзон эзда,
а пара ломанць – эсь тевонзон эзда.
15 Эряфонь аф содайсь кемай эрь валти,
а ёнюсь арьсекшнесы эрь аськолксонц.
16 Смузюсь пели и аерды кальдявда,
а ёньфтомось фалу кяжи и надияй эсь прянц лангс.
17 Курокста крьвязись тии ёньфтома тефт,
а салава сускить сельмосонга афолезь няе.
18 Эряфонь аф содайхненди уликс-парокс максови ёньфтомаши,
а смузюфненди – содамошинь каштаз.
19 Кальдявонь тиихненди сави сюконямс
пара ломаттнень инголе,
и шкайфтомотненди –
видексшинь ломанть ортанзон инголе.
20 Ашуть афолезь няе маластонь ломанензовок,
а козять лама ялгадонза.
21 Кие безярди эсь мала ломаньдонза, ся тии пеже,
а кие кельгозь ужяльдьсы ашуть, ся павазу.
22 Дяряй ашесть эрьгоде сят, кит арьсихть зиянонь тефт?
Аф полафни кельгомась и видешись – паронь арьсихнень мархтот.
23 Эрь покодемать эзда ули лезкс,
а лабордомать эзда аньцек ашуши.
24 Смузюфнень каштазсна – синь козяшисна,
а ёньфтомашись – тя ёньфтомотнень коняфкссна.
25 Судса виде няфтемань азондысь иди ваймот,
а кяльготнись ваймонц таркси васькафнемаса.
26 Азорда пелемась – тя кеме нежетькс,
сон кяшема васта тейть и тонь иттненди.*а
27 Азорда пелемась – эряфонь лихтибря,
сон ванфты куломань туворхнень эзда.
28 Оцязорть шнама вастоц – лама ломаньца,
а ломаньфтома оцюнять сатсы зиян.
29 Кинди кирдеви кяжец, сянь лама ёньдонза,
а курокста крьвязись няфтьсы ёньфтомашинц.
30 Сетьме седись максы ронгти шумбраши,
а сельмонь каямась наксафты пакарьхть.
31 Кие люпштасы ашуть, ся аердасы сонь Тииенц;
а кие лезды ашушиса эряйти, ся шнасы-кеподьсы Азорть.
32 Шкайфтомось юмай-арай эсь кальдяв тевдонза,
а видексшинь ломанти куломстонзовок ули мезе лангс надиямс.
33 Смузьшись эряй ёнють седиса,
ёньфтомотненьге ёткса сон эвондакшни.
34 Видексшись кеподьсы ломаньтналть,
а пежесь вятьсы сонь визькс шамас.
35 Оцязорть седиец ладяф ёню покодити,
но кяжец прай сянь лангс, кие сувафнесы сонь визькс шамас.
*а 14:26 Синодальнай ётафтомаса: и Эсь идензонды Сон кяшема васта.
Глава 14