Выбрать язык
Книги Ветхого Завета
Книги Нового Завета
с русским текстомСоломононь валмуворксонза
1Соломононь валмуворксонза.
Смузю цёрась – кеняртькс алянцты,
а ёньфтомось – пичефкс тядянцты.
2 Васькафтозь сатф козяшись лезкс аф канды,
а видексшиса эрямась иди куломада.
3 Азорсь видексшинь ломанть вачеда аф кадсы,
шкайфтомоть мяленц-арьсеманц Сон аф пяшкодьсы.
4 Нола кядсь ашуяфты,
а тевонь кельги кядсь козякофты.
5 Кизонда иможень кочкайсь – смузю цёра,
а нумань пингста удысь – визьксс сувафты цёра.
6 Видексшинь ломаттнень пряснон лангса бславамат,
а шкайфтомотнень кургсна сёпондсазь веронь валомать.
7 Видексшинь ломанть колга лятфнемась канды бславама,
а шкайфтомотнень лемсна юмайхть-наксадыхть.
8 Смузю седись кулхцонды кошардомат,
а лаборды ёньфтомось юмай-арай.
9 Кие якай видешинь киге,
сянди аш мезьда пелемс,
а кие вешенди кичкор-мячкор кит,
сянь тевонза улихть лихтьфт лангти.
10 Ёжуста сельмонь чипоряйсь тии зиян,
а ёньфтомоть лабордомац вятьсы прамас.
11 Видексшинь ломанть кургоц – эряфонь лихтибря,
а шкайфтомотнень кургсна сёпондсазь веронь валомать.
12 Кяжсь крьвясти сялондомат,
а кельгомась вельхтясыне сембе пежетнень.
13 Ёнють трванзон лангса эряй смузьши,
а ёньфтомоть копоренцты эряви или.
14 Смузюфне ванфнесазь содамошить,
а ёньфтомоть кургоц вятьсы юмамас-арамас.
15 Козяти уликссь, кода лац кемокстаф ош,
ашути ашсь, кода юмама-арама.
16 Видексшинь ломанть покодемац вяти эряфти,
а шкайфтомоть сатфксоц вяти пежес.
17 Кие кулхцондсы ёньц тонафтомать,
ся ащи эряфонь кить лангса,
а кие шарфни сюцемать эзда,
ся эрьгоди.
18 Кие кяшендьсы кяженц, сянь трванза васькафнихть,
кие корхтафни ломатть, ся ёньфтома.
19 Ламонь корхтазь аф мяневат пежеда,
а кие кирдьсы кяленц – ся ёню.
20 Видексшинь ломанть кялец – тя инь цебярь сия,
а шкайфтомотнень седисна – тя мезевок аш.
21 Видексшинь ломанть трванза аннесазь ламотнень,
а ёньфтомотне кулсихть, сяс мес тейст аф сатни ёнь.
22 Шкаень бславамась козякофты
и эсь мархтонза аф канды пичефкс.
23 Ёньфтомоти зиянонь тиемась, бта колендема,
а ёнють кеняртьксоц смузьшиса.
24 Мезьда пели шкайфтомось, ся сонь и сатсы,
а видексшинь ломанти максови мяленц коряс.
25 Даволсь ётай – и аш шкайфтомось,
а видексшинь ломанць пефтома пингс путф кеме юр лангс.
26 Кода уксузсь пейхненди и качамсь сельмотненди,
стане нола ломанць кучиензонды.
27 Азорда пелемась ламолгофтсыне шитнень,
а шкайфтомотнень кизосна кирьфтавихть.
28 Видексшинь ломаттнень седиень учемасна вяти кеняртьксти,
а шкайфтомотнень надиямасна юмай.
29 Азорть киц аф муворути – тя кемокстаф кяшема васта,
а кальдявонь тиити – пелькс васта.
30 Видексшинь ломанць мзярдовок аф шерьфтеви,
а шкайфтомотне аф кадовихть масторлангса.
31 Видексшинь ломанть кургста лисихть смузю валхт,
а кяжи кяльсь ули керф.
32 Видексшинь ломанть валонза – тя кельгомань валхт,
а шкайфтомоть кургоц пяшксе визькс валда.
Глава 10