Выбрать язык
Книги Ветхого Завета
Книги Нового Завета
с русским текстом1Кие кельгсы ёньц тонафтомать, ся кельгсы содамошить,
а кие прокс аф кельгсы сюцеманц, сянь кржа ёньдонза.
2 Азорть мялец ладяф пара ломанти,
а салава сускить Сон судендасы.
3 Зиянть вельде масторлангса кивок аф кирдеви,
а видексшинь ломаттнень юрсна аф шерьфтеви.
4 Цебярь рьвясь – каштаз мирденцты,
а визьксс вяти рьвясь – кода наксаткс сонь пакарьсонза.
5 Видексшинь ломаттнень арьсемасна видет,
а шкайфтомотнень арьсефкссна васькафтыхть.
6 Шкайфтомотнень валсна пачфтихть веронь валомас,
а видексшинь ломаттнень корхтамасна канды идема.
7 Шкайфтомоть машфтсазь, и сон аш,
а видексшинь ломаттнень юромсна кемоста кирди.
8 Ломанть шнасазь смузьшинц коряс,
а кинь кольф ёнец, сянь эзда безярдихть.
9 Сяда пара улемс сельмос аф пови ломанькс
и эсь кятть трямс пря*а,
сянь вастс, мзярда ломанць тиендьсы эсь прянц пяк оцюкс,
а сонцень кшицка аш.
10 Видексшинь ломанць якай-ваны жуватанзон мельге,
а шкайфтомотнень седисна казяпт.
11 Кие сокасы-видесы моданц,
ся топодемс ярхцай кшида,
а кие ётафнесы пингонц, панцемок шавонь мельге,
сянь аш ёнец.
12 Шкайфтомоть мялец сявомс зиянонь тиихнень сатфксснон,
а видексшинь ломаттнень юрсна нолдай лисьфкст.
13 Шкайфтомоть кундасазь сонцень пежу валонза,
но видексшинь ломанць мяни палада.
14 Эсь корхтаманц эзда ломанць саты лама цебярь,
и кядьса тиф тевоц мрдай тейнза казнекс.
15 Ёньфтомоть киц виде эсь сельмосонза,
но смузюсь кулхцонды ёнень максомат.
16 Ёньфтомось эстокиге няфтьсы кяженц,
а ёнюсь афи ваны обжайть валонзон лангс.
17 Видешинь корхтайсь азонды сянь, мезе няйсь,
но васькафни няись-кулись кяльготни судса.
18 Апак арьсек азф валхне керыхть кода тор,
а смузюфнень корхтамасна пчкафты.
19 Видешинь валхне кирдихть пефтома пингс,
а васькафни валхне – аньцек нюрьхкяня пинге.
20 Зиянонь арьсихнень седисост васькафнема,
а сетьмошинь ладяйхнень – кенярдема.
21 Кодамовок кальдяв аф лиси видексшинь ломанть мархта,
а шкайфтомотнень эряфсна ули пяшкотьф зиянда.
22 Азорсь туткоды васькафни трвада,
а видешинь корхтайхне Сонь мялезонзот.
23 Ёнюсь аф эряскоды няфтемс содамошинзон,
а ёньфтомось ювади эсь ёньфтомашинц колга.
24 Тевонь кельгихне кармайхть азорондама,
а нолатне повихть урексшинь ашкть алу.
25 Седиень пичефкссь люпштасы ломанть,
а пара валсь кеняртьфтьсы сонь.
26 Видексшинь ломанць няфтьсы кить маластонь ломаненцты,
а шкайфтомотнень янцна эрьготьфтихть.
27 Нолати аф кундави вирьбаксянь жувата,
а тевонь кельгись кочкай оцю козяши.
28 Видексшинь кить лангса – эряф,
сонь янонц лангса кулома аф васьфтят.
*а 12:9 али: Сяда пара улемс сельмос аф пови ломанькс, но кудса кирдемс покоди.
Глава 12