Выбрать язык
Книги Ветхого Завета
Книги Нового Завета
с русским текстом1 Васькафни ункстаматне – туткоткст Азорть сельминголе,
а видеста ункстафсь Сонь мялезонза.
2 Коса ули прянь няема, тов сай визькс шамас сувамась;
но сятяв ломаттнень мархта смузьшись.
3 Виде вайме ломаттнень вятьсыне арушисна,
а салава сускихнень машфтсыне ёжушисна.
4 Козяшись аф лезды кяжень шиста,
а видексшиса эрямась иди куломада.
5 Видексшись вадявгофтсы аф муворуть кинц,
а шкайфтомось прай эсь кальдявшидонза.
6 Виде вайме ломаттнень идесыне видешисна,
а койфтомотне улихть кундафт эсь визьксонь мяльсост.
7 Пежусь кулы и юмай сонь надиямац;
шкайфтомотнень седиень учемасна аф пяшкодихть.
8 Видексшинь ломанць идеви зиянда,
вастозонза тов пови пежусь.
9 Шкайфтомось корхтаманц мархта юмафтсы-арафтсы маластонь ломаненц,
но видексшинь ломаттне идевихть содамошиснон вельде.
10 Мзярда видексшинь ломаттне сафтсазь тевса
– ошсь кеняртькшни;
мзярда кулсихть шкайфтомотне
– марявихть кенярдемань вайгяльхть.
11 Видексшинь ломаттнень бславамаснон вельде
ошсь касы-кеподи,
а шкайфтомотнень корхтамаснон вельде
сон срады-калады.
12 Кие безярдезь корхтай маластонь ломаненц мархта, сянь аф сатни ёнец,
а шарьхкоди ломанць аф кашторды.
13 Клянь-млянь пачфнись панчсы салава азфть,
а ломанць, конань лангс ули кода надиямс, машты салавашинь ванфтома.
14 Коса аш смузю вяти, тоса ломаньтналсь прай,
а коса лама ёнень максыда – тоса цебярь эряф.
15 Кальдяв эстейнза тии ся,
кие максы вал лиять шумонзон инкса;
аш мезьда пелемс сянди,
кие аф кельгсы лия ломаненкса валонь максомать.
16 Пара вайме авась кочкай шнама,
тевонь кельги алятне кочкайхть козяши*а.
17 Паронь тиись пара няи,
а казяма седись – эстейнза тии зиян.
18 Шкайфтомось тевонзон инкса саты васькафтома,
а видексшинь видись – пефтома пингонь казне.
19 Видексшись вяти эрямати,
а кие ласьки кяжть мельге, ся кулы.
20 Азорсь туткоды салава сускида,
Сонь мялезонзот сят, кинь кисна аф муворуфт.
21 Содак, зиянонь тиись аф мяни наказамада,
а видексшинь ломаттнень юромсна идеви.
22 Кода тувонь нярти ладяй зрнянь суркссь,
стане ёньфтома авати – мазышись.
23 Видексшинь ломаттнень мяльсна-учемасна вятихть аньцек паронди,
а шкайфтомотнень надиямасна – кяженди.
24 Фкясь аф ужяльдезь яви, и тейнза нинге максови,
а лиясь эрявикста лама ванфты, и сяка эряй ашушиса.
25 Паронь тии ваймось козякоды,
кие лиятнень симдьсыне ведьта, ся сонцьке ули симтьф.
26 Кие вачашинь пингста кяшендьсы сёроть, сянь ломаньтналсь сюдосы,
а сёронь мишендить – бславасазь.
27 Кие оцю мяльса вешенди тиемс пара, ся вешенди Шкайть мяльс тума,
а кие вешенди кяж, сянди сон и сай.
28 Кие надияй эсь козяшинц лангс, ся пужи-прай,
а видексшинь ломаттне сянгяря тарадкс касыхть-келемихть.
29 Кие эсь кудсонза крьвясти аф ладямат, ся ляды уликсфтома,
и ёньфтомось тиеви урекс смузюти.
30 Видексшинь видьмоть эзда касы эряфонь максы шуфта,
и смузюсь иди ломанень ваймот.
31 Кда видексшинь ломанти масторлангса пандови тевонзон инкса,
эста нинге сядонга пяк шкайфтомоти и пежути.
*а 11:16 а казяма ломаттне кочкайхть козяши
Глава 11