Выбрать язык
Книги Ветхого Завета
Книги Нового Завета
с русским текстом1Смузю цёрась кулхцондсы алянц ёньц тонафтоманц,
а лиянь лангса пеетькшнись аф кули сюцематнень пяли.
2 Цебярь валхне кандыхть корхтайти цебярь имошт,
а васькафнихнень мяльсост аньцек зиянонь тиемась.
3 Кие кирдьсы кяленц,
ся ванфтсы эсь ваймонц;
а кие келеста келепнесы кургонц,
ся юмафтсы-арафтсы эсь прянц.
4 Нолась учи, но мезевок аф саты,
а тевонь кельгихнень мяльсна пяшкодихть.
5 Видексшинь ломанць сельмосонга афолезе няе васькафнемать,
а шкайфтомось тисы прянц аерксокс и сувай визьксс.
6 Видексшиса эряйть ванфтсы видексшиц,
а шкайфтомоть юмафтсы-арафтсы пежец.
7 Фкясь няфнесы прянц козякс, а сонцень мезецка аш;
лиясь няфнесы прянц ашукс, хуш сонь пяк оцю козяшиц.
8 Козя ломанць идесы эсь эряфонц ярмакса,
а ашушиса эряйть кивок афи эвфнесы.
9 Видексшинь ломаттнень валдсна кенярдезь валдопты,
а шкайфтомотнень толсна мады.
10 Прянь няемась вяти аньцек сялондоманди,
но смузю ся, кие кулхцонды ёнень максомат.
11 Тёждяста сатф козяшись юмай,
а кие аф ламнянь-аф ламнянь кочксесы, ся ламолгофтсы сонь.
12 Куватьс аф пяшкоди учемась ризнафты седи,
а пяшкотьф мяльсь эреклафты, кода эряфонь шуфта.
13 Кие мезькска аф путсы ёньц тонафтомать,
ся эстейнза тии кальдяв,
а кинди питнихть кошарксне,
сянди максови казне.
14 Смузють тонафтомац – эряфонь лихтибря,
сон ванфты куломань туворхнень*а эзда.
15 Смузюста арьси ломанць туй мяльс,
а салава сускихнень кисна стака.
16 Эрь ёнюсь тевонц тии шарьхкодема мархта,
а ёньфтомось няфнесы эсь ёньфтомашинц.
17 Кулянь кандысь, кона васькафни,
пови зиянц,
а кулянь пачфтись, конань лангс ули кода надиямс,
канды идема.
18 Кие аф сявсы мяльс ёньц тонафтомать,
сянь учсы ашушись и визькс шамас сувамась,
а кие кулхцондсыне сюцематнень,
ся ули шнаф.
19 Пяшкотьф мяльсь кеняртьфти вайме,
но ёньфтомоти шарфтомс зиянонь тевонзон эзда – тя аф няевомшка кальдяв.
20 Смузюфнень мархта ялгафтысь ули смузю,
а ёньфтомотнень мархта якафтысь пови зиянц.
21 Пежуфнень мельге панци зиян,
а видексшинь ломаттненди пандови пароса.
22 Пара ломанць уликсонц кадсы уноконзонды,
а пежень тиить козяшиц ванфневи видексшинь ломанти.
23 Ашутьке паксясонза шаченды лама сёра,
но лиятнень аф видешисна нельгсы сёроть кядьстонза.
24 Кие ужяльдьсы илиенц, ся прокс аф кельгсы цёранц,
а кие кельгсы, ся ёмластокиге ёнияфнесы сонь.
25 Видексшинь ломанць ярхцай топодемс,
а шкайфтомотне лядыхть вачеда.
*а 13:14 тувор – западня, капкан
Глава 13